అమెరికాకు షాకిచ్చిన కెనడా, మెక్సికో, చైనా

పలు దేశాలపై ప్రతీకార సుంకాలను విధించి అమెరికా అధ్యక్షుడు డొనాల్డ్ ట్రంప్ మొదలుపెట్టిన వాణిజ్య యుద్ధం తీవ్రతరమైంది. గతంలో ఉన్న 10 శాతం సుంకాలను అమెరికా 20శాతానికి పెంచగా.. తీనికి ప్రతీకారంగా చైనా 10-15 శాతం సుంకాలు విధించింది. అలాగే, కెనడా, మెక్సికోలపై ట్రంప్ విధించిన సుంకాలు మంగళవారం నుంచి అమల్లోకి వచ్చాయి. దీనికి ప్రతీకారంగా అమెరికాపై కెనడా 25 శాతం సుంకాలను వడ్డించింది. మెక్సికో సైతం అదే బాటలో వెళ్తామని ప్రకటించింది. సుంకాల ప్రభావంతో అమెరికా మార్కెట్లు కుదేలుకాగా..ఆసియా-పసిఫిక్, ఆస్ట్రేలియా మార్కెట్ల కూడా ఒడిదొడుకులు చోటుచేసుకున్నాయి.

చైనా వస్తువులపై సుంకాలను 20శాతానికి పెంచుతూ ట్రంప్ సంతకం చేసిన కార్యనిర్వాహక ఉత్తర్వులు.. మంగళవారం నుంచి అమల్లోకి వచ్చాయి. దీనికి ప్రతీకారంగా అమెరికా నుంచి దిగుమతయ్యే వస్తువులపై 10- 15 శాతం సుంకాలను చైనా విధించింది. జొన్నలు, సోయాబీన్, పోర్క్, బీఫ్, చేపలు, రొయ్యలు, పీతలు, పండ్లు, కూరగాయలు, పాల ఉత్పత్తులపై 10 శాతం.. చికెన్, గోధుమ, మొక్కజొన్న, పత్తి వంటి ఉత్పత్తులపై 15 శాతం సుంకాలు విధిస్తున్నట్టు తెలిపింది. ఇవి మార్చి 10 నుంచి అమల్లోకి వస్తాయని చైనా ఆర్థిక మంత్రిత్వశాఖ ఒక ప్రకటనలో తెలిపింది.

దీంతోపాటు ప్రపంచ వాణిజ్య సంస్థలోనూ అమెరికాపై డ్రాగన్ కంట్రీ ఫిర్యాదు చేసింది. అలాగే, రక్షణ, భద్రత, ఏఐ, వైమానిక, ఐటీ సహా 10 అమెరికా సంస్థలపై ఆంక్షలను విధించింది. కానీ, అమెరికాతో ఇప్పటికీ తాము చర్చలకు సిద్ధంగా ఉన్నామన్న చైనా.. సమస్యలను సామరస్యంగా పరిష్కరించుకునేందుకు ముందుకు వస్తామని ఆఫర్ ఇచ్చింది.

అటు, కెనడా సైతం తమపై సుంకాలకు ప్రతీకారంగా 25 శాతం మేర టారిఫ్‌లు విధించింది. అమెరికా నుంచి దిగుమతి చేసుకునే ఆల్కహాల్, పండ్లు సహా 107 బిలియన్‌ డాలర్ల ఉత్పత్తులపై 25% సుంకం విధిస్తున్నట్లు కెనడా ప్రధాన మంత్రి జస్టిన్‌ ట్రూడో వెల్లడించారు. ఇవీ మంగళవారం నుంచే అమల్లోకి వచ్చినట్లు ఆయన తెలిపారు. దీనివల్ల అమెరికా ప్రజలు నిత్యావసరాలు, గ్యాస్, కార్లకు అధిక ధరలను చెల్లించాల్సి వస్తుందని పేర్కొన్నారు.

‘‘తమ అత్యంత సన్నిహిత భాగస్వామి, మిత్రుడు, అత్యంత సన్నిహిత మిత్రుడు అయిన కెనడాపై అమెరికా వాణిజ్య యుద్ధాన్ని ప్రారంభించింది.. అదే సమయంలో రష్యాతో సానుకూలంగా పనిచేయడం గురించి, అబద్ధాలకోరు, హత్యలు చేసే నియంత వ్లాదిమిర్ పుతిన్‌ను సంతృప్తి పరచడం గురించి ఇంగితం లేకుండా మాట్లాడుతున్నారు.’’ అని ట్రూడో మండిపడ్డారు. కాగా, అమెరికా విధించిన దిగుమతి సుంకాలపై త్వరలోనే స్పందిస్తామని మెక్సికో అధ్యక్షురాలు క్లౌడియా షీన్‌బామ్‌ ప్రకటించారు.