మెట్రో ప్రయాణికులకు బ్యాడ్‌న్యూస్.. ఈనెల 20 నుంచి ఛార్జీలు పెంపు

కర్ణాటకలో మహిళలకు ఉచిత బస్సు ప్రయాణం కల్పించడం వల్ల ఆర్టీసీకి వచ్చే నష్టాలను పూడ్చుకోవడంలో భాగంగా ఇటీవలె సిద్ధరామయ్య నేతృత్వంలోని కాంగ్రెస్ ప్రభుత్వం.. బస్ ఛార్జీలను పెంచుతూ కీలక నిర్ణయం తీసుకుంది. అయితే బెంగళూరు నగరంలో నడిచే మెట్రో రైలు ఛార్జీలు కూడా తాజాగా పెరిగాయి. మెట్రో ఛార్జీలు పెంచుతూ తాజాగా బెంగళూరు మెట్రో రైల్ కార్పొరేషన్ లిమిటెడ్ శుక్రవారం గ్రీన్ సిగ్నల్ ఇచ్చింది. పెరిగిన ఛార్జీలు జనవరి 20వ తేదీ నుంచి అమల్లోకి వస్తాయని.. మెట్రో రైల్ కార్పొరేషన్ వర్గాలు వెల్లడించాయి. అయితే పెంచిన ఛార్జీల వివరాలు మాత్రం ఇంకా అధికారికంగా విడుదల చేయలేదు.

అయితే.. బెంగళూరు నగరంలో మెట్రో రైల్ ఛార్జీలను సవరించాలన్న ఫేర్ ఫిక్సేషన్ కమిటీ -ఎఫ్‌ఎఫ్‌సీ సిఫారసుకు మాత్రం బెంగళూరు మెట్రో రైల్ కార్పొరేషన్ బోర్డు ఆమోద ముద్ర వేసింది. త్వరలోనే సవరించిన ఛార్జీలకు సంబంధించిన పూర్తి వివరాలను ప్రకటిస్తామని బీఎమ్‌ఆర్‌సీఎల్ సీనియర్ అధికారి ఒకరు స్పష్టం చేశారు. అయితే ప్రస్తుతం బెంగళూరు మెట్రోలో కనీస ఛార్జీ రూ.10 గా ఉంది. గరిష్ఠంగా రూ.60 మెట్రో టికెట్ ఉంది. మరోవైపు.. స్మార్ట్‌కార్డు కలిగి ఉన్న ప్రయాణికులకు ఈ టికెట్ ఛార్జీపై 5 శాతం తగ్గింపు ఉంటుంది.

ఈ నేపథ్యంలోనే కొత్తగా పెంచిన ఛార్జీలు 40 నుంచి 45 శాతం వరకు ఉంటాయని అంచనా వేస్తున్నారు. కనీస ఛార్జీని రూ.15 గా నిర్ణయించాలని మెట్రో రైల్ కార్పొరేషన్ సమావేశంలో చర్చ జరిగినట్లు విశ్వసనీయ వర్గాల ద్వారా తెలుస్తోంది. ఇక గరిష్టంగా ఇప్పటివరకు ఉన్న రూ.60 ఛార్జీ కాస్త రూ.80కి పెరగనున్నట్లు సమాచారం. అయితే బీఎమ్‌ఆర్‌సీఎల్ మాత్రం ఇంకా అధికారికంగా ఛార్జీలు ఎంత పెరుగుతాయి అనేది వెల్లడించలేదు.

ఛార్జీల పెంపుపై.. బెంగళూరు మెట్రో రైల్ కార్పొరేషన్ అధికారులు మరోసారి ఆలోచించాలని ఆయన విజ్ఞప్తి చేశారు. మెట్రో రైల్ ఛార్జీల పెంపుతో ప్రయాణికులు.. ప్రైవేటు వాహనాలను ఆశ్రయించే అవకాశం ఉందని పేర్కొన్నారు. దానివల్ల మెట్రో రైలులో ప్రయాణించే వారి సంఖ్య తగ్గిపోతుందని ఆందోళన వ్యక్తం చేశారు. ప్రస్తుతం బెంగళూరు మెట్రోలో నిత్యం 9 లక్షల మంది ప్రయాణికులు రాకపోకలు సాగిస్తున్నారు.