పాక్ పేరు తొలగించాలని కోరలేదు.. బీసీసీఐ బిగ్ రివీల్

పాకిస్థాన్ వేదికగా ఫిబ్రవరి 19 నుంచి మార్చి 9 వరకు ఛాంపియన్స్ ట్రోఫీ 2025 జరగనున్న విషయం తెలిసిందే. ఈ టోర్నీ హైబ్రిడ్ మోడల్‌లో జరగనుంది. భారత్ ఆడే మ్యాచ్‌లు యూఏఈ వేదికగా జరగనున్నాయి. మిగతా మ్యాచ్‌లన్నీ పాక్‌లోనే జరుగుతాయి. ఈ టోర్నీకి ఆతిథ్య దేశంగా పాకిస్థాన్ ఉంది. అయితే, సాధారణంగా ఐసీసీ టోర్నీల్లో పాల్గొనే జట్ల జెర్సీలపై ఆతిథ్య దేశాల పేర్లను ముద్రిస్తారు. కానీ, ఛాంపియన్స్ ట్రోఫీకి సంబంధించి భారత జెర్సీలపై పాకిస్థాన్‌ పేరును తొలగించాలంటూ బీసీసీఐ డిమాండ్‌ చేసిందని ఇటీవల వార్తలు వచ్చాయి. ఈ వార్తలపై బీసీసీఐ స్పందించింది.

అంతర్జాతీయ క్రికెట్ కౌన్సిల్ నిర్ణయాలకు తాము కట్టుబడి ఉంటామని బీసీసీఐ స్పష్టం చేసింది. భారత జెర్సీలపై పాకిస్థాన్ పేరు తొలగించాలని తాము డిమాండ్ చేయలేదని వెల్లడించింది. ఈ మేరకు బీసీసీఐ కార్యదర్శి దేవజిత్ సైకియా స్పష్టం చేశారు.

‘ఐసీసీ టోర్నమెంట్‌ సమయంలో ఏ క్రికెట్‌ బోర్డు అయినా, భారత జట్టు అయినా అంతర్జాతీయ క్రికెట్ కౌన్సిల్‌ ఆదేశాలకు కట్టుబడే ఉంటాయి. ఐసీసీ ఆదేశాలను ఉల్లంఘించాలని మేము అనుకోవడం లేదు. ఛాంపియన్స్ ట్రోఫీ జెర్సీలపై పాకిస్థాన్‌ పేరును తొలగించాలని మేం ఎలాంటి డిమాండ్ చేయాలేదు. జెర్సీలపై ఉండే ట్రోఫీకి సంబంధించిన లోగోలో తమ దేశం పేరు ఉండేందుకు ఆతిథ్య దేశమైన పాకిస్థాన్‌కు హక్కు ఉంటుంది’ అని బీసీసీఐ కార్యదర్శి దేవజిత్‌ సైకియా వివరణ ఇచ్చాడు.

వాస్తవానికి పాకిస్థాన్ పేరు తొలగించాలని బీసీసీఐ.. ఐసీసీని కోరినట్లు వార్తలు వచ్చాయి. దీనిపై పాకిస్థాన్ క్రికెట్ బోర్డు అభ్యంతరం తెలిపినట్లు ఆ వార్తల్లో పేర్కొన్నారు. కానీ, బీసీసీఐ వివరణతో అవన్నీ అబద్ధాలేనని తేలిపోయాయి.

ఇక ఇతర ఐసీసీ ట్రోఫీలో మాదిరిగానే ఛాంపియన్స్‌ ట్రోఫీ ప్రారంభానికి ముందు కూడా ఈ టోర్నీలో ఆడే దేశాల కెప్టెన్‌లతో సమావేశం, ఫొటో షూట్ ఉంటుంది. ఛాంపియన్స్ ట్రోఫీ ఫొటోషూట్‌ లాహోర్‌లో జరగాల్సి ఉంది. అయితే, ఈ ఫొటో షూట్‌ కోసం టీమిండియా కెప్టెన్‌ రోహిత్‌ శర్మ పాకిస్థాన్‌కు వెళతాడా..? లేదా..? అనే అంశంపై ఇప్పటివరకు ఎలాంటి నిర్ణయం తీసుకోలేదని బీసీసీఐ తెలిపింది. ఈ విషయంపై చర్చలు జరుగుతున్నట్లు పేర్కొంది.