ఇకపై సూపర్‌స్పెషాలిటీ ఆస్పత్రిలో క్యాజువాలిటీ

అనంతపురం జిల్లా కేంద్రంలోని సూపర్‌స్పెషాలిటీ ఆస్పత్రిలో క్యాజువాలిటీ(అత్యవసరసేవలు)సేవలు అందించానికి అడు గులు పడుతున్నాయి. క్యాజువాలిటీ సేవలందించాలని ఇప్పటికే డీఎంఈ ఆదేశించారు. ఆదిశగా జిల్లా ఆస్పత్రి వైద్యాధికారులు కసరత్తు చేస్తున్నారు. అయితే ఈక్యాజువాలిటీ వ్యవహారం చిచ్చురేపుతోంది. ఎక్కడా సూపర్‌స్పెషాలిటీలలో క్యాజువాలిటీ లేదని, రెఫర్‌ కేసులు వస్తే వారికి మెరుగైన వైద్యంతో పాటు అరుదైన ఆపరేషన్లు చేస్తామని అక్కడి డాక్టర్లు చెబుతున్నారు.అలాకాకుండా నిరంతరం సేవలందించాలని క్యాజువాలిటీ ఏర్పాటు చేస్తే ఉన్న డాక్టర్లు, సిబ్బంది 24గంటలు పాటు ఎలా సేవలందించాలని ప్రశ్నిస్తున్నారు. ఈ విషయాన్ని ఇప్పటికే డీఎంఈతోపాటు జిల్లాఆస్పత్రి వైద్యాధికారులకు చెప్పినట్లు సమాచారం. కానీ ఈనెల 15లోగా క్యాజువాలిటీ ఏర్పాటు చేసి అక్కడ సేవలను అందుబాటులోకి తీసుకురావాలని వైద్యాధికారులు యత్నిస్తున్నారు. నెల రోజుల కిందట డీఎంఈ వెంకటేశ్వరరావు అనంతకు వచ్చారు. అపుడు జిల్లా ఆస్పత్రి, సూపర్‌స్పెషాలిటీలను పరిశీలించారు. జిల్లా ఆస్పత్రిలో క్యాజువాలిటీలో ఎక్కువ వసతులు లేక సేవలు అందించలేక పోతున్నారని పలువురు ఫిర్యాదు చేశారు. ఈ నేపథ్యంలో సూపర్‌ స్పెషాలిటీలో సంబంధిత విభాగాల కేసులకు సేవలందించడానికి క్యాజువాలిటీ ఏర్పాటు చేయాలని సూచించి వెళ్లారు. అంతటితో ఆగకుండా ఇదే విషయంపై ఇటీవల జిల్లా ఆస్పత్రి వైద్యాధికారులతో చర్చించారు. ఈనెల15లోగా క్యాజువాలిటీ ఏర్పాటు చేయాలని సీరియ్‌సగా ఆదేశించారు. దీంతో జిల్లా ఆస్పత్రి అదికారులు క్యాజువాలిటీ ఏర్పాటుపై కసరత్తు చేస్తున్నారు. కాగా.. సూపర్‌స్పెషాలిటీ ఆస్పత్రిలో క్యాజువాలిటీ ఏర్పాటు చేయడంపై అక్కడ పనిచేస్తున్న డాక్టర్లు తీవ్రంగా వ్యతిరేకిస్తున్నారని తెలుస్తోంది.