ఒకటికన్నా ఎక్కువ 'బ్యాంకు ఖాతాలు' ఉంటే.. ఆర్బీఐ పెనాల్టీలు విధిస్తుందా

మన దేశంలో ఒకటి కన్నా ఎక్కువ బ్యాంక్ అకౌంట్లు కలిగి ఉండడం చట్టరీత్య నేరమా? మీరు ఒకటికి మించి బ్యాంక్ అకౌంట్లు ఓపెన్ చేయడానికి లేదా? వేరు వేరు బ్యాంకుల్లో లేదా ఒకే బ్యాంకులో మల్టిపుల్ బ్యాంక్ అకౌంట్లు కలిగి ఉంటే రిజర్వ్ బ్యాంక్ ఆఫ్ ఇండియా కొత్త నిబంధలన ప్రకారం పెనాల్టీలు పడతాయనే వార్తలు ప్రస్తుతం సోషల్ మీడియాల్లో చక్కర్లు కొడుతున్నాయి. దీంతో ఇలా వేరు వేరు కారణాలతో రెండు, మూడు బ్యాంకు అకౌంట్లు తెరవాల్సి వచ్చిన వారు ఆందోళన చెందుతున్నారు. మరి నిజంగానే ఆర్‌బీఐ పెనాల్టీలు విధిస్తుందా? అకౌంట్లు ఎక్కువగా ఉంటే పరిస్థితి ఏంటి? అనే విషయాలు తెలుసుకుందాం.

సోషల్ మీడియా వార్తలను చూసి మీరు ఆందోళన చెందాల్సిన అవసరం లేదు. అవన్నీ తప్పుడు వార్తలు. ఒకటికి మించి బ్యాంకు ఖాతాలు ఉన్నప్పటికీ రిజర్వ్ బ్యాంక్ ఎలాంటి పెనాల్టీలు విధించడం లేదు. దీనికి సంబంధించి ఎలాంటి రూల్స్ జారీ చేయలేదు. ఈ మేరకు గతంలోనే ప్రెస్ ఇన్ఫర్మేషన్ బ్యూరో ఫేక్ న్యూస్ అలర్ట్ జారీ చేసింది. సోషల్ మీడియా ఎక్స్ వేదికగా ఓ పోస్ట్ చేసింది. వేరు వేరు బ్యాంకుల్లో మల్టిపుల్ బ్యాంక్ ఖాతాలు ఉన్నవారిపై పెనాల్టీలు విధించాలంటూ రిజర్వ్ బ్యాంక్ ఎలాంటి మార్గదర్శకాలు జారీ చేయాలేదని స్పష్టం చేసింది. అలాంటి తప్పుడు వార్తల పట్ల జాగ్రత్తగా ఉండాలని సూచించింది.

మరోవైపు.. మన దేశంలో ఒక వ్యక్తి లేదా కుటుంబం ఎన్ని బ్యాంకు ఖాతాలు కలిగి ఉండాలి అనే దానిపై ఎలాంటి పరిమితులు లేవు. అవసరాన్ని బట్టి ఎన్ని ఖాతాలైనే తెరవవచ్చు. ఒకే బ్యాంకులోనూ రెండు, మూడు పొదుపు ఖాతాలు ఒకే వ్యక్తి పేరుపైనా ఓపెన్ చేసి నిర్వహించుకోవచ్చు. అయితే, బ్యాంకు నిబంధనలకు లోబడి ఉండాలి. మల్టిపుల్ బ్యాంక్ ఖాతాలు కలిగి ఉండడం వల్ల కొన్ని లాభాలు ఉన్నప్పటికీ నష్టాలు ఎక్కువగా ఉంటాయని మార్కెట్ నిపుణులు సూచిస్తున్నారు. ప్రజలు గరిష్ఠంగా 2 లేదా 3 బ్యాంక్ ఖాతాల కన్నా ఎక్కువగా ఉంచుకోకూడదని చెబుతున్నారు. ఎలాంటి అవసరం లేకున్నా ఎక్కువ బ్యాంక్ ఖాతాలు ఉండడం వల్ల వాటిని నిర్వహించడం క్లిష్టంగా మారుతుందని హెచ్చరిస్తున్నారు. అలాగే ప్రతి ఖాతాల కనీస బ్యాలెన్స్ మెయింటెన్ చేయాల్సి ఉంటుంది. ఒక వేళ కనీస బ్యాలెన్స్ లేనట్లయితే పెనాల్టీలు కట్టాల్సి వస్తుంది.