పరిటాల రవి హత్య కేసు నిందితులకు బెయిల్.. 18 ఏళ్ల తర్వాత జైలు నుంచి

టీడీపీ నేత, మాజీ మంత్రి పరిటాల రవి హత్య కేసులో నిందితులుగా ఉన్న ఐదుగురికి బెయిల్ మంజూరైంది. పరిటాల రవి హత్య కేసు నిందితులకు ఆంధ్రప్రదేశ్ హైకోర్టు బుధవారం షరతులతో కూడిన బెయిల్ మంజూరు చేసింది. పరిటాల రవి హత్య కేసులో ఏ3గా ఉన్న పండుగ నారాయణరెడ్డి, ఏ4 రేఖమయ్య, ఏ5 బజన రంగనాయకులు, ఏ6 వడ్డే కొండ, ఏ8 ఓబిరెడ్డికి బెయిల్ మంజూరు చేస్తూ ఆంధ్రప్రదేశ్ హైకోర్టు ఉత్తర్వులు జారీ చేసింది. రూ.25 వేల చొప్పున రెండు పూచీకత్తులను సమర్పించాలని ఆదేశించింది. అలాగే నిందితులు ప్రతి సోమవారం పోలీస్ స్టేషన్‌లో హాజరు కావాలని ఉత్తర్వుల్లో స్పష్టం చేసింది. సోమవారం ఉదయం 11 గంటలకల్లా స్టేషన్ హౌజ్ ఆఫీసర్ ఎదుట హాజరు కావాలని స్పష్టం చేసింది. చట్టానికి లోబడి వ్యవహరించాలని.. చట్ట వ్యతిరేకంగా వ్యవహరిస్తే బెయిల్ రద్దు చేస్తామని ఏపీ హైకోర్టు స్పష్టం చేసింది.

2005లో జరిగిన పరిటాల రవి హత్య అప్పట్లో ఉమ్మడి ఆంధ్రప్రదేశ్ వ్యాప్తంగా సంచలనం రేపిన సంగతి తెలిసిందే. ఈ కేసులో నిందితులుగా ఉన్న ఈ ఐదుగురికి కింది కోర్టు శిక్ష విధించింది. గత 18 ఏళ్లుగా జైళ్లోనే ఉన్నారు. అయితే కింది కోర్టు తీర్పుపై హైకోర్టులో అప్పీల్ చేశారు. అలాగే బెయిల్ కోరుతూ పిటిషన్లు దాఖలు చేశారు. ఈ పిటిషన్లను విచారించిన హైకోర్టు షరతులతో కూడిన బెయిల్ మంజూరు చేసింది. పరిటాల రవి హత్య కేసులో మొద్దు శీను అనే షూటర్ అరెస్ట్ కావటంతో తెలిసిన సంగతే. తన బావ సూరి కళ్లలో ఆనందం చూడటం కోసమే పరిటాల రవిని కాల్చానంటూ అప్పట్లో మొద్దు శీను మీడియా ముఖంగా ప్రకటించటం కూడా సంచలనం రేపింది.

పరిటాల హత్యక కేసులో అరెస్టైన మొద్దు శీను అలియాస్ జూలకంటి శ్రీనివాస్ రెడ్డిని 2008లో మల్లెల ఓం ప్రకాశ్ అనే ఖైదీ జైళ్లో హత్య చేశారు. మొద్దు శీను నిద్రపోతున్న సమయంలో తలపై డంబెల్‌తో బాది హత్య చేశాడు. ఆ తర్వాత ఓం ప్రకాశ్ సైతం 2020లో అనారోగ్యంతో చనిపోయాడు. ఇక పరిటాల రవి హత్య కేసులో ప్రధాన నిందితుడు మద్దెల చెరువు సూరి అలియాస్ గంగుల సూర్యనారాయణరెడ్డి సైతం హత్యకు గురయ్యారు. భానుకిరణ్ అనే వ్యక్తి మద్దెల చెరువు సూరిని కాల్చి చంపారు. అనంతరం భానుకిరణ్‌ను పోలీసులు అరెస్ట్ చేసి జైలుకు తరలించారు. ఇటీవలే సుమారుగా నెలరోజుల క్రిందట మద్దెల చెరువు సూరి హత్య కేసు నిందితుడు భానుకిరణ్ కూడా జైలు నుంచి బెయిల్ మీద విడుదలయ్యారు.