ఇది మిలియన్ డాలర్ల ప్రేమ.. ట్రంప్‌కు మార్క్ జుకర్‌బర్గ్ భారీ విరాళం

ఇటీవలే అగ్రరాజ్యం అమెరికాలో జరిగిన ఎన్నికల్లో గెలిచిన డొనాల్డ్ ట్రంప్.. మరికొద్ది రోజుల్లోనే అధికార పీఠం ఎక్కబోతున్నారు. రెండోసారి అగ్రరాజ్య అధ్యక్షుడిగా అమెరికాను ఏలబోతున్నారు. దీంతో ఆయనకు గతంలో విపరీతమైన కోపం తెప్పించిన వాళ్లు.. ఇప్పుడు ప్రేమను పంచుతున్నారు. ఆయన సంతోషంగా ఉండేలా చేస్తున్నారు. అలాంటి వాళ్లలో ఒకరే మెటా సంస్థ సీఈఓ మార్క్ జుకర్‌బర్గ్. తాజాగా ఈయన ట్రంప్ మెప్పు పొందేందుకు ట్రంప్ పరిపాలనా నిధికి 1 మిలియన్ డాలర్ల విరాళాన్ని అందజేశారు. దీంతో చాలా మంది షాక్ అవుతున్నారు.

2020లో అమెరికా ఎన్నికలు జరిగినప్పుడు డొనాల్డ్ ట్రంప్ ఫేస్‌బుక్ అధినేత మార్క్ జుకర్‌బర్గ్‌పై తీవ్ర ఆగ్రహం వ్యక్తం చేశారు. ముఖ్యంగా ఫేస్‌బుక్ పాలసీలను మారుస్తూ.. తన ప్రత్యర్థులకు సహాయం చేసి తనపై కుట్ర పన్నారని ఆరోపించారు. 2024 ఎన్నికల్లో కూడా మార్క్ జుకర్‌బర్గ్ ఇలాగే నడుచుకుంటే ఆయన జీవితాంతం జైల్లో ఉండక తప్పదని కూడా అప్పట్లో ట్రంప్ వ్యాఖ్యానించారు. అంతేకాకుండా 2021లో క్యాపిటల్ భవనంపై దాడి తర్వాత ట్రంప్ ఇన్‌స్టాగ్రామ్, ఫేస్‌బుక్ అకౌంట్లపై నిషేధం విధించారు. అప్పుడు కూడా ట్రంప్ కావాలనే తనపై కక్ష సాధిస్తున్నారని తెలిపారు.

ఇక అప్పటి నుంచి వీరిద్దరి మధ్య సత్సంబంధాలు లేకుండా పోయాయి. ఆ తర్వాత కొంత కాలానికి ట్రంప్ అకౌంట్లను పునరుద్ధరించారు. భవిష్యత్తులో ఉల్లంఘనలకు పాల్పడితే మళ్లీ నిషేధం విధిస్తామని కూడా మార్క్ జుకర్‌బర్గ్ తెలిపారు. కానీ తాజాగా మెటా సంస్థ సీఈఓ మార్క్ జుకర్‌బర్గ్.. ట్రంప్‌ను కలిశారు. నేరుగా ఆయన ఇంటికి వెళ్లి మరీ భేటీ అయ్యారు. ఈక్రమంలోనే వీరిద్దరూ కలిసి విందులో పాల్గొన్నారు. ఇది చూసిన ప్రతీ ఒక్కరూ షాక్ అవుతున్నారు. అసలు వీరిద్దరి మధ్య స్నేహం ఎప్పుడు బలపడిందని ఆలోచిస్తున్నారు. అలాగే మార్క్ జుకర్‌బర్గ్ ట్రంప్‌ను కలవడానికి ఏదో పెద్ద కారణమే ఉందని అనుకుంటున్నారు.

అదే నిజం అన్నట్లుగా అక్కడి మీడియా సంస్థలు.. ట్రంప్ పాలక వర్గంలో తీసుకువచ్చే టెక్ విధానాలు మెటాకు అనుకూలంగా ఉండాలని కోరినట్లు చెబుతున్నాయి. అందుకోసమే ట్రంప్ పరిపాలనా నిధికి 1 మిలియన్ డాలర్లు అందజేసినట్లు కూడా వివరిస్తున్నాయి. ఇందులో నిజం ఎంత ఉందో తెలియదు కానీ.. ట్రంప్‌పై మార్క్ జుకర్‌బర్గ్ చూపిస్తున్న ప్రేమకు అంతా ఫిదా అవుతున్నారు. వీరిద్దరి స్నేహం ముందు ముందు కూడా ఇలాగే కొనసాగుతుందా లేదో చూడాలని ఉందంటున్నారు. అలాగే భవిష్యత్తులో ట్రంప్ అధికారం కోల్పోతే మార్క్ జుకర్‌బర్గ్ కూడా స్నేహాన్ని కొనసాగిస్తాడా లేదా అని చూడాలని ఉందంటూ నెటిజెన్లు కామెంట్లు చేస్తున్నారు.