వాట్సాప్‌లో పెగాసస్ స్పైవేర్.. ఇజ్రాయేల్ సంస్థకు షాక్.. కోర్టు సంచలన తీర్పు

ఇజ్రాయేల్‌కు చెందిన ఎన్ఎస్ఓ గ్రూప్.. వాట్సాప్‌లో అనధికారికంగా పెగాసిస్ సాఫ్ట్‌వేర్‌ను ఇన్‌స్టాల్ చేయడానికి తమ యాప్‌లోని బగ్‌ను ఉపయోగించుకుందని ఆరోపిస్తూ మెటా వేసిన కేసులో అమెరికా కోర్టు శుక్రవారం తీర్పు వెలువరించింది. వాట్సాప్ విషయంలో దాని మాతృ సంస్థ వేసిన దావాపై విచారణ జరిపిన కాలిఫోర్నియా ఓక్‌లాండ్‌లోని యూఎస్ డిస్ట్రిక్ట్ జడ్జి ఫిలిస్ హామిల్టన్....ఎన్ఎస్ఓ గ్రూప్ హ్యాకింగ్‌కు పాల్పడి, ఒప్పందాన్ని ఉల్లంఘించిందని నిర్ధారించారు. ఈ కేసులో ఇకపై నష్టపరిహారం గురించి మాత్రమే విచారణ జరుగుతుందని న్యాయమూర్తి పేర్కొన్నారు. కాగా, ఈ అంశంపై స్పందించడానికి ఎన్ఎస్ఓ మాత్రం నిరాకరించింది.

తీర్పుపై వాట్సాప్ చీఫ్ విల్ కాథ్‌కార్ట్ స్పందిస్తూ.. ఇది గోప్యతకు దక్కిన విజయమని అన్నారు. ఈ కేసులో తాము ఐదేళ్ల పాటు పోరాటం చేశామని చెప్పారు. స్పైవేర్ కంపెనీలు చట్టవిరుద్ధమైన చర్యలకు జవాబుదారీగా ఉండవని మేము బలవంగా విశ్వసించామని, మా వాదనలను సమర్పించడానికి ఐదేళ్లు పట్టిందని ఆయన అన్నారు. అటు, సైబర్ సెక్యూరిటీ నిపుణులు సైతం స్వాగతించారు.

కెనడా ఇంటర్నెట్ వాచ్‌డాగ్ సిటిజన్ ల్యాబ్ సీనియర్ రిసెర్చర్ జాన్ స్కాట్ రైల్టన్ మాట్లాడుతూ.. ఇది స్పైవేర్ పరిశ్రమలకు చెంపపెట్టులాంటి చారిత్రాత్మక తీర్పుని వ్యాఖ్యానించారు. హ్యాకింగ్ టూల్స్‌తో ఏమి చేసినా తమ బాధ్యత కాదని వాదిస్తున్నారని, తాజా తీర్పు హ్యాకింగ్‌కు ఎన్ఎస్ఓ బాధ్యత వహిస్తుందని స్పష్టం చేస్తోందని వివరించారు

తమ యూజర్ల మొబైల్ ఫోన్లలో పెగాసస్ సాఫ్ట్‌వేర్‌ను ఇన్‌స్టాల్ చేయడానికి అనుమతి లేకుండా ఆరు నెలల ముందు సర్వర్‌లను యాక్సెస్ చేసిందని ఆరోపిస్తూ, 2019లో వాట్సాప్ ఎన్‌ఎస్‌ఓపై కేసు వేసింది.

పెగాసిస్‌ను నిషేధించాలని, నష్టపరిహారం చెల్లించాలని కోరింది. జర్నలిస్టులు, మానవ హక్కుల కార్యకర్తలు, అసమ్మతివాదులతో సహా 1,400 మంది వ్యక్తులపై నిఘా ఉంచేందుకు ఉల్లంఘనకు పాల్పడిందని ఆరోపించింది. అయితే, జాతీయ భద్రత, నేరాల నుంచి రక్షణ కోసం చట్టబద్ద సంస్థలు, నిఘా వర్గాలకు పెగాసిస్ సాయం చేస్తుందని ఎన్ఎస్ఓ వాదించింది. తమ సాంకేతికత సాయంతో టెర్రరిస్టులు, కరుడగట్టిన నేరస్థుల వంటి సంఘ విద్రోహ శక్తులను పట్టుకోడానికి సహకరిస్తుందని పేర్కొంది.

ఈ అంశంపై ఇమ్యూనిటీకి 2020లో ట్రయల్ కోర్టు నిరాకరించడంతో ఎన్ఎస్ఓ అప్పీల్‌కు వెళ్లింది. అక్కడ కూడా ఎదురుదెబ్బ తగిలింది. శాన్‌ఫ్రాన్సిస్కో 9 యూఎస్ సర్క్యూట్ కోర్టు ఆఫ్ అప్పీల్స్‌ 2021లో కింద కోర్టు తీర్పును సమర్దించింది. కేవలం పెగాసస్‌కు లైసెన్స్ ఇవ్వడం, సాంకేతిక మద్దతును అందించడం వల్ల ఫెడరల్ చట్టం నుంచి రక్షణ పొందలేదని స్పష్టం చేసింది. విచారణ నిలిపివేయాలని ఎన్ఎస్ఓ చేసిన అప్పీల్‌ను అమెరికా సుప్రీంకోర్టు తిరస్కరించింది. దీనిపై ముందుకెళ్లాలని సూచించింది.