అలా అమ్మాయిలకు మెసేజ్‌లు చేయడం నేరమే..: ముంబయి కోర్టు

అమ్మాయిల ప్రొఫైల్ ఫొటోలు కనిపిస్తే చాలు.. కొందరు అబ్బాయిలు వెంటనే మెసేజ్‌లు చేయడం ప్రారంభిస్తారు. మీరు చాలా బాగున్నారు, అందంగా కనిపిస్తున్నారు, మీకు పెళ్లి అయిందా లేదా, నాతో మాట్లాడొచ్చు కదా, మీకు ఈ డ్రెస్ బాగుంది, చీర కట్టుకుని రెడీ అయి ఫొటోలు పెట్టొచ్చు కదా అంటూ అడిగేస్తుంటారు. అలాంటి వారందరికీ షాక్ ఇస్తూ ముంబయి సెషన్స్ కోర్టు ఈ షాకింగ్ తీర్పు ఇచ్చింది. గుర్తు తెలియని మహిళకు ఈ రకమైన సందేశాలు పంపడం కూడా నేరం కిందకే వస్తుందని తేల్చి చెప్పింది. ఓ మహిళకు ఇలా మెసేజీలు చేసిన వ్యక్తికి మూడు నెలల జైలు శిక్ష కూడా విధించింది. ఆ పూర్తి వివరాలు మీకోసం.

2020లో మాజీ మహిళ కార్పొరేటన్ తన భర్తతో కలిసి ఓ వ్యక్తిపై కేసు పెట్టింది. వాట్సాప్ ద్వారా తరచుగా మెసేజీలు చేస్తూ ఓ వ్యక్తి తనను వేధిస్తున్నాడని వివరించింది. కేసు నమోదు చేసుకుని దర్యాప్తు చేపట్టిన పోలీసులు అతడిని అరెస్ట్ చేశారు. ఆపై ముంబయి మేజిస్ట్రేట్ కోర్టులో హాజరు పరిచారు. ఈక్రమంలోనే విచారణ చేపట్టిన న్యాయస్థానం సాక్ష్యాధారాలను పరిశీలించి మరీ అతడికి మూడు నెలల శిక్ష విధించింది. అయితే తానేమీ తప్పు చేయలేదంటూ సదరు యువకుడు సెషన్స్ కోర్టుకు వెళ్లారు. ఈక్రమంలోనే ఫిబ్రవరి 18వ తేదీ రోజును సెషన్స్ కోర్టు విచారణ జరిపింది.

రాత్రిపూట గుర్తు తెలియని అమ్మాయిలకు నువ్వు స్లిమ్‌గా ఉన్నావు, చాలా స్మార్ట్‌గా కనిపిస్తున్నావు, అందంగా ఉన్నావు, నువ్వంటే నాకిష్టం, నీకు పెళ్లైందా లేదా అంటూ మెసేజీలు పంపపడం అశ్లీలత కిందకే వస్తుందని చెప్పింది. కావాలనే సదరు యువకుడు మాజీ కార్పొరేటర్‌కు ఈ రకమైన మెసేజీలను అర్ధరాత్రి పంపించినట్లు పూర్తి ఆధారాలు ఉన్నాయని అదనపు సెషన్స్ జడ్జి డిజి ధోబ్లే వెల్లడించారు. మెసేజీలు చేసిన వ్యక్తి ఫిర్యాదుదారుడికి తెలియదని.. ఇలాంటి మెసేజీలు పంపిస్తే ఆమె భర్త కూడా ఏమాత్రం సహించరని చెప్పారు. ఈక్రమంలోనే సదరు వ్యక్తి దోషిగా తేలుస్తున్నట్లు వివరించి మేజిస్ట్రేట్ కోర్టు విధించిన మూడు నెలల శిక్షను అమలు చేయాలని స్పష్టం చేశారు.

కానీ నిందితుడు మాత్రం కావాలనే వాళ్లు తనపై తప్పుడు ఆరోపణలు చేస్తున్నట్లు చెప్పగా.. స్పందించిన జడ్జి ఏ మహిళ కూడా ఓ వ్యక్తిపై ఆరోపణలు చేసేందుకు తన గౌరవాన్ని ఫంణంగా పెట్టరని వివరించారు. మీరు మెసేజీలు చేసినట్లు అన్ని ఆధారాలు ఉన్నాయంటూనే వాటిని మరోసారి అతడికి చూపించారు.