పండగ వేళ ఏపీకి కేంద్రం తీపికబురు.. భారీగా నిధులు విడుదల

సంక్రాంతి పండుగ వేళ ఆంధ్రప్రదేశ్ ప్రభుత్వానికి కేంద్రం తీపికబురు వినిపించింది. పన్నుల వాటా కింద వచ్చే నిధులను దేశంలోని వివిధ రాష్ట్రాలకు కేంద్ర ప్రభుత్వం విడుదల చేసింది. పన్నుల వాటా కింద మొత్తం రూ.1,73,030 కోట్లను కేంద్ర ప్రభుత్వం శుక్రవారం విడుదల చేసింది. ఇందులో ఆంధ్రప్రదేశ్ రాష్ట్రానికి రూ.7002 కోట్లు విడుదల చేశారు. అలాగే తెలంగాణకు రూ.3,637 కోట్లు విడుదల చేసింది. మూలధన వ్యయం, అభివృద్ధి, సంక్షేమ కార్యక్రమాలకు ఈ నిధులను కేటాయించారు.

మరోవైపు 2024 డిసెంబర్‌లో పన్నుల్లో వాటా కింద రూ.89,086 కోట్లను కేంద్రం రాష్ట్రాలకు విడుదల చేసింది. ఈ సారి ఆ మొత్తాన్ని పెంచారు. మూలధన వ్యయం, అభివృద్ధి కార్యక్రమాలు, సంక్షేమ పథకాల అమలు కోసం రాష్ట్రాలకు కేంద్రం ఈ నిధులు కేటాయించింది. మరోవైపు పన్నుల వాటా కేటాయింపులో ఈసారి ఉత్తరప్రదేశ్ రాష్ట్రానికి అధికంగా నిధులు దక్కాయి. ఉత్తరప్రదేశ్‌కు రూ.31,039.84 కోట్లు విడుదల చేశారు. ఆ తర్వాత బిహార్ రాష్ట్రానికి రూ.17,403.36 కోట్లను కేంద్రం విడుదల చేసింది. పశ్చిమ బెంగాల్ రాష్ట్రానికి రూ.13017.06 కోట్లు దక్కాయి. మహారాష్ట్రకు రూ.10.930.31 కోట్లు, రాజస్థాన్‌కు రూ.10,426.78 కేటాయించారు.

ఈ రాష్ట్రాల తర్వాత తమిళనాడుకు పన్నుల్లో వాటా కింద రూ.7057.89 కోట్లు విడుదల చేశారు. ఆ తర్వాత ఏపీకి అధిక మొత్తం దక్కింది. ఆంధ్రప్రదేశ్ రాష్ట్రానికి రూ.7002 కోట్లు, తెలంగాణకు రూ.3,637 కోట్లు కేటాయించారు. అత్యల్పంగా గోవాకు రూ.667.91 కోట్లు, సిక్కిం రాష్ట్రానికి రూ.671.35 కోట్లు దక్కాయి. పన్ను వసూళ్లలో 41 శాతాన్ని రాష్ట్రాలకు వాటా కింద కేంద్రం విడుదల చేస్తుంది. 2015-20 మధ్యకాలంలో రాష్ట్రాలకు పన్నుల వాటా శాతం 42శాతంగా ఉండేది. అయితే 2021-26 మధ్యకాలానికి ఈ వాటాలో ఒక శాతం కోత విధించారు. ప్రస్తుతం 41 శాతం వాటా చెల్లిస్తున్నారు.

ఇక రాష్ట్రాలకు పన్నుల వాటా చెల్లింపులోనూ కేంద్రం అనేక ప్రామాణికాలు పాటిస్తుంది. ఆ రాష్ట్ర భౌగోళిక పరిస్థితులకు 12.5 శాతం, ఆదాయానికి 45 శాతం, జనాభా, ప్రాంతానికి 15 శాతం, అటవీభూమికి 10 శాతం, ట్యాక్స్ అండ్ ఫిస్కల్ ఎఫర్ట్స్‌కు 2.5 శాతం వెయిటేజీ ఇస్తోంది. దీని ఆధారంగానే రాష్ట్రాలకు పన్నుల వాటా కింద నిధులను కేంద్ర ఆర్థిక శాఖ విడుదల చేస్తోంది.