పాకిస్థాన్ మాజీ ప్రధాని ఇమ్రాన్ ఖాన్‌కు 14 ఏళ్లు, ఆయన సతీమణికి 7 ఏళ్ల జైలు శిక్ష.. ఏ కేసులో అంటే?

అల్ ఖాదిర్ ట్రస్టు భూ అక్రమాస్తుల కేసులో పాకిస్థాన్ మాజీ ప్రధాని ఇమ్రాన్ ఖాన్‌తో పాటు ఆయన భార్య బుష్రా బీబీని దోషులుగా తేల్చింది పాక్ ట్రిబ్యునల్ కోర్టు. ఈక్రమంలోనే ఇమ్రాన్ ఖాన్‌కు 14 ఏళ్ల జైలు శిక్ష విధించింది. ఆయన సతీమణికి ఏడు సంవత్సరాల శిక్ష వేసింది. అంతేకాకుండా ఇమ్రాన్ ఖాన్‌కు 10 లక్షల రూపాయల జరిమానాను కూడా విధించింది. బుష్రా బీబీకి 5 లక్షల జరిమానా చెల్లించాలని ఆదేశాలు జారీ చేసింది. ఒకవేళ ఈ జరిమానాలను చెల్లించకపోతే ఇద్దరూ అదనంగా మరో ఆరు నెలల పాటు జైలు శిక్ష అనుభవించాల్సి ఉంటుందని పేర్కొంది. ప్రస్తుతం బీబీ బుష్రాను అదుపులోకి కూడా తీసుకున్నారు. ఆ పూర్తి వివరాలు మీకోసం.

లండన్‌లో ఉంటున్న పాక్ స్థిరాస్తి వ్యాపారి మాలిక్ రియాజ్ హుసేన్ నుంచి వసూలు చేసిన 19 కోట్ల పౌండ్లను బ్రిటన్‌కు పంపగా.. ఆ సొమ్మును ఇమ్రాన్ ఖాన్ దంపతులు గోల్‌మాల్ చేశారని ఆరోపణ వచ్చింది. దీన్నే అల్ ఖాదిర్ ట్రస్టు కేసుగా చెబుతుండగా.. నేషనల్ అకౌంటబులిటీ బ్యూరో 2023లో ఈ కేసు నమోదు చేసింది. అయితే ఇమ్రాన్ ఖాన్ పాకిస్థాన్ ప్రధాన మంత్రిగా ఉన్న సమయంలో.. ఈ 19 కోట్ల పౌండ్లను జాతీయ ఖజానాలో జమ చేయకుండా, సుప్రీంకోర్టు గతంలో రియాజ్ హుసేన్‌కు విధించిన జరిమానాలో కొంత మొత్తాన్ని అందులోంచి కట్టేందుకు అనుమతించారని అభియోగాలు వచ్చాయి.

అయితే ఇందుకు బదులుగా ఇమ్రాన్ ఖాన్, ఆయన భార్య బుష్రా బీబీలు నెలకొల్పాలని చూసిన అల్ ఖాదిర్ విశ్వవిద్యాలయానికి హుసేన్ 57 ఎకరాల భూమి బహుమానంగా ఇచ్చినట్లు కూడా ఆరోపణలు వచ్యాయి. ఈ కేసులో గతేడాది డిసెంబర్ 23వ తేదీనే ఇస్లామాబాద్ అకౌంటబులిటీ కోర్టు తీర్పు ఇవ్వాల్సి ఉంది. కానీ పలుకారణాలు వల్ల వాయిదా పడుతూ వచ్చింది.

అయితే ఈరోజు అడియాలా జైల్లో ఏర్పాటు చేసిన కోర్టు గదిలో జడ్జి నాసిర్ జావెద్ రాణా ఈ తీర్పునిచ్చారు. ఇమ్రాన్ ఖాన్‌తో పాటు ఆయన భార్య బుష్రా బీబీలకు.. వరుసగా 14, 7 ఏళ్ల జైలు శిక్షను విధించారు. అంతేకాకుండా వరుసగా 10, 5 లక్షల రూపాయల జరిమానా వేశారు. వీరిద్దరూ ఈ జరిమానాలు చెల్లించకపోతే అదనంగా మరో ఆరు నెలల పాటు జైలుశిక్ష అనుభవించాల్సి ఉంటుందని స్పష్టం చేశారు.

ఇదిలా ఉండగా.. రెండేళ్లుగా జైల్లోనే ఉంటున్న ఇమ్రాన్ ఖాన్‌పై అనేక లీగల్ కేసులు నమోదు కాగా.. అవన్నీ రాజకీయ కక్షలతోనే నమోదు చేసినట్లు ఇమ్రాన్ ఖాన్ ఆరోపించారు. ఈక్రమంలోనే తోషాకానా, ఇద్దత్ కేసుల్లో గతేడాది నిర్దోషిగా తేలిన ఈయనపై తాజాగా తోషాకా2 కేసు నమోదు అయింది. అలాగే 2024 జనవరి నెలలో ప్రభుత్వ రహస్యాలను బహిర్గతం చేసిన కేసులో పాకిస్థాన్ కోర్టు 10 ఏళ్ల జైలుశిక్ష విధించింది. ప్రస్తుతం 14 ఏళ్ల జైలు శిక్ష పడింది. అయితే పాకిస్థాన్ చట్టం ప్రకారం ఏక కాలంలో అనేక శిక్షలను అనుభవించవచ్చు. అంటే 14 ఏళ్లలోనే ఆయన అన్ని శిక్షలను పూర్తి చేయవచ్చన్నమాట.