దాని వల్ల భార్యను కూడా ముద్దాడలేకపోయాడు పాపం

గతేడాది జరిగిన అమెరికా అధ్యక్ష ఎన్నికల్లో విజయం సాధించిన.. జనవరి 20వ తేదీన అగ్రరాజ్యం అమెరికా 47వ అధ్యక్షుడిగా పదవీ బాధ్యతలు స్వీకరించారు డొనాల్డ్ ట్రంప్. అయితే ఈ కార్యక్రమంలోనే ఓ ఆసక్తికర సన్నివేషం చోటు చేసుకుంది. ముఖ్యంగా ట్రంప్ ప్రమాణ స్వీకారం చేయడానికి వెళ్లేముందు.. తన సతీమణి మెలానియాను ప్రేమగా ముద్దాడబోయాడు. కానీ ఆ ఒక్కటి అడ్డురావడంతో భార్యను ముద్దు పెట్టుకోలేకపోయాడు నూతన అధ్యక్షుడు. ప్రస్తుతం నెట్టింట ఈ వీడియో వైరల్ అవుతుండగా.. అంతా ఎంత పెద్ద కష్టం వచ్చింది సామీ నీకంటూ కామెంట్లు చేస్తున్నారు. ఆ పూర్తి వివరాలు మీకోసం.

అమెరికా 47వ అధ్యక్షుడిగా డొనాల్డ్ ట్రంప్.. జనవరి 20వ తేదీన ప్రమాణ స్వీకారం చేశారు. ఈ కార్యక్రమానికి దేశ విదేశాల అధినేతలతో పాటు అనేక మంది టెక్ దిగ్గజాలు, సోషల్ మీడియా ఇన్‌ఫ్లూయెన్సర్లు కూడా హాజరయ్యారు. అయితే ప్రమాణ స్వీకారం చేసేందుకు కాసేపటి ముందు ట్రంప్.. వాషింగ్టన్‌లోని క్యాపిటల్ భవనం వరకు ర్యాలీగా వచ్చారు. ఒక్కరోజు ముందుగానే అక్కడకు వెళ్లిన ట్రంప్.. ముందుగా ఓ చర్చికి వెళ్లారు. అక్కడే భార్య మెలానియాతో కలిసి ప్రార్థనలు చేశారు.

ఆ తర్వాత అమెరికా మాజీ అధ్యక్షుడు జో బైడెన్, ఆయన సతీమణితో కలిసి ట్రంప్ దంపతులు తేనీటి విందులో పాల్గొన్నారు. ఈక్రమంలోనే అనేక విషయాల గురించి మాట్లాడుకున్నారు. సరదాగా కాసేపు కాలక్షేపం చేసిన వీరు.. ఆతర్వాత క్యాపిటల్ భవనానికి చేరుకున్నారు. వారు అక్కడకు వచ్చేసరికే అనేక మంది అతిథులు అక్కడకు చేరుకున్నారు. ముఖ్యంగా దేశ విదేశాలకు చెందిన నేతలతో పాటు ట్రంప్ కుటుంబ సభ్యులు అందరూ పాల్గొన్నారు. ఆయన మూడో భార్య మెలానియా, కూతురు ఇవాంక, కుమారుడు ఎరిక్, డేర్డ్ కుష్ణర్, డొనాల్డ్ ట్రంప్ జూనియర్ ఉపాధ్యక్షుడు జేడీ వాన్స్ దంపతులు సైతం వచ్చారు.

ఇలా వేదిక వద్దకు చేరుకున్న ట్రంప్, ఆయన భార్య మెలానియా, జోబైడెన్ దంపతులు అంతా నిలబడి ఉండగానే.. ప్రమాణ స్వీకారం కోసం ట్రంప్‌ను వేదికపైకి పిలిచారు. ఈక్రమంలోనే వేదికపైకి చేరుకునే ముందు ట్రంప్ తన భార్య మెలానియాకు ప్రేమగా ముద్దు ఇవ్వాలనుకున్నాడు. ఆమె వద్దకు వెళ్లాడు. ఆమె కూడా ట్రంప్‌ను ముద్దాడేందుకు ముందుకు రాగా.. ఆమె పెట్టుకున్న టోపీ అడ్డుగా నిలిచింది. ఈక్రమంలోనే వీరిద్దరూ ముద్దు పెట్టుకోలేకపోయారు. వీరి ఇబ్బందిని గమనించిన అతిథులు అంతా నవ్వుకున్నారు. ట్రంప్, మెలానియా సైతం నవ్వుకోగా.. ఆయన వేదికపైకి వెళ్లారు.

ప్రస్తుతం ఈ వీడియో నెట్టింట తెగ వైరల్ అవుతోంది. దీన్ని చూసిన ప్రతీ ఒక్కరూ అయ్యో ట్రంపూ.. నీకెంత పెద్ద కష్టం వచ్చింది సామీ అంటూ కామెంట్లు చేస్తున్నారు. ఇలాంటి కష్టం పగవాడికి కూడా రావొద్దని కోరుకుంటున్నట్లు మరికొంత మంది చెప్పుకొస్తున్నారు. ఓ నెటిజెన్ అయితే.. ఆ టోపీ ఎంత పని చేసింది.. అగ్రరాజ్యం అధ్యక్షుడు అయిన ట్రంప్‌నే ఇంత ఇబ్బంది పెట్టిందంటూ రాసుకొచ్చాడు. మీరు కూడా ఓసారి ఈ క్యూట్ వీడియోపై లుక్కేసి.. ఏమనిపిస్తుందో కామెంట్ చేసేయండి.