రూ.40 వేల కోట్ల వ్యాపార సామ్రాజ్యానికి వారసుడు.. బౌద్ధ సన్యాసిగా మారి భిక్షాటన..!

తరతరాలు కూర్చుని తిన్నా తరగని ఆస్తి.. ఆయన చిటికేస్తే వచ్చి వాలే నౌకర్లు.. అడుగులకు మడుగులొత్తే సిబ్బంది.. లెక్కలేనన్ని వ్యాపారాలు.. నిత్యం విందులు వినోదాలతో సాగిపోయే జీవితం... కానీ, ఇవన్నీ ఆయనకు భౌతికం అనిపించాయి.. విలాసాలు క్షణికానందమేనని భావించాడు.. బౌద్ధ భిక్షువులను చూసి సరదాగా సన్యాసిగా మారిన అతడికి అందులోనే నిజమైన ఆనందం ఉందని తెలుసుకున్నాడు. దీంతో ఒకటి రెండు కాదు ఏకంగా 40 వేల కోట్ల సామ్రాజ్యాన్ని వదిలి శాశ్వతంగా సన్యాసం స్వీకరించాడు ఈ అభినవ సిద్ధార్ధుడు. నిత్యం జోలె పట్టుకుని భిక్షాటన చేస్తున్నాడు. అతడే మలేషియాలో మూడో అతిపెద్ద బిలియనీర్, భారత సంతతికి చెందిన ఆనంద్ కృష్ణన్ అలియాస్ ఏకే ఏకైక కుమారుడు వెన్ అజాన్ సిరిపన్యో.

మీడియా నివేదికల ప్రకారం.. ఏకే వ్యాపార సామ్రాజ్యం విలువ 5 బిలియన్ డాలర్లు అంటే భారత కరెన్సీలో రూ.44 వేల కోట్ల పైమాటే. ఇక, అజాన్ 20 ఏళ్ల కిందట 18 ఏళ్ల వయసులో థాయ్ రాజవంశీకురాలైన తన తల్లి కుటుంబానికి నివాళులర్పించేందుకు థాయిలాండ్ వెళ్లారు. ఆ పర్యటనే అతడి జీవితాన్ని మలుపు తిప్పింది. అక్కడి బౌద్ధ భిక్షువులను చూసి ప్రేరణ పొందాడు. సరదా కోసం తాను సన్యాసిగా మారాలనుకున్నాడు. కానీ, నిజంగానే సన్యాసం వైపు ఆకర్షితుడై.. ఏకంగా రూ. 40 వేల కోట్ల సామ్రాజ్యాన్ని వదులుకున్నాడు. తన ఆధ్యాత్మిక మార్గానికి ఇవన్నీ అడ్డుగా భావించిన అజాన్ ఇంటి నుంచి దూరంగా వచ్చేశాడు.

ప్రాపంచిక సుఖాలను వదిలి.. బౌద్ధమతాన్ని స్వీకరించి ధార్మిక కార్యక్రమాల్లో మునిగితేలుతున్నాడు. ప్రస్తుతం పీఠాధిపతిగా థాయ్ ల్యాండ్- మయున్మార్ సరిహద్దుల్లో ప్రాంతంలో బౌద్ధవుగా జీవిస్తున్నాడు. తన ఇద్దరు సోదరిమణులతో లండన్‌లో పెరిగిన అజాన్.. అక్కడే విద్యాభ్యాసం పూర్తిచేసుకున్నాడు. ఇంగ్లిష్ సహా మొత్తం ఎనిమిది భాషల్లో అనర్గళంగా మాట్లాడగలడు. సన్యాసిగా జీవనం సాగిస్తున్నప్పటికీ అప్పుడప్పుడూ తన తండ్రిని కలిసేందుకు ఆయన ప్రైవేట్ జెట్‌లో వెళ్తుంటాడని పలువురు చెప్తుంటారు.

అజాన్ తండ్రి ఆనంద్ కృష్ణన్.. తమిళనాడుకు చెందిన వ్యాపారవేత్త. టెలికమ్, శాటిలైట్, మీడియా, ఆయిల్, గ్యాస్, రియల్ ఎస్టేట్ సహా పలు రంగాల్లో వ్యాపార సామ్రాజ్యం విస్తరించారు. గతంలో ఎయిర్‌సెల్ పేరుతో టెలికం రంగంలో గుర్తింపు పొందారు. అంతేకాదు, ఐపీఎల్‌లో ఒకప్పుడు చెన్నై సూపర్ కింగ్స్ జట్టుకు స్పాన్సర్‌ కూడా బిజినెస్ టైకూన్‌గా ఎదిగిన ఏకే.. వేల కోట్లు ఉన్నా తన కొడుకును పోషించలేని అసమర్థుడినంటూ ఆయన ఓ సందర్భంలో వ్యాఖ్యానించడం గమనార్హం. కానీ, కొడుకు ఇష్టాన్ని గౌరవించడం ఓ తండ్రిగా నా బాధ్యత అని అన్నారు.