పాకిస్థాన్‌తో మ్యాచ్‌లో కోహ్లీ సెంచరీ,,,సంతోషం పట్టలేకపోయిన ఫ్యాన్

గత కొన్ని రోజులుగా ఆశించిన మేర రాణించలేకపోతున్న టీమిండియా స్టార్ బ్యాటర్ విరాట్ కోహ్లీ.. ఛాంపియన్స్ ట్రోఫీలో ఫామ్‌లోకి వచ్చేశాడు. తనకు అచ్చొచ్చిన పాకిస్థాన్‌పై మరోసారి చెలరేగిపోయాడు. పాక్‌తో మ్యాచ్ అంటేనే రెచ్చిపోయే కోహ్లీ.. మరోసారి అదే పునరావృతం చేశాడు. సెంచరీ చేసి జట్టును గెలిపించాడు. దీంతో తన ఫ్యాన్స్‌ను సంతోషంగా ముంచెత్తాడు. ఈ నేపథ్యంలో కోహ్లీ ఫ్యాన్స్ సంబురాలు చేసుకున్నారు. రోడ్ల మీదకు వచ్చి టపాసులు కాల్చి.. స్వీట్లు పంచుకున్నారు.

అయితే విరాట్ కోహ్లీ సెంచరీ చేశాక.. ఓ యంగ్ ఫ్యాన్ ఇచ్చిన రియాక్షన్ సోషల్ మీడియాలో తెగ వైరల్ అవుతోంది. అతడు సంతోషంతో ఇల్లు పీకి పందిరి వేసినంత రచ్చ రచ్చ చేసి పడేశాడు. తన అభిమాన ప్లేయర్ సెంచరీ చేయడం చూసి.. పూనకం వచ్చినోడిలా డ్యాన్స్ చేశాడు. పుష్ప 2లో జాతర సాంగ్‌లో అల్లు అర్జున్ డ్యాన్స్ చేసినట్లు.. సంతోషంతో స్టెప్పులేశాడు. ఇందుకు సంబంధించిన వీడియో సోషల్ మీడియాలో వైరల్‌గా మారింది.

భారత్- పాకిస్థాన్ మ్యాచ్‌ను అతడు ఇంట్లో వాళ్లతో కలిసి టీవీలో చూస్తున్నాడు. కోహ్లీ సెంచరీ చేశాక.. ఇల్లు దద్దరిల్లేలా గట్టిగా ఐ లవ్ యూ కోహ్లీ అంటూ అరుస్తూ రూమ్ మొత్తం పరిగెత్తాడు. ఆనందంతో పూనకం వచ్చినట్టు చేశాడు. షర్ట్ తీసేసి.. అరుస్తూ రచ్చ రచ్చ చేశాడు. అంతేకాదండోయ్.. కోహ్లీని దేవుడిని చూశాడో ఏమో.. టీవీ ముందు బోర్లా పడుకుని సాష్టాంగ నమస్కారం చేశాడు. యెస్ యెస్ అంటూ చప్పట్లు కొడుతూ తనలో అసలు సిసలు క్రికెట్ ఫ్యాన్‌ను బయటకు తీసుకొచ్చాడు. ఇది చూసిన అతడి కుటుంబ సభ్యులు.. ఏమైందిరా అన్నట్లు లుక్ ఇచ్చారు. కానీ అతడు అవేమీ పట్టించుకోలేదు.

కాగా పాకిస్థాన్‌తో మ్యాచులో కోహ్లీ చెలరేగి ఆడాడు. ఈ టోర్నీలో బంగ్లాదేశ్‌‌తో ఆడిన తొలి మ్యాచ్‌లో పెద్దగా రాణించలేదు కోహ్లీ. కానీ పాక్‌తో మ్యాచులో 111 బంతుల్లో 100 పరుగులు చేసి నాటౌట్‌గా నిలిచాడు. ఫోర్ కొట్టును జట్టును గెలిపించడంతో పాటు.. సెంచరీని పూర్తి చేసుకున్నాడు. కాగా కోహ్లీ కెరీర్‌లో ఇది 82వ అంతర్జాతీయ సెంచరీ కావడం గమనార్హం.