కెరీర్‌లో 45 సెంచరీలు.. భారత్‌పైనే 15.. గబ్బా టెస్టుతో ఫామ్‌లోకి వచ్చిన స్టీవ్‌ స్మిత్‌

ఆస్ట్రేలియా స్టార్ బ్యాటర్‌ స్టీవ్‌ స్మిత్‌ ఎట్టకేలకు ఫామ్‌లోకి వచ్చాడు. సుమారు ఏడాదిన్నరగా ఆశించిన మేర రాణించలేకపోతున్న ఈ బ్యాటర్‌ బోర్డర్ గవాస్కర్ ట్రోఫీలో భాగంగా గబ్బాలో జరుగుతున్న మూడో టెస్టులో మూడంకెల మార్కు అందుకున్నాడు. 18 నెలల తర్వాత సుదీర్ఘ ఫార్మాట్‌లో ఈ ఫీట్‌ సాధించాడు. ఈ క్రమంలోనే ఒక్క సెంచరీతోనే పలు రికార్డులను స్టీవ్ స్మిత్ బద్దలు కొట్టాడు.

గబ్బా టెస్టు తొలి ఇన్నింగ్స్‌లో స్మిత్ 101 పరుగులు చేశాడు. టెస్టు క్రికెట్‌లో అతడికి ఇది 33వ సెంచరీ కాగా.. ఓవరాల్‌గా 45వ సెంచరీ కావడం గమనార్హం. ఈ క్రమంలోనే ఓ రికార్డును అతడు బ్రేక్‌ చేశాడు. భారత్‌పై అత్యధిక సార్లు శతకాలు సాధించిన ప్లేయర్‌గా నిలిచాడు. స్మిత్‌ 15 సెంచరీలు భారత్‌పైనే చేయడం గమనార్హం. ఈ జాబితాలో రికీ పాంటింగ్‌ (14 సెంచరీలు), జో రూట్ (13)లు తర్వాతి స్థానాల్లో ఉన్నారు.

టెస్టుల్లో భారత్‌పై అత్యధిక సెంచరీలు చేసిన ఆటగాడిగా జో రూట్‌ (10 సెంచరీలు) పేరిట ఉన్న రికార్డును స్మిత్ సమం చేశాడు. గబ్బా టెస్టు సెంచరీతో భారత్‌పై టెస్టులలో అతడి శతకాల సంఖ్య 10కి చేరింది. ఈ జాబితాలో గ్యారీ సోబర్స్ (8), వివ్ రిచర్డ్స్‌ (8), రికీ పాంటింగ్ (8) తర్వాతి స్థానాల్లో ఉన్నారు. ఇదే సమయంలో భారత్, ఆస్ట్రేలియా జట్ల మధ్య టెస్టుల్లో అత్యధిక సెంచరీలు (10) చేసిన రెండో ఆటగాడిగా స్మిత్ నిలిచాడు. భారత క్రికెట్ దిగ్గజం సచిన్ టెండూల్కర్‌ (11) అగ్రస్థానంలో ఉన్నాడు.

ఆస్ట్రేలియా తరపున అత్యధిక పరుగులు చేసిన ఆరో బ్యాటర్‌గా కూడా స్టీవ్ స్మిత్‌ నిలిచాడు. మార్క్‌వాను అధిగమించాడు. ఆస్ట్రేలియా మాజీ కెప్టెన్‌ మార్క్‌వా.. 372 అంతర్జాతీయ మ్యాచ్‌లలో 40.51 సగటుతో 16,529 పరుగులు చేశాడు. అందులో 38 సెంచరీలు, 97 హాఫ్ సెంచరీలు ఉన్నాయి. ఇక స్మిత్‌ 344 అంతర్జాతీయ మ్యాచ్‌ల్లోనే మార్క్‌వా పరుగులను అధిగమించాడు. స్టీవ్‌ స్మిత్‌ 47.58 సగటుతో 16,561 పరుగులు చేశాడు. ఇందులో 45 సెంచరీలు, 80 హాఫ్‌ సెంచరీలు ఉండటం గమనార్హం.

ఈ మ్యాచ్‌కు ముందు వరకూ.. గత 25 ఇన్నింగ్స్‌లలో స్మిత్.. మూడంకెల పరుగులు చేయకుండానే ఔట్‌ అయ్యాడు. అతడు క్రికెట్‌లోకి అడుగుపెట్టినప్పటి నుంచి ఇంతకాలం సెంచరీ కోసం వెయిట్ చేయడం ఇదే తొలిసారి. ట్రావిస్ హెడ్, స్టీవ్ స్మిత్ సెంచరీలతో చెలరేగడంతో గబ్బా టెస్టు తొలి ఇన్నింగ్స్‌లో ఆస్ట్రేలియా భారీ స్కోరు దిశగా సాగుతోంది. రెండో రోజు ఆట ముగిసే సమయానికి ఆస్ట్రేలియా 7 వికెట్ల నష్టానికి 405 పరుగులతో నిలిచింది.