ఏపీ మంత్రివర్గం కీలక నిర్ణయాలు.. వారికి ఇక పదవీ గండమే!

ఆంధ్రప్రదేశ్ ముఖ్యమంత్రి నారా చంద్రబాబు నాయుడు అధ్యక్షతన బుధవారం జరిగిన మంత్రివర్గ సమావేశంలో పలు కీలక నిర్ణయాలకు ఆమోదం లభించింది. సచివాలయంలో సీఎం చంద్రబాబు అధ్యక్షతన బుధవారం సాయంత్రం ఏపీ కేబినెట్ భేటీ జరిగింది. ఈ మంత్రివర్గ సమావేశంలో ఏపీ టూరిజం పాలసీకి కేబినెట్ ఆమోదం తెలిపింది. అలాగే పర్యాటక ప్రాజెక్టులకు పరిశ్రమల హోదా కల్పించేందుకు పచ్చజెండా ఊపింది. ఏపీ ఇన్‌ఫ్రా ట్రాన్స్‌‍పరెన్సీ యాక్ట్ 2019ను రిపీల్ చేయాలని ఏపీ కేబినెట్ భేటీలో నిర్ణయించారు. జ్యుడిషియల్‌ ప్రివ్యూ రద్దు బిల్లుకు, నూతన క్రీడా విధానానికి కూడా ఆంధ్రప్రదేశ్ మంత్రివర్గం ఆమోదం తెలిపింది.

అలాగే డ్రగ్స్ నియంత్రణ కోసం ఏర్పాటు చేసిన యాంటీ నార్కోటిక్స్ టాస్క్ ఫోర్స్ పేరును ఎలైట్ యాంటీ నార్కటిక్ గ్రూప్‌గా(ఈగల్) మార్చే ప్రతిపాదనలకు మంత్రులు ఆమోదం తెలిపారు. ఏపీ టవర్స్ లిమిటెడ్‌ను ఏపీ స్టేట్ ఫైబర్ నెట్ లిమిటెడ్‌లో విలీనం చేసే ప్రతిపాదనకు కూడా పచ్చజెండా ఊపింది. ప్రధానమంత్రి ఆవాస్ యోజన 2.0 కోసం గృహ నిర్మాణ శాఖ చేసుకోనున్న ఒప్పందానికి కూడా ఆమోదం లభించింది. అన్నింటి కంటే ముఖ్యంగా స్థానిక సంస్థల్లో ఛైర్మన్లపై అవిశ్వాసం పెట్టే విషయంలో చట్ట సవరణకు ఏపీ కేబినెట్ ఆమోదం తెలిపింది. నాలుగేళ్ల వరకూ అవిశ్వాసం పెట్టేందుకు వీలు లేకుండా గతంలో చట్టం తెచ్చారు. అయితే ఈ గడువు నాలుగేళ్ల నుంచి రెండేళ్లకు కుదిస్తూ తాజాగా చట్ట సవరణ బిల్లు తేనున్నారు. ఈ ప్రతిపాదనలకు ఆంధ్రప్రదేశ్ మంత్రివర్గం ఆమోదం తెలిపింది.

మరోవైపు 2024 ఆంధ్రప్రదేశ్ అసెంబ్లీ ఎన్నికల తర్వాత వైసీపీకి చెందిన పలువురు కౌన్సిలర్లు, కార్పొరేటర్లు, మున్సిపల్ ఛైర్మన్లు కూడా వైసీపీకి రాజీనామా చేశారు. పలువురు తెలుగుదేశం పార్టీలో చేరిపోగా.. మరికొందరు జనసేనలో చేరారు. నాలుగేళ్ల వరకూ అవిశ్వాస తీర్మానం పెట్టే అవకాశం లేకపోవటంతో కౌన్సిలర్లు, కార్పొరేటర్లు పార్టీలు మారినప్పటికీ.. ఛైర్మన్ పీఠం మీద వైసీపీ నేతలే ఉంటూ వచ్చారు. అయితే ఈ గడువును రెండేళ్లకు కుదించే ప్రతిపాదనలకు ఏపీ కేబినెట్ ఆమోదం తెలపటంతో ఇప్పుడు వీరందరికీ పదవీ గండమేనని చెప్పొచ్చు. ఏపీ అసెంబ్లీ సమావేశాలు మరో రెండు రోజులు జరగనున్న వేళ.. ఈ చట్ట సవరణ బిల్లును ఏపీ ప్రభుత్వం ఈ సమావేశాల్లోనే తీసుకువచ్చి ఆమోదం పొందే అవకాశం ఉంది.