పొగాకు రైతులతో సమావేశమైన ఎగ్జిక్యూటీవ్ డైరెక్టర్
Andhra Pradesh Telugu | Suryaa Desk | Published : Thu, Mar 06, 2025, 10:08 AM
రైతులు ఆర్థికంగా అభివృద్ధి చెందాలన్నదే తమ లక్ష్యం అని పొగాకు బోర్డు గుంటూరు ఎగ్జిక్యూటీవ్ డైరెక్టర్ అద్దంకి శ్రీధర్బాబు అన్నారు. బుధవారం స్థానిక పొగాకు వేలంకేంద్రం ఆవరణలో వేలం నిర్వహణాధికారి గిరి రాజ్ కుమార్ అధ్యక్షతన రైతులకు ఏర్పాటు చేసిన అవగాహన కార్యక్రమంలో ఆయన పాల్గొని మాట్లాడారు. అన్నదాతలు ఏడాది పొడవున ఎన్నో కష్ట నష్టాలకు ఓర్చి పంటలు సాగుచేస్తారన్నారు. అందుకు ప్రతి ఫలంగా మంచి ధరలు ఉంటే రైతు కష్టాన్ని కూడా మర్చిపోతారన్నారు. అలా మంచిధరలు ఉండా లంటే పొగాకులో నాణ్యతప్రమాణాలు పాటించాలని రైతులకు సూచించారు. మొక్కనాటిన దగ్గర నుంచి బేళ్లు ఏర్పాటు చేసేంత వరకు ఎంతో జాగ్రత్తగా ఉండాలన్నారు. రైతులు నాణ్యతలో ఎలాంటి వ్యత్యాసం లేకుండా మండెలు ఏర్పాటు చేయాలని అదేవిధంగా గ్రేడింగ్, బేళ్లు ఏర్పాటు చేయడంలో తగు జాగ్రత్తలు తీసుకో వాలని సూచించారు. అనంతరం సిబ్బందితో సమీక్ష సమావేశం నిర్వహించారు. వేలానికి సంబంధించిన ఏర్పాట్లు రైతులకు ఎటువంటి ఇబ్బందులు తలెత్త కుండా చూసుకోవాలన్నారు. ఈ ఏడాది కొనుగోళ్లు ప్రారంభం అవుతున్న సందర్భంగా బోర్డ్ను పరిశీలించి ఏర్పాట్లను పరిశీలించారు. మర్చి 10వతేదీ నుండి వేలం ప్రారంభం అవుతుందన్నారు. వేలంకేంద్రం ఆవరణలో వసతులను పరిశీలించి వేలానికి వచ్చే రైతులకు ఇబ్బందులు లేకుండా వసతులు కల్పించాలని చెప్పారు. ఈ ఏడాది మంచిధరలు ఉండాలని ఆకాంక్షించారు.
|
|