ప్రసవానికి ఆస్పత్రిలో చేరితే పరిహారం..రూ.320 కడితే రూ.5 లక్షల ప్రయోజనం

రహదారి ప్రమాదాలు, ఇతర ఘటనల్లో కుటుంబపెద్దను కోల్పోయినా, వైకల్యానికి గురైనా.. ఆ కుటుంబం పడే కష్టం అంతా ఇంతా కాదు. అప్పటి వరకూ అండగా ఉన్న చేయి దూరమైతే.. ఏం చేయాలో దిక్కుతోచని పరిస్థితి. అయితే అలాంటి సమస్యలు తలెత్తకుండా తపాలా శాఖ ప్రమాద బీమా అండగా నిలుస్తోంది. తక్కువ మొత్తంలో ఎక్కువ బీమాను అందిస్తూ పాలసీదారు ప్రమాదవశాత్తు చనిపోతే మూడు, నాలుగు నెలల్లోపే క్లెయిమ్‌ డబ్బులు అందించేలా చర్యలు తీసుకుంటోంది. తపాలా శాఖ ఆధ్వర్యంలోని ఇండియా పోస్టు పేమెంట్‌ బ్యాంకు అకౌంట్ ఉన్న వారికి పలు బీమా పథకాలను అందిస్తున్నారు. విజయనగరం తపాలా శాఖ సూపరింటెండెంటు శ్రీనివాసులు ఈ విషయాన్ని వెల్లడించారు. ప్రతి ఒక్కరూ తమ సమీపంలోని తపాలా శాఖ కార్యాలయాన్ని సంప్రదించి రూ.100తో ఇండియన్ పోస్టు పేమెంట్ బ్యాంక్ ఖాతా తెరవాలని సూచించారు

మరోవైపు ఖాతాదారుల కోసం తపాలా శాఖ అనేక బీమా పథకాలు తెచ్చినట్లు విజయనగరం తపాలా శాఖ సూపరింటెండెంటు శ్రీనివాసులు తెలిపారు. ఏడాదికి రూ.320 నుంచి రూ.800 వరకు ప్రీమియం చెల్లిస్తే ఐదు లక్షల నుంచి 10 లక్షల వరకూ బీమా పరిహారం వస్తుందని వివరించారు. పలు కంపెనీల బీమా పథకాలను అమలు చేస్తున్నట్ల తపాలా శాఖ సూపరిటెండెంట్ శ్రీనివాసులు వివరించారు. టాటా ఏఐజీ, ఆదిత్య బిర్లా క్యాపిటల్, బజాజ్ ఎలియాంజ్, నివాబూప, స్టార్‌ హెల్త్‌ సంస్థల బీమా పథకాలను అమలు చేస్తున్నామన్నారు. టాటా ఏఐజీ స్కీమ్ కింద రూ.320 కడితే రూ.5 లక్షల వరకూ బీమా పరిహారం వస్తుందన్నారు. అలాగే రూ.520 ప్రీమియం చెల్లించి ఇన్సూరెన్స్ తీసుకుంటే రూ.10 లక్షల బీమా పరిహారం వర్తిస్తుందని వివరించారు.

మరోవైపు నివాబుపా కంపెనీ స్కీమ్ కింద అనుసంధానమైతే ఆసుపత్రుల్లో ప్రసవానికి కూడా పరిహారం పొందేందుకు అవకాశం ఉందని తపాలా శాఖ అధికారులు తెలిపారు. పలువురు లబ్ధిదారులకు అందాల్సిన బీమా పరిహారాన్ని తపాలా శాఖ సూపరిటెండెంట్ అందజేశారు. ఈ సందర్భంగానే తపాలా శాఖ అందిస్తున్న బీమా సౌకర్యాన్ని ఉపయోగించుకోవాలని సూచించారు. విజయనగరం డివిజన్‌ పరిధిలో ఇప్పటికే 1.42 లక్షల మంది ఇండియా పోస్ట్ బ్యాంక్ అకౌంట్లు చేయించుకున్నట్లు తెలిపారు. ప్రభుత్వ రంగ సంస్థ కావున ఆందోళన అవసరం లేదని, సమీపంలోని తపాలాశాఖ కార్యాలయంలో సంప్రదించాలని అధికారులు సూచించారు.