ఏపీలో పోస్టాఫీసులకు మహిళల పరుగు.. సంక్షేమ పథకాలు రావని

ఆంధ్రప్రదేశ్‌లోని పలు జిల్లాల్లో మహిళలు పోస్టాఫీసులకు క్యూ కట్టారు. రాజమహేంద్రవరం, విజయవాడ, కర్నూలుతో పాటుగా పలు జిల్లాల్లో పోస్టాఫీసుల దగ్గర రద్దీ ఉంది.. ఎక్కడ చూసినా మహిళలే ఎక్కువమంది కనిపిస్తున్నారు. ఇలా మహిళలకు పోస్టాఫీసుల దగ్గరకు వెళ్లడానికి కారణాలు ఏంటని ఆరా తీస్తే అసలు విషయం తెలిసింది. ప్రభుత్వ సంక్షేమ పథకాలు తమకు ఎక్కడ రావోననే భయంతోనే వీళ్లంతా పోస్టాఫీసుల దగ్గరకు వెళుతున్నట్లు తేలింది.

ఇప్పటి వరకూ బ్యాంకుల్లో సేవింగ్ అకౌంట్స్ (పొదుపు ఖాతాలు) లేని వారు.. ఒకవేళ ఉన్నా ఆధార్‌ అనుసంధానం చేయక ప్రభుత్వం అందించే సంక్షేమ ఫలాలు అందుకోలేకపోతున్న వారు సమీపంలోని పోస్టాఫీసుల దగ్గర అకౌంట్లు తెరవాలని ఆదేశాలు వచ్చాయని మహిళలు చెబుతున్నారు. ఈ ప్రచారంతోనే వీళ్లంతా పెద్ద సంఖ్యలో పోస్టాఫీసులకు వెళుతున్నట్లు తేలింది. ఇప్పటికే పోస్టాఫీసుల్లో ఖాతాలు ఉంటే.. ఎన్‌పీసీఐ (జాతీయ చెల్లింపుల సంస్థ)తో అనుసంధానం చేసుకోవాలన్న సూచనతో ఇలా వెళ్లారంటున్నారు. ఇప్పటికే బ్యాంకుల్లో అకౌంట్‌లు ఉన్నవారు కూడా.. ఈ విషయంలో కొందరు చేస్తున్న దుష్ప్రచారం కారణంగా పోస్టాఫీసుల్లో ఖాతాలు తెరిచేందుకు వెళుతున్నారు. అందుకే పోస్టాఫీసుల దగ్గర మహిళలతో రద్దీ కనిపిస్తోంది.

రాజమహేంద్రవరంలోని మెయిన్ ఫోస్టాఫీసు ఎదుట మహిళలు పెద్దసంఖ్యలో బారులుతీరారు. కర్నూలులో కూడా ఇదే పరిస్థితి కనిపించింది. రూ.200తో పోస్టాఫీసు ఖాతా తెరిచేందుకు పిల్లలతో సహా వచ్చి ఉదయం నుంచి సాయంత్రం వరకు అక్కడే ఉన్నారు. ఇప్పటికే బ్యాంకుల్లో అకౌంట్‌లు ఉండి.. సంక్షేమ పథకాల కింద సాయం అందుకుంటున్న వారికి అధికారులు కీలక సూచనలు చేశారు. వీరు మళ్లీ కొత్తగా పోస్టాఫీసుల్లో ఖాతాలు తెరవాల్సిన అవసరం లేదని చెబుతున్నారు. రాష్ట్రవ్యాప్తంగా లక్ష మంది మాత్రమే తపాలా కార్యాలయాల్లో ఖాతాలు తెరవాల్సిన వారు ఉంటారని అంచనా వేస్తున్నారు. మహిళలు ఎవరూ కంగారుపడొద్దని అధికారులు సూచిస్తున్నారు.

అలాగే మరో ప్రచారం కూడా జరుగుతోందట.. కూటమి ప్రభుత్వం ఎన్నికల సమయంలో ఇచ్చిన హామీ మేరకు.. 18 ఏళ్లు పైబడిన మహిళలందరి వ్యక్తిగత ఖాతాల్లో ఏపీ ప్రభుత్వం రూ.1,500 జమ చేస్తారని కొందరు ప్రచారం చేశారట. ఒకవేళ తమకు పోస్టాఫీస్‌లో ఖాతా లేకపోతే ఆ డబ్బులు రావనే భయంతోనే పోస్టాఫీసులకు వెళుతున్నారని చెబుతున్నారు. ఉమ్మడి అనంతపురం జిల్లాలో అయితే మహిళలు నాలుగు రోజులుగా పోస్టాఫీసుల దగ్గరకు క్యూ కట్టారట. గత నాలుగైదు రోజులుగా ఇదే పరిస్థితి కనిపిస్తోంది అంటున్నారు. విజయవాడలో కూడా ఇదే పరిస్థితి కనిపిస్తోంది.. స్థానిక బకింగ్‌హాంపేటలోని పోస్టాఫీస్‌ లోపల అకౌంట్లతో పాటు ఆధార్‌ అప్‌డేట్ల కోసం మహిళలు భారీగా తరలివచ్చారు. అధికారులు మాత్రం రాష్ట్ర ప్రభుత్వం అందించే పథకాలకు సంబంధించి తాము ఎలాంటి ప్రకటన చేయలేదు అంటున్నారు.