ఒకేసారి రూ.1 లక్ష ఇచ్చే కొత్త స్కీమ్.. ఎవరు పొందొచ్చు, ఎక్కడ తీసుకోవాలి

కొద్ది కొద్దిగా పొదుపు చేస్తూ మీరు లక్షాధికారి కావాలనుకుంటున్నారా? అయితే మీకు ఒకేసారి లక్ష రూపాయలు అందించే సరికొత్త స్కీమ్ అందుబాటులోకి వచ్చింది. దేశీయ అతిపెద్ద ప్రభుత్వ బ్యాంక్ అయిన స్టేట్ బ్యాంక్ తమ కస్టమర్లను లక్షాధికారులను చేయానే లక్ష్యంతో హర్ ఘర్ లఖ్‌పతి రికరింగ్ డిపాజిట్ స్కీమ్ తీసుకొచ్చింది. చిన్న మొత్తాల్లో పొదుపు చేసి రూ.1 లక్ష ఆపైన అందించడమే ఈ స్కీమ్ ముఖ్య ఉద్దేశం. ప్రతి ఇంటిలోనూ లక్షాధికారి ఉండాలని ఎస్‌బీఐ ఈ స్కీమ్ తెచ్చినట్లు తెలిపింది. గ్యారెంటీ రిటర్న్స్ ఉండే పథకాల్లో చిన్న మొత్తాల్లో విడతల వారీగా పొదుపు చేయాలనుకునే వారికి ఇది బెస్ట్ స్కీమ్ అని చెప్పవచ్చు.

ఎస్‌బీఐ హర్ ఘర్ లఖ్‌పతి ఆర్‌డీ స్కీమ్ ద్వారా ప్రస్తుతం 3-4 సంవత్సరాల మెచ్యూరిటీ టెన్యూర్ డిపాజిట్లపై 6.75 శాతం వడ్డీ అందిస్తోంది. ఇక ఇతర టెన్యూర్లు ఎంచుకున్నట్లయితే గరిష్ఠంగా 6.50 శాతం వడ్డీ లభిస్తుంది. అయితే, ఏదైనా అనుకోని పరిస్థితుల్లో వరుసగా ఆరు వాయిదాలు పొదుపు చేయకపోతే సదరు అకౌంట్ క్లోజ్ అవుతుంది. అప్పటి వరకు జమ చేసిన డబ్బులను తిరిగి ఇచ్చేస్తారు.

  లక్ష రావాలంటే ఎవరు ఎంత ఇన్వెస్ట్ చేయాలి?

జనరల్ సిటిజన్ గరిష్ఠ వడ్డీ రేటు 6.75 శాతం అందించే 3 ఏళ్ల టెన్యూర్ ఎంచుకున్నాడు అనుకుందాం. అతడికి రూ.1 లక్ష రావాలంటే నెలకు రూ.2,500 చొప్పున పొదుపు చేస్తూ ఉండాల్సి ఉంటుంది. నాలుగేళ్లు టెన్యూర్ ఎంచుకున్నట్లయితే నెలకు రూ.1810 కడితే సరిపోతుంది. ఇక 5 సంవత్సరాల మెచ్యూరిటీ టెన్యూర్ ఎంచుకున్నట్లయితే వడ్డీ రేటు 6.50 శాతం వర్తిస్తుంది. దీని ప్రకారం నెలకు రూ.1407 పొదుపు చేస్తే చాలు లక్ష రూపాయలు వస్తాయి.

ఇక 60 సంవత్సరాలు పైబడిన సీనియర్ సిటిజన్ల విషయానికి వస్తే 3 ఏళ్ల టెన్యూర్ పై గరిష్ఠంగా 7.25 శాతం వడ్డీ లభిస్తోంది. లక్ష రూపాయలు రావాలంటే నెలకు రూ.2,480 పొదుపు చేయాలి. అదే 4 సంవత్సరాల కోసం అయితే నెలకు రూ.1791 కడితే చాలు. ఇక 5 సంవత్సరాల మెచ్యూరిటీ పీరియడ్ అయితే వడ్డీ 7 శాతం వర్తిస్తుంది. లక్ష రూపాయలు అందుకోవాలంటే నెలకు రూ.1389 కడితే సరిపోతుంది.

చిన్న మొత్తాల్లో పొదుపు చేస్తూ గ్యారెంటీ రిటర్న్స్ కోరుకునే వారికి ఈ స్కీమ్ బెస్ట్ ఆప్షన్. అయితే, హైరిటర్న్స్ కావాలనుకునే వారికి ఇది సరైన ఆప్షన్ కాదని చెప్పవచ్చు. అలాంటి వారు రిస్క్ తీసుకుని స్టాక్ మార్కెట్లు, మ్యూచువల్ ఫండ్స్‌లో పెట్టుబడి పెట్టడం మంచిది. అలాగే తమ డబ్బులను వేగంగా వెనక్కి తీసుకోవాలనుకునే వారికి సైతం ఎస్‌బీఐ లఖ్‌పతి ఆర్‌డీ సరైన ఎంపిక కాదని చెప్పవచ్చు.