సంతానం లేని స్త్రీలను ప్రెగ్నెంట్ చేస్తే రూ.10 లక్షలు.. సోషల్‌ మీడియాలో యాడ్స్, కట్ చేస్తే..!

ఒకప్పుడు దొంగతనాలు, దోచుకోవడం వేరు.. ప్రస్తుతం వేరు. ఇప్పుడు అన్నీ వైట్ కాలర్ మోసాలే జరుగుతున్నాయి. మనకు ఎవరో తెలియకుండానే.. ఎక్కడి నుంచో, కనీసం మనం మొహం కూడా చూడని వారు.. టెక్నాలజీని ఉపయోగించుకుని మన వద్ద డబ్బులు కొట్టేయడం చూస్తూనే ఉన్నాం. స్టాక్ మార్కెట్లలో భారీగా లాభాలు ఇప్పిస్తామని.. సైబర్ మోసాలు, డిజిటల్ అరెస్ట్‌లు, హనీ ట్రాప్ ఇలా రోజుకో స్కామ్ బయటికి వస్తున్నా.. ఇలాంటివి మాత్రం ఆగడం లేదు. తాజాగా మహిళలను ప్రెగ్నెంట్ చేస్తే భారీగా డబ్బులు ఇస్తామని ఇచ్చిన ప్రకటనలు చూసి మోసపోయిన ఘటనలు వెలుగులోకి రావడం ఇప్పుడు తీవ్ర చర్చనీయాంశంగా మారింది. బీహార్‌లో వెలుగుచూసిన ఈ మోసం అందర్నీ ఆశ్చర్యానికి గురి చేస్తోంది.

బీహార్‌లో ఒక ముఠా డబ్బుల కోసం సరికొత్త ప్రయత్నం చేసింది. సంతానం లేని మహిళలను గర్భవతులను చేస్తే భారీ మొత్తంలో డబ్బు సంపాదించవచ్చని సోషల్ మీడియాలో యాడ్స్ ఇచ్చింది. అవి నిజం అని నమ్మి వచ్చిన కొందరి నుంచి ఆ ముఠా భారీగా డబ్బు వసూలు చేసింది. ఇలాంటి మోసాలపై పోలీసులకు వరుస ఫిర్యాదులు అందడంతో దర్యాప్తు చేపట్టగా.. అసలు విషయం బయటికి వచ్చింది. నవడా జిల్లాలో ఈ స్కామ్‌ వెలుగులోకి రాగా.. పలువురు ముఠా సభ్యులను పోలీసులు అరెస్టు చేశారు.

ఈ ముఠా.. ఆల్‌ ఇండియా ప్రెగ్నెంట్‌ జాబ్‌ సర్వీస్‌, ప్లేబాయ్‌ సర్వీస్‌ల పేరుతో ఈ ముఠా.. ఫేస్‌బుక్‌లో యాడ్స్ పోస్ట్ చేశారు. పిల్లలు లేని మహిళలను గర్భవతులను చేస్తే చేసిన వారికి రూ.10 లక్షలు ఇస్తామని అందులో ప్రకటించారు. ఒకవేళ వారిని ప్రెగ్నెంట్ చేయడంలో విఫలం అయితే రూ.50 వేల నుంచి రూ.5 లక్షల వరకు ఇస్తారని పేర్కొన్నారు. అయితే ఆ సోషల్ మీడియా యాడ్స్ చూసి కక్కుర్తి పడ్డ కొందరు వ్యక్తులు.. అందులో ఇచ్చిన నంబర్ల ఆధారంగా ఆ ముఠా సభ్యులను ఆశ్రయించారు.

ఈ క్రమంలోనే తమ వద్దకు వచ్చిన వారి నుంచి పాన్‌ కార్డ్‌, ఆధార్‌ కార్డ్‌, సెల్ఫీ, ఇతర వివరాలను ముఠా సభ్యులు తీసుకున్నారు. ఆ తర్వాత రిజిస్ట్రేషన్‌ ఛార్జీలు, హోటల్‌ రూమ్ బుకింగ్స్‌ పేరుతో వారి వద్ద నుంచే భారీగా డబ్బు వసూలు చేశారు. ఒకవేళ వారు డబ్బులు ఇవ్వడానికి నిరాకరిస్తే.. ఈ విషయం అందరికీ చెప్తామని బెదిరించేవారు. పరువుపోతుందని భయపడిన చాలా మంది ఆ ముఠా చేతిలో చిక్కి జేబులు గుల్ల చేసుకున్నారు. అయితే కొందరు మాత్రం ఈ వ్యవహారంపై పోలీసులకు ఫిర్యాదులు చేశారు.

దీంతో రంగంలోకి దిగి పోలీసులు కేసు నమోదు చేసుకుని విచారణ మొదలు పెట్టారు. ఈ క్రమంలోనే వారికి సంచలన విషయాలు వెల్లడయ్యాయి. నిందితులు ప్రిన్స్‌ రాజ్‌, భోలా కుమార్‌, రాహుల్‌ కుమార్‌లను నవడా జిల్లా పోలీసులు అరెస్ట్ చేశారు. వారి నుంచి 6 సెల్‌ఫోన్లు స్వాధీనం చేసుకున్నారు. బాధితులతో చేసిన వాట్సాప్‌ ఛాట్‌, కస్టమర్‌ ఫొటోలు, ఆడియో రికార్డింగ్‌లు, బ్యాంక్‌ లావాదేవీలను భారీగా గుర్తించినట్లు పోలీసులు తెలిపారు.