ఫాస్టెస్ట్‌ సెంచరీ చేసిన ఐపీఎల్ అన్‌సోల్డ్‌ ప్లేయర్‌.. అరెరే ఫ్రాంఛైజీలు మిస్సయ్యారే.

దేశవాళీ టోర్నీ విజయ్‌ హజారే ట్రోఫీలో పంజాబ్‌ బ్యాటర్‌ అన్మోల్‌ప్రీత్‌ సింగ్‌ చరిత్ర సృష్టించాడు. ఈ సీజన్‌లో టోర్నీలో ప్రారంభ రోజే.. లిస్ట్‌-ఏ క్రికెట్‌ చరిత్రలోనే వేగవంతమైన సెంచరీ కొట్టాడు. అరుణాచల్‌ ప్రదేశ్‌తో జరిగిన మ్యాచ్‌లో పెను విధ్వంసం సృష్టించాడు. వన్డే మ్యాచ్‌లో టీ20 తరహాలో సిక్స్‌లు, ఫోర్లతో దంచికొట్టాడు. ఏకంగా 35 బంతుల్లోనే సెంచరీ సాధించాడు. దీంతో ఈ మ్యాచ్‌లో అరుణాచల్‌ప్రదేశ్‌ను పంజాబ్‌ చిత్తు చేసింది.

ఈ మ్యాచ్‌లో తొలుత బ్యాటింగ్ చేసిన అరుణాచల్ ప్రదేశ్‌ను పంజాబ్ బౌలర్లు తక్కువ స్కోరుకే కట్టడి చేశారు. పంజాబ్ బౌలర్లలో అశ్వని కుమార్, మయాంక్ మార్కండే 3, బల్తేజ్ సింగ్ 2 వికెట్లు పడగొట్టారు. దీంతో అరుణాచల్‌ ప్రదేశ్‌ 48.4 ఓవర్లలో 164 పరుగులకు ఆలౌటైంది. అరుణాచల్‌ ప్రదేశ్‌ బ్యాటర్లలో తెచి నెరి 42 పరుగులతో టాప్‌ స్కోరర్‌గా నిలిచాడు. హార్దిక్‌ వర్మ 38, ప్రిన్స్‌ యాదవ్‌ 23, దేవాన్ష్‌ గుప్త 22 పరుగులు చేశారు.

అనంతరం స్వల్ప లక్ష్యంతో బరిలోకి దిగిన పంజాబ్‌.. రెండో ఓవర్‌లోనే అభిషేక్‌ శర్మ (10) వికెట్‌ను కోల్పోయింది. ఈ దశలో వన్‌డౌన్‌లో బ్యాటింగ్‌కు వచ్చిన అన్మోల్‌ప్రీత్‌ సింగ్‌.. అరుణాచల్ ప్రదేశ్‌ బౌలర్లను చితక్కొట్టాడు. ఫోర్లు, సిక్స్‌లతో చెలరేగిపోయాడు. క్రమంలోనే 35 బంతుల్లోనే సెంచరీ పూర్తి చేసుకున్నాడు. ఈ ఇన్నింగ్స్‌తో లిస్ట్-ఏ క్రికెట్‌లో అత్యంత వేగవంతమైన సెంచరీ చేసిన భారత ఆటగాడిగా నిలిచాడు. అంతకుముందు ఈ రికార్డు టీమిండియా మాజీ బ్యాటర్ యూసుఫ్‌ పఠాన్ పేరిట ఉంది. అతడు 2010లో బరోడా తరఫున మహారాష్ట్రపై 40 బంతుల్లో సెంచరీ కొచ్చాడు.

ఇక ఓవరాల్‌గా చూసుకుంటే.. అన్మోల్‌ప్రీత్‌ సింగ్‌ మూడో వేగవంతమైన సెంచరీ చేశాడు. ఆస్ట్రేలియాకు చెందిన జేక్ ఫ్రేజర్ 29 బంతుల్లో శతక్కొట్టి.. వేగవంతమైన సెంచరీ నమోదు చేశాడు. ఆ తర్వాతి స్థానంలో దక్షిణాఫ్రికాకు చెందిన ఏబీ డివిలియర్స్ ఉన్నాడు. అతడు 31 బంతుల్లోనే మూడంకెల మార్కును అందుకున్నాడు.

కాగా అన్మోల్‌ప్రీత్ సింగ్‌ విధ్వంసంతో పంజాబ్‌ ఒక వికెట్ మాత్రమే కోల్పోయి కేవలం 12.5 ఓవర్లలోనే ఛేదించింది. అన్మోల్‌ప్రీత్ సింగ్‌తో పాటు ప్రభ్‌సిమ్రన్ సింగ్ (35*) కూడా రాణించాడు. కాగా ఐపీఎల్‌ 2025 మెగా వేలంలో అన్మోల్‌ప్రీత్‌ సింగ్‌ అన్‌సోల్డ్‌గా మిగలడం గమనార్హం. దీంతో అతడిని ఎలా వదిలేశామా అని ఫ్రాంఛైజీలు ఆలోచనలో పడ్డాయి.