తొమ్మిదేళ్ల బాలిక కడుపులో కిలో వెంట్రుకలు.. సర్జరీ చేసి తీసిన వైద్యులు

బిహార్‌లోని ముజఫర్‌పూర్‌కు చెందిన ఓ 9 ఏళ్ల బాలిక ఎప్పుడూ సరిగ్గా అన్నం తినేది కాదు. చిన్నప్పటి నుంచి అన్నం తినమనగానే మొహం చిరాగ్గా పెడతూ తల్లిదండ్రులకు చుక్కలు చూపించేంది. కానీ వారు మాత్రం బతిమాలో, బామాలో బుజ్జాయికి అన్నం పెట్టేవాళ్లు. అయితే వయసు పెరుగుతూ వస్తున్న కొద్దీ బాలిక అలాగే చేయడంతో బెదిరించి మరీ అన్నం పెట్టడం ప్రారంభించారు. అయితే ఇటీవలే ఆ చిన్నారికి కడుపు నొప్పి వచ్చింది. ఆహారం సరిగ్గా తినకపోవడం వల్లే అలా జరిగిందని భావించిన తల్లిదండ్రులు.. బలవంతంగా చిన్నారికి అన్నం తినిపించారు. దీంతో వెంటనే వాంతి చేసుకుంది.

అప్పుడు ఆపేసిన తర్వాతి రోజు అలాగే చేశారా అమ్మా, నాన్నలు. కానీ చిన్నారి మాత్రం వాంతులు చేసుకుంటూనే ఉంది. అలాగే కడుపు నొప్పంటూ విపరీతంగా ఏడవడం ప్రారంభించింది. దీంతో జనవరి 19వ తేదీన వాళ్లు స్థానికంగా ఉండే ఓ ఆస్పత్రికి వెళ్లారు. అయితే బాలికను పరీక్షించిన వైద్యులు.. ఆమె కడుపులో ఏదో గట్టి పదార్థం ఉందని చెప్పారు. చిన్నారినని వెంటనే ప్రభుత్వాసుపత్రికి తీసుకెళ్లి స్కానింగ్ చేయించాలని వివరించారు. అది విన్న తల్లిదండ్రులు వెంటనే ముజఫర్‌పూర్‌లోని శ్రీకృష్ణ మెడికల్ ఆస్పత్రికి వెళ్లారు.

అక్కడే వైద్యులు బాలికను పరీక్షించి ఆమెకు రక్తహీనత ఉందని గుర్తించారు. అలాగే చిన్నారి కడుపులో వెంట్రుకలు ఉన్నట్లు స్కానింగ్ ద్వారా తెలుసుకున్నారు. ఎలాగైనా సరే ఆ జుట్టును కడుపులోంచి తీసేయాలని చెప్పారు. అయితే రక్తం ఎక్కువగా లేదు కాబట్టి ముందు రక్తం ఎక్కించి ఆపై సర్జరీ చేశారు. ఇలా బాలిక కడుపులోంచి మొత్తంగా కిలో వెంట్రుకలను బయటకు తీశారు. ఆ తర్వాతే చిన్నారి తల్లిదండ్రులు వైద్యులతో మాట్లాడుతూ.. అసలు బాలిక కడుపులోకి ఇంత జుట్టు ఎలా వచ్చిందని అడిగారు.

ఈక్రమంలోనే వైద్యులు స్పందించి.. మీ అమ్మాయి ఎప్పుడైనా జుట్టు నమలడం వంటివి మీరు చూశారా అని అడిగారు. దీనికి వెంటనే తల్లిదండ్రులు అవునని.. కానీ చిన్నారి నమిలి ఉమ్మేస్తుందనుకున్నామని చెప్పారు. అలా చేయొద్దని చాలా సార్లు హెచ్చరించినా పాప వినలేదని తెలిపారు. కానీ ఇంత మొత్తంలో జుట్టు తినేసిందని మేము ఊహించలేదంటూ స్పష్టం చేశారు. అంతేకాకుండా చిన్నారి ఎప్పుడూ జుట్టు నములుతుందనే కోపంతోనే బాలికకు ఇటీవలే గుండు కూడా కొట్టించినట్లు వివరించారు. ఆ తర్వాతే కడుపు నొప్పి ఎక్కువైందని చెప్పగా.. పాపే జుట్టు తిందని వైద్యులు వెల్లడించారు.

ముఖ్యంగా బాలికకు ట్రికోటిలోమేనియా అనే మానసిక జబ్బు ఉందని.. దీని వల్లే ఆమెకు ట్రికోబీజర్ అనే వ్యాధి సోకిందని చెప్పారు. ఈ జబ్బు బారిన పడ్డ వారంతా జుట్టు తింటారని దీన్ని శస్త్ర చికిత్స ద్వారా మాత్రమే తొలగించగలమని వివరించారు. అయితే ఆ వ్యాధికి చికిత్స అందించాలని కూడా స్పష్టం చేశారు. బాలిక ఈ వ్యాధి నుంచి కోలుకోవాలంటే కాస్త సమయం పడుతుందని.. అప్పటి వరకు తల్లిదండ్రులు జాగ్రత్తగా ఉండాలని వివరించారు.