డ్రగ్స్ పేరుతో చేసిన హైడ్రామా సృష్టికర్తలు బయటికి రావాలి
Andhra Pradesh Telugu | Suryaa Desk | Published : Tue, Dec 10, 2024, 07:10 PM
బ్రెజిల్ నుంచి డ్రగ్స్ అంటూ నాడు హంగామా చేశారని శాసనమండలి ప్రతిపక్షనేత బొత్స సత్యానారాయణ తప్పుపట్టారు. కంటైనర్లను సీజ్ చేసి, అరెస్టులు చేశారు. ఇప్పుడు దర్యాప్తులో డ్రగ్స్ లేవు అంటూ సిబిఐ నిర్ధారించిందని మండిపడ్డారు. విశాఖతీరానికి డ్రగ్స్ వచ్చాయంటూ తప్పుడు ఆరోపణలు చేసిన దర్యాప్తు సంస్థలపై చర్య తీసుకోవాలని కోరుతూ దేశ ప్రధాని, హోమంత్రిని కలుస్తున్నట్లు బొత్స సత్యనారాయణ ప్రకటించారు. విశాఖపట్నంలోని క్యాంప్ కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ.. ఈ రాష్ట్ర ప్రతిష్టను దెబ్బతీసేలా డ్రగ్స్ పేరుతో చేసిన హైడ్రామా వెనుక ఉన్న వ్యక్తులు ఎవరో బయటకు రావాలని అన్నారు. రాజకీయ కక్షసాధింపుకు దర్యాప్తు సంస్థలను పావులుగా వాడుకున్నారని, ఆయా సంస్థలపైన విచారణ జరిగితేనే ఈ మొత్తం వ్యవహారంలో వాస్తవాలు వెలుగుచూస్తాయని అన్నారు. ప్రధాని, హోంమంత్రులు సమయం ఇవ్వకపోతే వారి కార్యాలయాలకు లేఖలు రాస్తానని ఆయన స్పష్టం చేశారు.
|
|