ఈ ట్రాన్సాక్షన్లు చేస్తున్నారా? ఐటీ నోటీసులస్తాయ్.. 100 శాతం ఇన్‌కం టాక్స్ పెనాల్టీ కూడా.

మన దేశంలో డిజిటల్ ట్రాన్సాక్షన్స్ పెద్ద ఎత్తున జరుగుతున్నప్పటికీ.. ఇప్పటికీ నగదు లావాదేవీలు మాత్రం కొనసాగుతూనే ఉన్నాయి. ఇక్కడ మరీ ముఖ్యంగా పెద్ద మొత్తంలో లావాదేవీలపైన ఆంక్షలు ఉన్నప్పటికీ.. నిఘా కొరవడిన నేపథ్యంలో యథేచ్ఛగా సాగుతున్నాయి. ఇటీవలి కాలంలో ప్రధానంగా వీటిపై దృష్టి సారించింది. ముఖ్యంగా ఇందులో రూ. 2 లక్షలపైన నగదు లావాదేవీలు జరిగితే ఆ వివరాల్ని ఆర్థిక సంస్థలకు నివేదించాల్సి ఉంటుంది. అయినా నిబంధనలు అతిక్రమిస్తున్నట్లు కేంద్ర ప్రత్యేక్ష పన్నుల బోర్డు గుర్తించింది. ముఖ్యంగా ఇప్పుడు మరో 3 నెలల తర్వాత ఈ ఆర్థిక సంవత్సరానికి సంబంధించి ఐటీఆర్ ఫైలింగ్ చేయాల్సి ఉంటుందన్న సంగతి తెలిసిందే. దీంతో వీటి గురించి ఆలోచించాలి. కొన్ని ట్రాన్సాక్షన్లు చేస్తే.. పెద్ద మొత్తంలో పెనాల్టీ ఎదుర్కోవాల్సి వస్తుంది. ఇంకా ఐటీ నోటీసులు, కాల్స్ కూడా వచ్చే అవకాశం ఉంది. అవేంటో మనం ఇప్పుడు తెలుసుకుందాం.

ఆదాయపు పన్ను చట్టంలోని సెక్షన్ 269ST సహా మరికొన్ని సెక్షన్ల కింద నగదు లావాదేవీలు పరిమితికి మించి చేస్తే నోటీసులు సహా పెనాల్టీ పడుతుందని టాక్స్2విన్ కోఫౌండర్, సీఈఓ అభిషేక్ సోనీ చెప్పారు. జులై 31లోగా ఇన్‌కంటాక్స్ రిటర్న్స్ ఫైలింగ్ చేయాల్సి ఉంటుంది కాబట్టి 100 శాతం వరకు పెనాల్టీ పడేందుకు దారి తీసే ట్రాన్సాక్షన్స్ ఏమేం ఉన్నాయో చూద్దాం.

సెక్షన్ 269SS (లోన్స్, డిపాజిట్స్, అడ్వా్న్సెస్)- బంధువులు లేదా స్నేహితులకు రూ. 20 వేల కంటే ఎక్కువ రుణం ఇవ్వాలనుకుంటే చెక్ లేదా బ్యాంక్ డ్రాఫ్ట్ లేదా బ్యాంక్ అకౌంట్ ద్వారా ఆన్‌‌లైన్ ట్రాన్స్‌ఫర్ విధానం ఎంచుకోవడమే మేలు. రూ. 20 వేల కంటే ఎక్కువ రుణం నగదు రూపంలో ఇవ్వకూడదు. రుణం తీసుకునేటప్పుడు కూడా ఇదే నియమాలు వర్తిస్తాయి. ఇక్కడ సెక్షన్ 269SS కింద అంతే మొత్తం పెనాల్టీ పడుతుంది.

లోన్ అండ్ డిపాజిట్స్ రీపేమెంట్ (సెక్షన్ 269T)- లోన్లు, డిపాజిట్లు, అడ్వాన్సుల కింద తీసుకున్న మొత్తం తిరిగి చెల్లించేటప్పుడు రూ. 20 వేలు పరిమితిగా ఉంది. ఇక్కడ కూడా చెక్, బ్యాంక్ డ్రాఫ్ట్ లేదా ఇతర ఎలక్ట్రానిక్ మోడ్స్ ద్వారా తిరిగి చెల్లించాలి. ఇక్కడ కూడా నిబంధనల ఉల్లంఘన జరిగితే సెక్షన్ 269T కింద పన్ను అధికారికి లోన్ మొత్తంపై 100 శాతం జరిమానా విధించేందుకు అధికారం ఉంది.

సెక్షన్ 269ST (రూ. 2 లక్షల కంటే ఎక్కువ నగదు స్వీకరణ)- ఆదాయపు పన్ను చట్టం సెక్షన్ 269 ST ప్రకారం రూ. 2 లక్షలకు మించి నగదు రూపంలో చెల్లింపులు చేయడం స్వీకరించేందుకు వీల్లేదు. ఎక్కువగా ఇలాంటి ట్రాన్సాక్షన్స్ హోటల్స్, బ్యాంకెట్ హాల్స్, లగ్జరీ బ్రాండ్ రీటైలర్స్, ఐవీఎఫ్ క్లినిక్స్, హాస్పిటల్స్, మెడికల్ కాలేజీ సీట్ల కొనుగోళ్లు వంటి చోట్ల జరుగుతున్నట్లు గుర్తించారు. కాబట్టి ఇలాంటి వాటి పట్ల జాగ్రత్త వహించాలి. ఇక్కడ కూడా పెనాల్టీ మీరు పంపిన లేదా స్వీకరించిన దానికి సమానంగా పడుతుంది.

బిజినెస్ ఎక్స్‌పెండిచర్స్ (సెక్షన్ 40A(3))- వ్యాపారాల్లో కూడా పరిమితికి మించి నగదు రూపంలో తీసుకోకూడదు. ఒక వ్యాపార యజమాని రూ. 10000 కంటే ఎక్కువ నగదు లావాదేవీలు చేస్తే.. అతను ఆ మొత్తాన్ని ఖర్చుగా, తరుగుదలగా (డిప్రిసియేషన్) క్లెయిమ్ చేయలేడు. డొనేషన్స్ (సెక్షన్ 80G)- రూ. 2 వేలకుపైగా నగదు రూపంలో డొనేషన్స్ చేస్తే.. అవి తిరిగి క్లెయిమ్ చేసుకోలేరు. ఇలాంటి సమయాల్లో నోటీసులు రావడం సహా పెనాల్టీ కట్టాల్సి వస్తుంది.