నెల నెలా పెన్షన్ ఇచ్చే పోస్టాఫీస్ స్కీమ్.. 7.40 శాతం వడ్డీ.. కనీస పెట్టుబడి ఎంతంటే

పెట్టుబడి పెట్టేందుకు చాలా మార్గాలు ఉంటాయి. నెల నెలా ఆదాయం అందించే పెట్టుబడి పథకాలను పలు ఆర్థిక సంస్థలు, బ్యాంకులు అందిస్తుంటాయి. ఒకసారి పెద్ద మొత్తంలో పెట్టుబడి పెట్టి మనం ముందుగా నిర్దేశించిన మొత్తం నెల నెలా పెన్షన్ రూపంలో అందిస్తుంటాయి. అలా మీరు కూడా నెల నెలా పెన్షన్ రూపంలో స్థిరమైన ఆదాయం రావాలని కోరుకుంటున్నారా? అయితే, మీకు పోస్టాఫీసు అందించే మంత్లీ ఇన్‌కమ్ స్కీమ్ ఒక మంచి ఆప్షన్ అని చెప్పవచ్చు. ఇందులో ఎలాంటి రిస్క్ ఉండదు. కేంద్ర ప్రభుత్వ హామీ ఉంటుంది. అయితే, ఇందులో ఇన్వెస్ట్ చేసే ముందే పూర్తి వివరాలు తెలుసుకోవడం మంచిది.

పోస్టాఫీస్ మంత్లీ ఇన్‌కమ్ స్కీమ్ వడ్డీ రేట్లు అక్టోబర్- డిసెంబర్ 2024 త్రైమాసికానికి గానూ కేంద్ర ప్రభుత్వం 7.40 శాతంగా నిర్ణయించింది. నెల నెలా వడ్డీ లెక్కగట్టి పెన్షన్ రూపంలో చెల్లిస్తుంటారు. ప్రతి మూడు నెలలకు ఒకసారి వడ్డీ రేట్లను కేంద్రం సమీక్షిస్తుంది. కొన్నిసార్లు పెంచవచ్చు లేదా తగ్గించవచ్చు. లేదా స్థిరంగా కొనసాగించవచ్చు. ఇన్వెస్ట్ చేసిన నెల తర్వాత నుంచి వడ్డీ లెక్కించి చెల్లిస్తుంటారు. ఏడాది తర్వాత ప్రీమెచ్యూర్ విత్ డ్రాయల్ చేసుకునేందుకు అవకాశం ఉంటుంది. అయితే, మూడేళ్లలోపు విత్ డ్రా చేస్తే మీ డిపాజిట్ నుంచి 2 శాతం కట్ చేస్తారు. మూడేళ్ల తర్వాత అయితే 1 శాతం కట్ అవుతుంది.

పోస్టోఫీసులో మంత్లీ ఇన్‌కమ్ స్కీమ్ అకౌంట్ ఓపెన్ చేసి కనీసం రూ. 1000 పెట్టుబడి పెట్టవచ్చు. గరిష్ఠంగా రూ. 1000 గుణకారంతో సింగిల్ అకౌంట్ అయితే గరిష్ఠంగా రూ.9 లక్షల వరకు ఇన్వెస్ట్ చేయవచ్చు. అదే జాయింట్ అకౌంట్ అయితే గరిష్ఠంగా రూ. 15 లక్షల వరకు డిపాజిట్ చేయవచ్చు. జాయింట్ ఖాతా అయితే ఇద్దరికీ సమానమైన రాబడి అందుతుంది. వ్యక్తిగతంగా అయితే రూ. 9 లక్షలకు మించి డిపాజిట్ చేసేందుకు లేదు.

పోస్టాఫీస్ మంత్లీ ఇన్‌కమ్ స్కీమ్ మెచ్యూరిటీ పీరియడ్ 5 సంవత్సరాలుగా ఉంటుంది. ఒక వేళ ఖాతాదారుడు మెచ్యూరిటీకి ముందే మరణించినట్లయితే ఆ ఖాతా క్లోజ్ అవుతుంది. అందులోని డబ్బులను నామినీ లేదా చట్టపరమైన వారసులకు అందిస్తారు. ఎన్ని రోజులు డబ్బులు ఖాతాలో ఉన్నాయో ఆ రోజులకు వడ్డీ లెక్కగడతారు. వ్యక్తిగతంగా లేదా ఇద్దరు కలిసి జాయింట్ ఖాతా తీసుకోవచ్చు. మైనర్ల పేరుపై సంరక్షకుడి ఆధ్వర్యంలో ఖాతా తీసుకోవచ్చు. ఈ స్కీమ్ ద్వారా ఎలాంటి ట్యాక్స్ బెనిఫిట్స్ ఉండవని గుర్తుంచుకోవాలి.