టిడ్కో ఇళ్లు లబ్ధిదారులందరికీ శుభవార్త.. బ్యాంక్ రుణాలు చెల్లించనున్న ప్రభుత్వం

టిడ్కో లబ్ధిదారులకు భారీ ఊరట కలిగించేలా ఏపీ ప్రభుత్వం నిర్ణయం తీసుకుంది. ఈ విషయాన్ని టిడ్కో ఛైర్మన్ అజయ్ కుమార్ తెలిపారు. టిడ్కో ఇళ్లు ఇవ్వకుండా లబ్ధిదారుల పేరిట వైసీపీ ప్రభుత్వం బ్యాంకుల నుంచి రుణం తీసుకుందని టిడ్కో ఛైర్మన్ అజయ్ కుమార్ ఆరోపించారు. ఈ రుణాలను ప్రభుత్వమే చెల్లిస్తుందని హామీ ఇచ్చారు. వైసీపీ ప్రభుత్వం ఇళ్లు ఇవ్వకుండా టిడ్కో లబ్ధిదారుల పేరిట తీసుకున్న 145 కోట్ల రూపాయలను ప్రభుత్వం తరుఫున బ్యాంకులకు చెల్లిస్తామని టిడ్కో ఛైర్మన్ అజయ్ కుమార్ తెలిపారు. కృష్ణా జిల్లా జక్కంపూడిలో టిడ్కో ఇళ్లను ఆయన పరిశీలించారు. అనంతరం టిడ్కో ఛైర్మన్ ఈ విషయాన్ని ప్రకటించారు.

మరోవైపు టిడ్కో ఇళ్ల కోసం స్థలం ఇచ్చిన రైతులకు కూడా వైసీపీ హయాంలో డబ్బులు చెల్లించలేదని టిడ్కో ఛైర్మన్ ఆరోపించారు. వారికి కూడా డబ్బులు చెల్లిస్తామని ప్రకటించారు. అలాగే ప్రజలకు సొంతింటి కల నెరవేర్చేందుకు చంద్రబాబు నాయుడు అప్పట్లో టిడ్కో ఇళ్ల నిర్మాణం చేపట్టారని.. కానీ వైసీపీ హయాంలో వీటి నిర్మాణం ఆగిపోయిందన్నారు. నాలుగున్నర లక్షల మందికి టిడ్కో ఇళ్ల లబ్ధిదారులు ఉంటే.. వైసీపీ ప్రభుత్వంలో 2.60 లక్షల మందికే ఇళ్లు కేటాయించారని అజయ్ కుమార్ ఆరోపించారు. వైసీపీ ప్రభుత్వ చర్యల కారణంగా వందల కోట్ల రూపాయలు ప్రజా ధనం వృథా అయ్యిందంటూ టిడ్కో ఛైర్మన్ మండిపడ్డారు. మరోవైపు వచ్చే జూన్‌లోగా టిడ్కో ఇళ్లను పూర్తి చేసి లబ్ధిదారులకు అందిస్తామని టిడ్కో ఛైర్మన్ అజయ్ కుమార్ తెలిపారు. పనులు పూర్తి చేసేందుకు హడ్కో రూ.4,500 కోట్ల రుణం మంజూరు చేసినట్లు వివరించారు.

మరోవైపు ఏపీ ముఖ్యమంత్రిగా బాధ్యతలు చేపట్టిన అనంతరం సీఎం నారా చంద్రబాబు నాయుడు టిడ్కో ఇళ్లపై సమీక్ష నిర్వహించారు. జూన్ 12 నాటికి టిడ్కో ఇళ్లు పూర్తిచేసి లబ్ధిదారులకు అందించాలని అధికారులను ఆదేశించారు. చంద్రబాబు ఆదేశాలకు అనుగుణంగా టిడ్కో ఇళ్ల నిర్మాణం పూర్తి చేయటంపై అధికారులు ఫోకస్ పెట్టారు. తాజాగా ఇళ్లు ఇవ్వకుండా టిడ్కో లబ్ధిదారుల పేరుతో తీసుకున్న బ్యాంకు రుణాలను ప్రభుత్వమే చెల్లించాలని నిర్ణయించినట్లు సమాచారం. ఈ విషయాన్నే టిడ్కో ఛైర్మన్ అజయ్ కుమార్ శనివారం వెల్లడించారు.