ఆర్బీఐ మరో సంచలన నిర్ణయం.. ఇక ఏ యూపీఐ యాప్‌తోనైనా వాలెట్‌ నుంచి పేమెంట్లు

యూనిఫైడ్ పేమెంట్స్ ఇంటర్ఫేస్ (యూపీఐ) పేమెంట్ల విధానంలో రిజర్వ్ బ్యాంక్ ఆప్ ఇండియా మరోసారి కీలక మార్పులు చేపట్టింది. డిజిటల్ పేమెంట్లను మరింత ప్రోత్సహించేలా సంచలన నిర్ణయం తీసుకుంది. ప్రీపెయిడ్ పేమెంట్ ఇన్‌స్ట్రుమెంట్ లను అందిస్తున్న సంస్థల వాలెట్లలోని డబ్బులను ఇకపై థర్డ్ పార్టీ మొబైల్ అప్లికేషన్ల ద్వారానూ పేమెంట్లు ( డబ్బులు పంపడం, రిసీవ్ చేసుకోవడం) చేసుకునే సేవలు అందుబాటులోకి తెచ్చింది. అంటే ఇకపై ఏ యూపీఐ యాప్ ద్వారానైనా వాలెట్ నుంచి పేమెంట్ చేయొచ్చు. ఈ మేరకు శుక్రవారం ఓ సర్క్యులర్ జారీ చేసింది ఆర్‌బీఐ. పూర్తి కేవైసీ చేసిన పీపీఐ యూజర్ ఇకపై థర్డ్ పార్టీ యాప్స్ ద్వారా చెల్లింపులు చేయవచ్చని తెలిపింది.

ప్రీపెయిడ్ పేమెంట్స్ సాధనాలు (పీపీఐ)లో ముందుగానే కొంత డబ్బు జమ చేసుకోవచ్చు. వీటిని వాలెట్లు, లేదా ప్రీ పెయిడ్ కార్డులుగా చెబుతారు. ఇందులోని సొమ్ములను యూపీఐ, ఆన్‌లైన్ ట్రాన్సాక్షన్ల కోసం ఉపయోగించుకోవచ్చు. పీపీఐలో ఉన్న సొమ్ము మేరకు బ్యాంకు అకౌంట్‌తో సంబంధం లేకుండా పేమెంట్లు చేసే వీలుంటుంది. ఇప్పటి వరుక పీపీఐ అందిస్తున్న సంస్థకు చెందిన యూపీఐ ద్వారానే ఈ పేమెంట్లు చేసేందుకు వీలుండేది. కానీ ఇకపై ఈ పీపీఐలకు ఏదైనా యూపీఐ అప్లికేషన్ లింక్ చేసుకుని యూపీఐ పేమెంట్లు పూర్తి చేయవచ్చు.

వాలెట్, యూపీఐ యాప్ వేరు వేరు కంపెనీలకు చెందినవి అయినా, యూజర్లు తమ వాలెట్ ద్వారా ఇతర ఏ యూపీఐ యాప్స్ అయినా లింక్ చేసుకోవచ్చు. అంటే యూజర్లు తమ వాలెట్లో ఉన్న డబ్బులను ఇతర యూపీఐ యాప్స్ ద్వారా పేమెంట్లు చేసే వీలు కలుగుతుంది. ఇందు కోసం పీపీఐ క్రెడిన్షియల్స్‌ని వినియోగించాల్సి ఉంటుంది. ఉదాహరణకు మీరు ఫోన్ పే లేదా పేటీఎం వాలెట్ వాడుతున్నారు అనుకుందాం. అందులో కొంత డబ్బు జమ చేసినట్లయితే ఇప్పటి వరకు మీరు ఫోన్ పే లేదా పేటీఎం యూపీఐ ద్వారానే అందులోని డబ్బులు చెల్లింపులు చేసేందుకు అవకాశం ఉండేది. కానీ, ఇకపై ఇతర యూపీఐ యాప్స్ అంటే గూగుల్ పే, అమెజాన్ పే, రాజోర్ పే వంటి థర్డ్ యాప్స్ సైతం ఉపయోగించి పేమెంట్లు చేయొచ్చు. ఈ కొత్త సేవలు అందుబాటులోకి రావడం వల్ల వినియోగదారులకు డిజిటల్ పేమెంట్ల విషయంలో మరింత వెసులుబాటు లభిస్తుందని ఆర్‌బీఐ వర్గాలు తెలిపాయి. ముఖ్యంగా గిఫ్ట్ కార్డులు, మెట్రో రైలు కార్డులు, డిజిటల్ వాలెట్లు ఉపయోగించే పీపీఐ యూజర్లకు మరింత వెసులుబాటు కలగనుందని పేర్కొన్నాయి.