ప్రియుడికి విషం ఇచ్చి చంపిన ప్రియురాలు.. ఉరిశిక్ష విధించిన కోర్టు

ప్రేమలో ఉన్నవారు.. ప్రేమించుకున్నంత కాలం బాగానే ఉండి.. ఎవరో ఒకరు విడిపోదాం అనుకోగానే అసలు సమస్య మొదలవుతుంది. ఒకరు విడిపోవాలి అనుకుంటే.. మరొకరు మాత్రం ప్రాణం లాగా ప్రేమించుకున్న వారిని వదిలిపెట్టలేరు. అలాంటప్పుడు వారు ఆత్మహత్య చేసుకోవడమో లేక ఇతరులను హత్య చేయడమో ఇలా ఎన్నో ఘటనలు నిత్యం జరుగుతూనే ఉన్నాయి. తాజాగా ప్రియుడిని చంపిన కేసులో ప్రియురాలికి ఉరిశిక్ష విధించిన ఘటన కేరళలో సంచలనంగా మారింది. కొన్నేళ్ల పాటు ప్రేమించిన తర్వాత.. ఇంట్లో సంబంధం చూశారని ఆ ప్రియురాలు.. ప్రియుడిని వదిలేయాలని భావించింది. కట్టుకథలు చెప్పినా అతడు నమ్మలేదు. చివరికి ఎలా వదలించుకోవాలో తెలియక.. అతడికి స్లో పాయిజన్ ఇచ్చి ప్రాణాలు తీసింది. ఈ ఘటనలో ఆ యువతి దోషిగా తేలడంతో తాజాగా కోర్టు ఉరిశిక్ష విధిస్తూ సంచలన తీర్పు వెలువరించింది.

కేరళలోని తిరువనంతపురం ప్రాంతానికి చెందిన షారోన్ రాజ్ అనే యువకుడితో.. తమిళనాడులోని కన్యాకుమారి జిల్లాకు చెందిన 24 ఏళ్ల గ్రీష్మ అనే యువతి ప్రేమలో పడింది. కొన్నేళ్ల పాటు వారిద్దరూ ఎంతో ప్రాణంగా ప్రేమించుకున్నారు. పెళ్లి కూడా చేసుకోవాలని అనుకున్నారు. అయితే అంతలోనే 2022లో గ్రీష్మకు.. ఇండియన్ ఆర్మీలో పనిచేసే ఒక వ్యక్తితో ఆమె కుటుంబ సభ్యులు పెళ్లి కుదుర్చారు. ఇక షారోన్ రాజ్‌ను వదిలేసి.. ఆ ఆర్మీ వ్యక్తిని పెళ్లి చేసుకోవాలని గ్రీష్మ ఫిక్స్ అయింది. దీంతో తన బాయ్‌ఫ్రెండ్‌ను దూరం పెట్టాలని నిర్ణయించింది.

ఈ క్రమంలోనే షారోన్ రాజ్‌ను వదిలించుకునేందుకు ఒక కట్టుకథ అల్లింది. తనను పెళ్లి చేసుకుంటే తన ప్రియుడు చనిపోతాడని.. ఒక జ్యోతిష్యుడు చెప్పాడని షారోన్ రాజ్‌కు చెప్పింది. అయితే అవన్నీ మూఢనమ్మకాలు అని.. పెళ్లి చేసుకుందాం అని అతడు ఒత్తిడి తీసుకువచ్చాడు. ఒకవైపు షారోన్ రాజ్ ఒత్తిడి.. మరోవైపు.. సంపన్న కుటుంబానికి చెందిన ఆర్మీ వ్యక్తితో పెళ్లి నిశ్చయం కావడంతో.. తన లవర్ అడ్డు తప్పించుకోవాలని గ్రీష్మ భావించింది.

ఈ క్రమంలోనే 2022లో తన ప్రియుడు షారోన్ రాజ్‌కు జ్యూస్ ఛాలెంజ్ పేరుతో నెమ్మదిగా స్లో పాయిజన్ తాగించడం ప్రారంభించింది. అలా ఒక రోజు జ్యూస్ తాగిన తర్వాత షారోన్ రాజ్ కడుపునొప్పితో అస్వస్థతకు గురయ్యాడు. వెంటనే ఆస్పత్రిలో చేర్పించగా.. చికిత్స పొందుతూ 11 రోజుల తర్వాత ప్రాణాలు విడిచాడు. అయితే అప్పటికే అవయవాలు పూర్తిగా దెబ్బతిన్నట్లు డాక్టర్లు గుర్తించారు. దీనిపై షారోన్ రాజ్ కుటుంబ సభ్యులు పోలీసులకు ఫిర్యాదు చేశారు. అనంతరం ఈ కేసులో సుదీర్ఘ వాదనలు విన్న తిరువనంతపురం కోర్టు.. గ్రీష్మను దోషిగా తేల్చింది. తాజాగా ఆమెకు సోమవారం ఉరిశిక్ష ఖరారు చేసింది. షారోన్ రాజ్‌ను చంపేందుకు ఆమెకు సహకరించిన బంధువులకు మూడేళ్ల జైలు శిక్ష విధిస్తూ తీర్పు వెలువరించింది. తగిన సాక్ష్యాధారాలు లేకపోవడంతో గ్రీష్మ తల్లిని నిర్దోషిగా విడుదల చేసింది.