భవనంపై నుంచి కిందపడి జంట మృతి.. 3 నెలలుగా సహజీవనం

విశాఖపట్నం గాజువాక ప్రాంతంలో ఓ జంట బిల్డింగ్ పై నుంచి పడి చనిపోవడం కలకలం రేపింది. షీలా నగర్ వెంకటేశ్వర కాలనీ 8B ఎస్‌ఎల్‌బీ నాయక్ ఎన్‌క్లేవ్ అపార్ట్మెంట్ మూడో ఫ్లోర్ నుంచి ఇద్దరు దూకేశారు. యువకుడ్ని పిల్లా దుర్గారావుగా గుర్తించారు.. ఆయన రంగా కేటరింగ్ నిర్వహిస్తున్నట్లు తెలుస్తోంది. చనిపోయిన యువతిని నూకల సాయి సుస్మితగా గుర్తించారు.. ఆమె సాఫ్ట్‌వేర్ ఉద్యోగం చేస్తున్నారు. దుర్గారావు రంగా క్యాంటీన్ నడుపుతున్నట్లు కాలనీవాసులు చెబుతున్నారు. సమాచారం అందుకున్న పోలీసులు వెంటనే ఘటనా స్థలానికి చేరుకుని పరిశీలించారు.

దుర్గరావు, సాయి సుస్మితలది డాక్టర్ బీఆర్ అంబేద్కర్ కోనసీమ జిల్లా అమలాపురం అని పోలీసులు తెలిపారు. గత మూడు నెలలుగా వీరిద్దరు సహజీవనం చేస్తున్నారని ప్రాథమిక విచారణలో తేలిందన్నారు. ఈ ఘటనకు ముందు వారు ఉంటున్న ఇంట్లో ఏదైనా వాగ్వాదం జరిగిందా అని ఆరా తీశామన్నారు. అక్కడ టీవీ రిమోట్, గాజు గ్లాస్ పగిలినట్లు గుర్తించామని.. డాగ్ స్క్వాడ్, క్లూస్ టీమ్‌లతో ఆధారాలు సేకరిస్తున్నామన్నారు. దుర్గారావు, సుస్మితల బంధువులకు సమాచారం ఇస్తున్నామన్నారు. సుస్మిత కుటుంబసభ్యులకు సమాచారం అందించామని.. దుర్గారావు కుటుంబసభ్యులను సంప్రదించే పనిలో ఉన్నామన్నారు. ఘటనకు సంబంధించిన పూర్తి వివరాలు తెలియాల్సి ఉంది. పోలీసులు కేసు నమోదు చేసి దర్యాప్తు చేస్తున్నారు.

విశాఖపట్నంలో కారు డ్రైవర్‌ విధులకు వెళ్లి తిరిగి ఇంటికి రాలేదు.. ఆ తర్వాత అతడు చనిపోయాడని తెలుసుకుని కుటుంబ సభ్యులు షాకయ్యారు. రాఘవ ట్రావెల్స్‌కు చెందిన కారు డ్రైవర్‌ రమణ ఏడాదిన్నర నుంచి కోరమాండల్‌లో పనిచేస్తున్నాడు. ఈనెల 1న ఉదయాన్నే విధులకు వెళ్లిన రమణ ఫోన్‌ సిచ్ఛాఫ్‌ వచ్చింది. అతడి కోసం గాలిస్తుండగా.. తెల్లవారుజామున కంపెనీకి సముద్రనీరు వచ్చే కాలువ దగ్గర కంపెనీ సంపులో మృతదేహం కనిపించింది. ఆ పక్కనే వాష్‌రూమ్స్ ఉండటంతో అక్కడికి వెళ్లి కాలుజారి పడ్డాడా, లేక సంపుపై స్లాబులు బలహీనంగా ఉండి విరిగిపోయి పడ్డాడా అని అనుమానం వ్యక్తం చేస్తున్నారు.

సమాచారం అందుకున్న పోలీసులు తెల్లవారు 3.30 గంటలకు చేరుకుని మృతదేహాన్ని కేజీహెచ్‌కు తరలించారు. మృతుడికి భార్య సత్యవతి.. ఇద్దరు కూతుర్లు ఉన్నారు. అయితే మరణ కుటుంబసభ్యులు, కోరమాండల్‌ కాంట్రాక్టు వర్కర్స్‌ యూనియన్‌ సంస్థ గేటు దగ్గర ఆందోళనకు దిగారు.. రమణకు పరిహారం చెల్లించాలని డిమాండ్ చేశారు.