ఢిల్లీ కొత్త సీఎం ప్రమాణ స్వీకారం ఆలస్యం.. ఈనెల 13 తర్వాతే, కారణం అదే

ఢిల్లీలో కొత్త ప్రభుత్వ ఏర్పాటు కాస్త ఆలస్యం కానుంది. సంప్రదాయం ప్రకారం ముఖ్యమంత్రి అభ్యర్థిని ప్రకటించకుండానే.. ఢిల్లీ అసెంబ్లీ ఎన్నికల్లో పోటీ చేసిన బీజేపీ విజయం సాధించింది. ఈ నేపథ్యంలోనే ఇప్పుడు ఢిల్లీ పీఠంపై ఎవరిని కూర్చోబెట్టాలా అనే ఆలోచన చేస్తోంది. ఈ క్రమంలోనే ఆప్ కన్వీనర్, ఢిల్లీ మాజీ సీఎం అరవింద్ కేజ్రీవాల్‌ను ఈ ఎన్నికల్లో మట్టికరిపించిన పర్వేష్ వర్మ వైపే అందరి చూపు ఉంది. ఈ క్రమంలోనే ఆయన నిన్న ఫలితాలు వెల్లడైన తర్వాత కేంద్ర హోంశాఖ మంత్రి అమిత్ షాతో భేటీ కావడం ప్రాధాన్యం సంతరించుకుంది. అయితే సీఎం రేసులో మరికొంత మంది పేర్లు కూడా వినిపిస్తున్నాయి. ఢిల్లీ సీఎం ఆతిశీపై పోటీ చేసి స్వల్ప తేడాతో ఓటమి పాలైన బీజేపీ ఫైర్ బ్రాండ్ రమేష్ బిధూరీ పేరు పరిశీలనలో ఉన్నట్లు తెలుస్తోంది.

ఢిల్లీకి కాబోయే కొత్త సీఎం ఎవరు అనే విషయంపై ఫోకస్ పెట్టిన బీజేపీ అధిష్టానం.. అది నిర్ణయించేందుకు ఒకట్రెండు రోజుల్లో బీజేపీ పార్లమెంటరీ బోర్డు భేటీ కానున్నట్టు కాషాయ వర్గాల ద్వారా తెలుస్తోంది. ఇప్పటికే ఈ విషయంపై అమిత్ షా, జేపీ నడ్డాతో ప్రధానమంత్రి నరేంద్ర మోదీ చర్చలు జరిపారు. మరోవైపు.. రేపటి నుంచి ప్రధాని మోదీ 3 రోజుల పాటు విదేశీ పర్యటనకు వెళ్లనున్నారు. ఈలోపే సీఎం అభ్యర్థి ఎవరనేది నిర్ణయించనున్నట్లు తెలుస్తోంది. అయితే కొత్త ముఖ్యమంత్రి ప్రమాణ స్వీకారం మోదీ విదేశీ పర్యటన పూర్తి అయిన తర్వాతే నిర్వహించేలా బీజేపీ ఏర్పాట్లు చేస్తున్నట్లు సమాచారం. 27 ఏళ్ల తర్వాత ఢిల్లీ గడ్డపై కాషాయ జెండా ఎగురుతుండటంతో.. సీఎం ప్రమాణ స్వీకారాన్ని అంగరంగ వైభవంగా నిర్వహించాలని కమలం పార్టీ ఉవ్విళ్లూరుతోంది.

 మరోవైపు.. ఇటీవల జరిగిన ఢిల్లీ అసెంబ్లీ ఎన్నికల్లో గెలిచిన బీజేపీ ఎమ్మెల్యేలతో ఢిల్లీ బీజేపీ చీఫ్ వీరేంద్ర సచ్ దేవా ఇవాళ సాయంత్రం 5 గంటలకు సమావేశం కానున్నారు. ఈ సమావేశంలో బీజేపీ ముఖ్య నేతలు బైజయంత్ పాండా, బీఎల్ సంతోష్‌లు కూడా హాజరు కానున్నారు. భవిష్యత్ గురించి వీరంతా కొత్త ఎమ్మెల్యేలకు దిశా నిర్దేశం చేయనున్నట్లు సమాచారం. సీఎం రేసులో పర్వేష్ సాహిబ్ సింగ్ వర్మ పేరు ప్రముఖంగా వినిపిస్తోంది. ఆయనతోపాటు రమేష్ బిధూరీ, బన్సూరీ స్వరాజ్, స్మృతి ఇరానీ సహా పలువురి పేర్లు ఉన్నట్లు తెలుస్తోంది. ఈ నేపథ్యంలోనే ఢిల్లీ సీఎం పదవి ఎవరిని వరిస్తుంది అనేది ఇప్పుడు దేశవ్యాప్తంగా తీవ్ర ఉత్కంఠగా మారింది.