నిరసనలు చేస్తే నిధులు నిలిపేస్తా.. ట్రంప్ బిగ్ వార్నింగ్

అమెరికా అధ్యక్షుడిగా రెండోసారి బాధ్యతలు చేపట్టిన తర్వాత డొనాల్డ్ ట్రంప్ దూకుడుగా వ్యవహరిస్తున్నారు. అక్రమ వలసదారుల తరలింపు, ఉద్యోగాల్లో కోత, సుంకాలు పెంపు వంటి చర్యలతో ట్రంప్ హడలెత్తిస్తున్నారు. ఈ క్రమంలో ఆయన మరో కీలక ప్రకటన చేశారు. చట్టవిరుద్ధంగా నిరసనలు, ఆందోళనలకు అనుమతించే విద్యా సంస్థలు, స్కూళ్లు, యూనివర్సిటీలకు ఫెడరల్ ప్రభుత్వం నిధులను నిలిపివేస్తానని ఆయన హెచ్చరించారు. అంతేకాదు, ఆందోళనకారులకు జైలుశిక్ష లేదా బహిష్కరణ తప్పదని ట్రంప్ వార్నింగ్ ఇచ్చారు. అమెరికా పౌరులైతే తీవ్రతను బట్టి అరెస్టు వంటి చర్యలుంటాయని అధ్యక్షుడు స్పష్టం చేశారు. ఈ మేరకు తన సొంత సామాజిక మాధ్యమం ట్రూత్ సోషల్‌లో ట్రంప్ పేర్కొన్నారు.

‘చట్టవిరుద్ధమైన నిరసనలను అనుమతించే కళాశాలలు, పాఠశాలలు లేదా యూనివర్సిటీలకు అన్ని ఫెడరల్‌ నిధులు నిలిపివేస్తా... ఆందోళన చేపట్టినవారిని జైలుకు పంపడం లేదా వారిని అమెరికా నుంచి వెళ్లగొట్టడం జరుగుతుంది.. అమెరికా విద్యార్థులైతే శాశ్వత బహిష్కరణ లేదా కేసు తీవ్రతను బట్టి అరెస్టు ఉంటుంది. ఇందులో ఎలాంటి దాపరికం లేదు.. ఈ విషయంపై దృష్టి పెట్టినందుకు ధన్యవాదాలు’’ అని ట్రంప్‌ పోస్ట్ పెట్టారు.

అమెరికాలో స్వేచ్ఛ, వాక్ స్వాతంత్య్ర ప్రాముఖ్యతను తాను, తన పార్టీ (రిపబ్లికన్ పార్టీ) కట్టుబడి ఉన్నా.. జాతివ్యతిరేక నిరసనలను సహించేది లేదని గతంలోనే ట్రంప్ స్పష్టం చేశారు. అమెరికా విద్యా వ్యవస్థలో సమూల మార్పులు తీసుకొస్తానని చెప్పిన ఆయన.. విద్యాశాఖను తొలగించి, దానిని రాష్ట్రాలకు అప్పగిస్తానని తెలిపారు. ఈ క్రమంలో అమ్మాయిల క్రీడల్లో ట్రాన్స్‌జెండర్లు పాల్గొనకుండా నిషేధించారు. లింగ, జాతి వివక్ష గురించి బోధించే విద్యా సంస్థల నిధుల్లో కోత విధిస్తానని ఇంతకు ముందు హెచ్చరించారు.

కానీ, గాజాలో ఇజ్రాయేల్ సైన్యం దాడులకు వ్యతిరేకంగా ఇటీవల కొలంబియా యూనివర్సిటీ విద్యార్థులు చేపట్టిన నిరసనలను ప్రభుత్వం తీవ్రంగా పరిగణిస్తోంది. వీటిని నిలువరించడంలో వర్శిటీ యంత్రాంగం విఫలమైందని భావిస్తోన్న ప్రభుత్వం.. 50 మిలియన్‌ డాలర్ల కాంట్రాక్టులను రద్దు చేసే యోచనలో ఉన్నట్లు తెలుస్తోంది. అయితే, ఇది భావప్రకటన స్వేచ్ఛను హరించడమేనని నిపుణులు మండిపడుతున్నారు. ట్రంప్ హెచ్చరికలు రాజ్యాంగ విరుద్దమని ఆగ్రహం వ్యక్తం చేస్తున్నారు.