అన్నా యూనివర్సిటీ నిందితుడు మా మద్దతుదారుడే..: రివీల్ చేసిన సీఎం స్టాలిన్

తమిళనాడు రాజధాని చెన్నై అన్నా యూనివర్సిటీ అత్యాచార ఘటనపై రాష్ట్ర వ్యాప్తంగా ప్రకంపనలు సృష్టించిన విషయం అందరికీ తెలిసిందే. అయితే ముందు నుంచి ప్రతిపక్షాలు నిందితుడికి, అధికార పక్షానికి సంబంధాలు ఉన్నాయంటూ చెప్పుకొచ్చారు. అది నిజమేనని తాజాగా ఆ రాష్ట్ర ముఖ్యమంత్రి ఎంకే స్టాలిన్ వెల్లడించారు. నిందితుడు తమ పార్టీ మద్దతు దారుడేనని స్పష్టం చేశారు. కానీ తమ పార్టీకి చెందిన వాడు కాదని వివరించారు. నిందితుడు ఎవరైనా సరే, ఎలాంటి అధికారంలో ఉన్నా సరే కచ్చితంగా కఠిన శిక్ష పడేలా చేస్తామని వివరించారు. ఆ పూర్తి వివరాలు మీకోసం.

చెన్నైలోని అన్నా యూనివర్సిటీలో 2024 డిసెంబర్ 23వ తేదీన ఇంజినీరింగ్ చదువుతున్న ఓ 19 ఏళ్ల విద్యార్థిని.. తన స్నేహితుడితో కలిసి క్యాంపస్ బయట మాట్లాడుతోంది. అప్పుడే అక్కడకు వచ్చిన ఓ ఇద్దరు యువకులు.. యువతి స్నేహితుడిపై దాడి చేశారు. భయపెట్టి, బలవంతంగా అతడిని అక్కడి నుంచి వెళ్లగొట్టారు. ఆపై ఇద్దరూ కలిసి యువతిపై అత్యాచారం చేశారు. అలాగే వీడియోలు, ఫొటోలు కూడా తీసి ఈ విషయం ఎవరికైనా చెబితే సోషల్ మీడియాలో పెడతామంటూ బెదిరించారు. ఆపై అక్కడి నుంచి పారిపోయారు.

ఇద్దరి చేత అత్యాచారానికి గురైన గుండె ధైర్యం కోల్పోని ఓ విద్యార్థిని మరుసటి రోజు పోలీస్ స్టేషన్‌కు వెళ్లింది. తన స్నేహితుడిని వెంట తీసుకెళ్లిన ఆమె తనకు జరిగిన అన్యాయం గురించి వివరించింది. కేసు నమోదు చేసుకున్న పోలీసులు.. సీసీటీవీ ఫుటేజీ ఆధారంగా ఓ నిందితుడిని అరెస్ట్ చేశారు. ఆ తర్వాత ఈ కేసుకు సంబంధించిన ఎఫ్ఐఆర్ లీకై బాధితురాలికి సంబంధించిన వివరాలు బయటకు వచ్చాయి. దీంతో రాష్ట్రవ్యాప్తంగా సంచలనం రేగింది. ప్రతిపక్షాలు అన్నీ తమిళనాడు ప్రభుత్వంపై నిప్పులు చెరిగాయి. ఈ ఘటనలో నిందితుడికి డీఎంకేతో సంబంధాలు ఉన్నాయంటూ బీజేపీ నేతలు పెద్ద ఎత్తున ఆరోపణలు చేశారు.

అయితే ఈ ఘటనపై తాజాగా ఆ రాష్ట్ర ముఖ్యమంత్రి ఎంకే స్టాలిన్ స్పందించారు. ఈ కేసులో అరెస్ట్ అయిన నిందితుడు తమ పార్టీ మద్దతు దారుడే అని చెప్పారు. కానీ తమ పార్టీకి చెందిన వ్యక్తి కాడని స్పష్టం చేశారు. అలాగే తాము కానీ, తమ పార్టీకి చెందిన నేతలు కానీ అతడికి ఎలాంటి సాయం చేయట్లేదని వెల్లడించారు. మహిళలపై నేరాలకు పాల్పడేవారు సామాన్యులైనా, పార్టీ మద్దతు దారులైనా, పోలీసు ఇన్‌స్పెక్టర్లైనా, అధికారంలో ఉన్న వారైనా సరే తమ సర్కారు పట్టించుకోదని.. నిందితులకు కఠిన శిక్ష పడేలా చేస్తామని వివరించారు.

ముఖ్యంగా ఇలాంటి సున్నితమైన విషయంలో రాజకీయ లబ్ధి కోసం ఏ నాయకుడూ ఎలాంటి కామెంట్లు చేయొద్దని ముఖ్యమంత్రి స్టాలిన్ తెలిపారు. అలాగే సంకుచిత భావంతో ప్రవర్తించి మన విద్యార్థుల చదువులను పాడు చేయవద్దని కోరారు. ఇదే విషయాన్ని ఎక్స్ వేదికగా పోస్ట్ చేశారు.