సోమవారం రోజు శ్రీశైలం వెళ్తున్నారా.. ఈ విషయాన్ని గమనించండి

ప్రముఖ శైవక్షేత్రం శ్రీశైలానికి భక్తులు పోటెత్తారు. కార్తీక మాసం కావటంతో మల్లన్న దర్శనానికి తరలివస్తున్నారు. రేపు కార్తీక మాసం చివరి సోమవారం కావటంతో శ్రీశైల భ్రమరాంబిక మల్లిఖార్జునస్వామి దర్శనం కోసం బారులు తీరుతున్నారు. తెలుగు రాష్ట్రాల నుంచి మాత్రమే కాకుండా పొరుగున ఉన్న కర్ణాటక నుంచి కూడా భక్తులు తరలివస్తున్నారు. దీంతో శ్రీశైలంలో భక్తుల రద్దీ నెలకొంది. అలాగే ఘాట్ రోడ్డులో భారీగా ట్రాఫిక్ జామ్ అయ్యింది. ఆదివారం సాయంత్రం శ్రీశైలం ఘాట్ రోడ్డులో ఏకంగా ఐదు కిలోమీటర్ల మేరకు వాహనాలు బారులు తీరాయి. శ్రీశైలం టోల్ గేట్ వద్ద నుంచి సాక్షి గణపతి, ముఖ ద్వా రం వరకూ భారీగా ట్రాఫిక్ జామ్ ఏర్పడింది.

భక్తుల రద్దీ పెరగటంతో రోడ్డుపై కార్లు, బస్సులు ఎక్కడిక్కడ నిలిచిపోయాయి. దీనితో సుమారు 5 కిలోమీటర్ల మేర ట్రాఫిక్ జామ్ ఏర్పడింది. కార్తీకమాసంలో వచ్చే చివరి సోమవారం కావటంతో ఇతర రాష్ట్రాల నుంచి కూడా భక్తులు తరలివస్తున్నారు. ముఖద్వారం నుంచి శ్రీశైలం వెళ్లడానికి సుమారుగా రెండు గంటల సమయం పట్టింది. ఇక శ్రీశైలం భక్తుల రద్దీని దృష్టిలో ఉంచుకుని ఆలయ అధికారులు కూడా ప్రత్యేక ఏర్పా్ట్లు చేశారు. శ్రీశైలంలో సామూహిక అభిషేకాలు, గర్భాలయం అభిషేకాలను పూర్తిగా రద్దు చేశారు.

మరోవైపు కార్తీక మాసం కావటంతో వేకువజామునుంచే మల్లన్న దర్శనానికి భక్తులు బారులు తీరుతున్నారు. పాతాళగంగలో పుణ్యస్నానాలు ఆచరించి.. స్వామి, అమ్మవారిని దర్శించుకుంటున్నారు. కార్తీక మాసం కావటంతో భక్తులు దీపారాధన చేసేందుకు శ్రీశైలం దేవస్థానం ప్రత్యేక ఏర్పాట్లు చేసింది. ఆలయ ఉత్తర మాఢవీధి ప్రాంగణం వద్ద, దేవాలయం ఎదురుగా ఉన్న గంగాధర మండపం వద్ద దీపాలు వెలిగించేందుకు ఏర్పాట్లు చేసింది. ఇక కార్తీక మాసం ఉత్సవాల్లో భాగంగా శ్రీశైలంలో పలు ఆధ్యాత్మిక కార్యక్రమాలు నిర్వహిస్తున్నారు. దర్మపథంలో నిర్వహించిన నిత్యకళారాధన ఆకట్టుకుంది. అలాగే తిరుపతికి చెందిన సహస్ర అకాడమీ బృందం నిర్వహించిన సంప్రదాయ నృత్య ప్రదర్శన కార్యక్రమం ఆకట్టుకుంది. శివస్తుతి సహా అనేక శైవగీతాలకు కళాకారులు నృత్యప్రదర్శన నిర్వహించారు.