విమాన ప్రమాదంపై ప్రెస్‌మీట్‌లో ట్రంప్ సంచలన వ్యాఖ్యలు

అమెరికాలో బుధవారం రాత్రి ప్రయాణికుల విమానం, సైనిక హెలికాప్టర్ ఢీకొన్న ఘటనలో 67 మంది ప్రాణాలు కోల్పోయినట్టు అధికారులు వెల్లడించారు. విమానంలో ఉన్న 64 మందీ మృతిచెందారని ప్రకటించిన అధికారులు.. ఇప్పటి వరకూ 30 మృతదేహాలను వెలికితీశారు. పొటామక్ నదిలో ఇంకా రెస్క్యూ ఆపరేషన్ కొనసాగుతోంది. కాగా, విమాన ప్రమాదంపై అమెరికా అధ్యక్షుడు డొనాల్డ్ ట్రంప్‌ మీడియా సమావేశం నిర్వహించారు. ఈ సందర్భంగా ప్రమాద మృతులకు సంతాపంగా కాసేపు మౌనం పాటించారు. అనంతరం దుర్ఘటనకు సంబంధించి పలు విషయాలు వెల్లడించారు. ఇదే సమయంలో గత అధ్యక్షులు బరాక్‌ ఒబామా, జో బైడెన్‌ విధానాలపై ఆయన విమర్శలు గుప్పించారు.

గగతల భద్రతా ప్రమాణాలపై వారు రాజీపడ్డారని, ఇటువంటి ఘటనలకు ఓ విధంగా వారే కారణమని ఆరోపించారు. అయితే, తాను మాత్రం భద్రతకే తొలి ప్రాధాన్యం ఇస్తానని స్పష్టం చేశారు. ఒబామా, బైడెన్‌ సహా ఇతర డెమొక్రాట్లు తమ విధానాలకే తొలి ప్రాధాన్యతనిచ్చారని విమర్శించారు. వారు కొందరికే ప్రాధాన్యం ఇస్తే, తాము మాత్రం సమర్థులైన వారినే కావాలనుకుంటున్నామని వివరించారు. ఎయిర్‌ ట్రాఫిక్‌ కంట్రోల్‌ (ఏటీసీ)లో అనర్హులను నియమించారని, గతవారం అధ్యక్షుడిగా బాధ్యతలు చేపట్టిన తర్వాత తాను సంతకం చేసిన తొలి కార్యనిర్వాహక ఉత్తర్వుల్లో ఏటీసీ ప్రమాణాల పునరుద్ధరణ సైతం ఉన్నట్లు ట్రంప్ తెలిపారు.

సహాయక చర్యల్లో పాల్గొన్న రెస్క్యూ టీమ్‌ను ట్రంప్ అభినందించారు. విమాన ప్రమాదంలో అందరూ చనిపోయారని, దుర్ఘటన చాలా మందిని కుదిపేసిందని ఆవేదన వ్యక్తం చేశారు. అమెరికాతో పాటు ఇతర దేశాల ప్రజలపై దీని ప్రభావం ఉందని ఆయన తెలిపారు. ప్రాణాలు కోల్పోయినవారిలో రష్యన్లు సైతం ఉన్నట్లు చెప్పారు. ఈ ప్రమాదం తనను ఎంతో కలిచివేసిందని అన్నారు. ఘటన ఎలా జరిగిందో విచారణ చేపడతామని, మరోసారి ఇలాంటివి చోటుచేసుకోకుండా చర్యలు తీసుకుంటామని హామీ ఇచ్చారు.

ఫెడరల్‌ ఏవియేషన్‌ అడ్మినిస్ట్రేషన్‌, నేషనల్‌ ట్రాన్స్‌పోర్టేషన్‌ సేఫ్టీ బోర్డు, యూఎస్‌ సైన్యం సమగ్రంగా దర్యాప్తు చేపట్టునున్నట్టు స్పష్టం చేశారు. ఈ క్రమంలో ఎఫ్‌ఏఏకు తాత్కాలిక కమిషనర్‌ను నియమిస్తున్నట్లు వెల్లడించారు. ప్రమాదం జరిగిన సమయంలో ఏటీసీలో జరిగిన సంభాషణల టేపులను తాను విన్నానని చెప్పారు. ఈ ఘటన వెనక పైలట్‌ తప్పిదం ఉందా? అని మీడియా అడిగిన ప్రశ్నకు ట్రంప్‌ బదులిస్తూ.. విమానం సరైన మార్గంలోనే వెళ్లిందని, పైలట్‌ తప్పిదం లేదన్నారు. కానీ, ఇదే సమయంలో హెలికాప్టర్‌ అదే ఎత్తులో ఎగరడం వల్ల పెను ప్రమాదం చోటుచేసుకున్నట్టు తెలిపారు. ప్రమాదం జరిగిన వెంటనే సోషల్ మీడియాలో ట్రంప్ స్పందించి.. హెలికాపర్ట్ కిందకు లేదా పైకి ఎందుకు వెళ్లలేదని సందేహం వ్యక్తం చేశారు.