అసెంబ్లీ నుంచి సస్పెండ్ చేయించమంటారా.. ఏపీ మంత్రికి నారా లోకేష్ వార్నింగ్

ఆంధ్రప్రదేశ్‌‌ అసెంబ్లీ లాబీలో ఆసక్తికర సన్నివేశం కనిపించింది. ఇరిగేషన్ మంత్రి నిమ్మల రామానాయుడితో విద్యాశాఖ మంత్రి నారా లోకేష్ మధ్య ఆసక్తికర సంభాషణ జరిగింది. మంత్రి రామానాయుడు అనారోగ్యంతో బాధపడుతున్నారు.. అయినా సరే అసెంబ్లీకి వచ్చారు. లాబీలో మంత్రి లోకేష్‌ ఎదురుపడగా.. చేతికి ఉన్న సెలైన్ కాన్యులా చూసి ఆరా తీశారు. విశ్రాంతి తీసుకోకుండా సభకు ఎందుకు వచ్చారని ప్రశ్నించారు. రెస్ట్ తీసుకుంటారా.. సభ నుంచి సస్పెండ్ చేయించమంటారా అన్నారు. ఆరోగ్యాన్ని కూడా పణంగా పెట్టి పనిచేస్తానంటే సభ నుంచి సస్పెండ్ చేయించాల్సిందే అన్నారు. ఇలా చేస్తే ఆరోగ్యం ఏం అవుతుందని ప్రశ్నించారు. రెండు చేతులకు సెలైన్ కాన్యులా ఉండటాన్ని చూసి షాకయ్యారు.

తనకు గురువారంతో పోలిస్తే ఆరోగ్యం కాస్త మెరుగ్గానే ఉందని.. అందుకే సభకు హాజరయ్యానని చెప్పారు. విశ్రాంతి, మంచి నిద్రతో ఆరోగ్యం కుదుటపడుతుందని లోకేష్ రామానాయుడితో అన్నారు. ఇలాగే చేస్తే.. తన మాట వినకపోతే తన చేతికి ఉన్న యాపిల్ వాచ్‌ను రామానాయుడి చేతికి పెడతానని.. తాను నిద్రను మానిటర్ చేస్తానన్నారు. తనకు పని ఒత్తిడిగా అనిపిస్తే వెంటనే 15 నిమిషాల పాటూ టీవీ చూస్తూ పడుకుంటే ఎంతో రిలాక్స్‌గా ఉంటుందన్నారు లోకేష్. 'మీరు కూడా ఈ పద్దతిని ప్రయత్నించి చూడండి అన్నా'అంటూ రామానాయుడికి సూచించారు.

అసెంబ్లీ లాబీల్లో మంత్రులు రామానాయుడు, లోకేష్‌ల మధ్య జరిగిన చర్చ అసెంబ్లీ వరకు వెళ్లింది. మంత్రి నిమ్మల రామానాయుడు ఆరోగ్యంపై మంత్రి నారా లోకేష్ ప్రస్తావించారు. రామానాయుడు కీలక శాఖలో మంత్రిగా ఉన్నారని.. ఆయన స్వల్ప అస్వస్థతతో బాధపడుతున్నారని.. మంత్రి విశ్రాంతి తీసుకోవడానికి రూలింగ్ ఇవ్వాలని డిప్యూటీ స్పీకర్ రఘురామ కృష్ణరాజును మంత్రి లోకేష్ కోరారు. లోకేష్ రిక్వెస్ట్‌కు బీజేపీ ఎమ్మెల్యే విష్ణు కుమార్ రాజు కూడా మద్దతు తెలపడం విశేషం. అసెంబ్లీలో ప్రశ్నోత్తరాల సమయంలో మంత్రి రామానాయుడు గోరకల్లు రిజర్వాయర్ రక్షణ గోడ నిర్మాణంపై శాసనసభలో మంత్రి నిమ్మల రామానాయుడు సమాధానం ఇచ్చిన అనంతరం ఇలా జరిగింది.

నిమ్మల రామానాయుడు మొదటి నుంచి ప్రజల్లో ఉంటారనే పేరు ఉంది. పాలకొల్లో నియోజకవర్గంలో ప్రతి ఇంటికి వెళతారనే ప్రశంసలు అందుకున్నారు. అలాగే మంత్రిగా బాధ్యతలు స్వీకరించిన తర్వాత ఇరిగేషన్‌పై ఫోకస్ పెట్టారు.. విజయవాడ వరదల సమయంలో బుడమేరు కాలువకు గండి పడితే దగ్గరుండి వర్షాన్ని కూడా లెక్క చేయకుండా దగ్గరుండి పనులు చేయించి గండిని పూడ్పించారు. మొత్తం మీద మంత్రి నిమ్మల రామానాయుడు ఆరోగ్యం గురించి అసెంబ్లీలో ఆసక్తికర చర్చ జరిగింది.. ప్రస్తుతం తన ఆరోగ్యం కొంచెం కుదుటపడిందని మంత్రి తెలిపారు.