లోక్‌సభలో తొలిసారి అడుగుపెట్టిన ప్రియాంక గాంధీకి అరుదైన అవకాశం.. జమిలి ఎన్నికల జేపీసీలో చోటు

ప్రస్తుతం దేశంలో ఒకే దేశం ఒకే ఎన్నికకు సంబంధించి తీవ్ర చర్చనీయాంశంగా మారింది. ఎప్పటి నుంచో బీజేపీ మేనిఫేస్టోలో ఉన్న ఈ జమిలి ఎన్నికల హామీని అమలు చేసేందుకు గాను.. మంగళవారం లోక్‌సభ ముందుకు ఒకే దేశం ఒకే ఎన్నిక బిల్లును తీసుకువచ్చింది. అయితే ప్రతిపక్షాల డిమాండ్ల మధ్య ఈ జమిలి ఎన్నికల బిల్లును జాయింట్ పార్లమెంటరీ కమిటీకి పంపించింది. ఇక ఈ జేపీసీలో మొత్తం 31 మంది రెండు సభల ఎంపీలు ఉంటారని కేంద్ర ప్రభుత్వం వెల్లడించింది. ఈ క్రమంలోనే జేపీసీకి సంబంధించి డెడ్‌లైన్ కూడా వెల్లడించింది.

అయితే జమిలి బిల్లును పంపిన జేపీసీలో మొత్తం 31 మంది సభ్యులు ఉండగా.. అందులో 21 మంది లోక్‌సభ ఎంపీలు.. 10 మంది రాజ్యసభ ఎంపీలు ఉంటారని లోక్‌సభ స్పీకర్ తెలిపారు. ఈ క్రమంలోనే జేపీసీలో కాంగ్రెస్ పార్టీ తరఫున ఎవరెవరు ఉంటారు అనేది సంబంధిత వర్గాల ద్వారా లీకులు బయటికి వచ్చాయి. ఇందులో కాంగ్రెస్‌ పార్టీ అగ్రనేత, వయనాడ్‌ ఎంపీ ప్రియాంక గాంధీ వాద్రా కూడా ఉన్నట్లు సమాచారం. అంతేకాకుండా హస్తం పార్టీ నుంచి ప్రియాంక గాంధీ వాద్రా కాకుండా మనీష్ తివారీ, రణ్‌దీప్‌ సూర్జేవాలా, సుఖ్‌దేవ్‌ భగత్‌ పేర్లు కూడా పరిశీలనలో ఉన్నట్లు తెలుస్తోంది. మరోవైపు.. ఈ జేపీసీలో తృణముల్ కాంగ్రెస్ పార్టీ.. కల్యాణ్‌ బెనర్జీ, సాకేత్‌ గోఖలేల పేర్లను ప్రతిపాదించినట్లు సమాచారం.

బీజేపీ నుంచి ఎంపీలు రవిశంకర్ ప్రసాద్, నిషికాంత్ దుబే పేర్లును ప్యానెల్ సభ్యులుగా నిర్ణయించినట్లు తెలుస్తోంది. వీరితోపాటు షిండే శివసేన పార్టీ నుంచి ఏక్‌నాథ్ షిండే కుమారుడు శ్రీకాంత్ షిండే.. జేడీయూ నుంచి సంజయ్ ఝా, డీఎంకే తరఫున టీఎం సెల్వగణపతి, పీ విల్స్న్ ఉన్నట్లు సమాచారం. దేశవ్యాప్తంగా లోక్‌సభ, అసెంబ్లీ ఎన్నికలను ఒకేసారి నిర్వహించేందుకు గానూ 129వ రాజ్యాంగ సవరణ బిల్లును కేంద్ర ప్రభుత్వం ఇటీవల లోక్‌సభలో ప్రవేశపెట్టింది. దీనిపై 90 నిమిషాల చర్చ జరిగింది.

ఆ తర్వాత ఆ బిల్లుకు ఓటింగ్‌ నిర్వహించగా.. ఆ బిల్లుకు అనుకూలంగా 269 మంది ఎంపీలు.. వ్యతిరేకంగా 198 మంది సభ్యులు ఓటు వేశారు. మొత్తం 360 మంది సభ్యులు ఎలక్ట్రానిక్ ఓటింగ్‌లో పాల్గొనగా మిగితా వారు బ్యాలెట్ పేపర్ ద్వారా ఓటు వేశారు. దీంతో బిల్లును ప్రవేశపెట్టడానికి స్పీకర్‌ ఓం బిర్లా ఆమోదం తెలిపారు. ఈ జమిలి ఎన్నికల బిల్లు రాజ్యాంగ విరుద్ధం అంటూ కాంగ్రెస్ సహా ఇండియా కూటమి నేతలు తీవ్రంగా వ్యతిరేకించాయి. ఇది భారత రాజ్యాంగ మూల స్వరూపానికి భంగం కలిగించేలా ఉన్నందున.. దాన్ని జేపీసీకి పంపాలని డిమాండ్‌ చేయడంతో జేపీసీకి పంపించారు.