ఐదేళ్లకే చేతికి డబ్బులు.. రూ. 10 లక్షలపై వడ్డీ ఎంతొస్తుంది? లిస్టులో ఎస్బీఐ, హెచ్‌డీఎఫ్‌సీ

ఉద్యోగానికి రిటైర్మెంట్ ఇచ్చిన తర్వాత ఆర్థిక ఇబ్బందులు అనేవి తప్పవు. నెలనెలా జీతం రాకుంటే.. అంతకుముందులా జీవితం అంత సాఫీగా సాగకపోవచ్చు. అందుకే.. సంపాదించే వయసులోనే ఇతర ఆదాయ వనరుల గురించి ఆలోచించుకోవాలి. డబ్బుల్ని పొదుపు చేసి.. పెట్టుబడులు పెట్టడం కూడా ఇందులో భాగమే. ఇక యువత కాస్త రిస్క్ కోరుకుంటుంది కానీ.. అదే సీనియర్ సిటిజెన్ల విషయానికి వస్తే.. ఎక్కువగా రిస్క్ తీసుకోరు. అందుకే.. ఇక్కడ కేంద్ర ప్రభుత్వ పథకాలు లేదా బ్యాంక్ ఫిక్స్‌డ్ డిపాజిట్లు మంచి ఆప్షన్ అని చెప్పొచ్చు. ఇక్కడ ఎలాంటి రిస్క్ ఫ్యాక్టర్ ఉండదు. నిర్దిష్ట వడ్డీ రేట్ల ప్రకారం రాబడి అంచనా వేస్కోవచ్చు. మార్కెట్‌‌తో ఇక్కడ ఎలాంటి సంబంధం ఉండదని చెప్పొచ్చు.

ఇంకా సాధారణ ప్రజల కంటే సీనియర్ సిటిజెన్లకు వడ్డీ రేట్లు కాస్త అధికంగానే ఉంటాయి. బ్యాంకుల్ని బట్టి వడ్డీ రేట్లు మారుతుంటాయి. మరోవైపు సీనియర్ సిటిజెన్లకు ప్రీ మెచ్యూర్ విత్‌డ్రాయల్ నిబంధనలు కూడా పెద్దగా వర్తించవు. అంటే గడువుకు ముందు డబ్బులు తీసుకుంటే పెనాల్టీ పడకపోవచ్చు. ఇది కూడా బ్యాంకుల్ని బట్టి వేర్వేరుగా ఉంటుంది.

షార్ట్ టర్మ్ డిపాజిట్లతో పోలిస్తే దీర్ఘకాలంలో ఫిక్స్‌డ్ డిపాజిట్లపై వడ్డీ ఎక్కువ ఉంటుంది. ఇంకా ఐదేళ్ల ఫిక్స్‌డ్ డిపాజిట్ విషయానికి వస్తే.. ఇక్కడ పెట్టుబడులపై పాత పన్ను విధానంలో భారీగా పన్ను మినహాయింపు పొందొచ్చు. ఆర్థిక సంవత్సరంలో గరిష్టంగా రూ. 1.50 లక్షల వరకు ఆదా చేసుకునే వెసులుబాటు ఉంటుంది. ఇప్పుడు ఐదేళ్ల డిపాజిట్ వడ్డీ రేట్లు ఏ బ్యాంకులో ఎలా.. రూ. 10 లక్షలు జమ చేస్తే ఎంతొస్తుందో తెలుసుకుందాం.

ప్రముఖ ప్రైవేట్ బ్యాంక్.. యెస్ బ్యాంకులో సీనియర్ సిటిజెన్లకు ఐదేళ్ల ఎఫ్‌డీపై వడ్డీ రేటు 8 శాతంగా ఉంది. ఇక్కడ 10 లక్షలు డిపాజిట్ చేస్తే.. మెచ్యూరిటీకి రూ. 3,95,179 వడ్డీ వస్తుంది. డీసీబీ బ్యాంకులో వడ్డీ రేటు 7.90 శాతంగా ఉంది. ఇక్కడ రూ. 3,90,238 వడ్డీ వస్తుంది. యాక్సిస్ బ్యాంక్, ఫెడరల్ బ్యాంకు, ఇండస్‌ఇండ్ బ్యాంకుల్లో ఐదేళ్ల డిపాజిట్‌పై సీనియర్లకు వడ్డీ రేట్లు 7.75 శాతం చొప్పున ఉండగా.. రూ. 10 లక్షలు జమ చేస్తే.. వడ్డీ ఐదేళ్లకు రూ. 3,82,817 వస్తుంది. ఆర్బీఎల్ బ్యాంకులో 7.6 శాతంగా ఉండగా.. ఇక్కడ వడ్డీ రూ. 3,75,427 వస్తుంది. ఎస్బీఐ, ఐసీఐసీఐ, హె‌చ్‌డీఎఫ్‌సీ బ్యాంకుల్లో వడ్డీ రేట్లు 7.50 శాతంగా ఉండగా.. ఇక్కడ 10 లక్షలపై ఐదేళ్లకు చేతికి రూ. 3,70,469 వడ్డీ వస్తుంది.