మహిళల కోసం ఎస్బీఐ కొత్త స్కీమ్ 'అస్మిత'.. ఏ గ్యారెంటీ లేకుండా లక్షల్లో రుణాలు!

మహిళలకు అదిరే శుభవార్త చెప్పింది దేశీయ అతిపెద్ద బ్యాంక్ అయిన స్టేట్ బ్యాంక్ ఆఫ్ ఇండియా. మహిళల కోసం ఎలాంటి తనఖా లేకుండా రుణాలు ఇచ్చేందుకు కొత్త పథకాన్ని తీసుకొచ్చింది. అంతర్జాతీయ మహిళా దినోత్సవం సందర్భంగా గత శుక్రవారం అస్మిత  పేరుతో ఈ పథకాన్ని లాంచ్ చేసింది. ఈ స్కీమ్ ద్వారా మహిళా ఎంటర్‌ప్రీన్యూర్లకు తక్కువ వడ్డీకే తనఖా లేని రుణాలు అందిస్తామని బ్యాంక్ తెలిపింది. ఆ వివరాలు తెలుసుకుందాం.

వినియోగ ప్రయోజనాల కోసం రుణాలు తీసుకునేందుకు ఇష్టపడే మహిళలు వ్యాపారం కోసం రుణాలకు తక్కువ ప్రాధాన్యత ఇస్తున్నారని ట్రాన్స్ యూనియన్ సిబిల్ ఇటీవలే ఓ నివేదిక విడుదల చేసింది. ఈ రిపోర్ట్ వెలుగులోకి వచ్చిన కొన్ని రోజుల్లోనే ఎస్‌‍బీఐ ఈ మేరకు మహిళా వ్యాపారవేత్తల కోసం సరికొత్త లోన్ స్కీమ్ తీసుకురావడం గమనార్హం. తక్కువ వడ్డీ, తనఖా లేకుండా రుణాలను మహిళా ఎంటర్‌ప్రీన్యూర్స్ ఉపయోగించుకోవాలని బ్యాంక్ కోరింది.

  లీడింగ్ క్రెడి సమాచార కంపెనీ నివేదిక ప్రకారం కేవలం 3 శాతం మాత్రమే మహిళలు వ్యాపారాల కోసం రుణాలు తీసుకుంటున్నారు. ఇక వ్యక్తిగత ఆర్థిక అవసరాల కోసం అంటే పర్సనల్ లోన్స్, కన్జ్యూమర్ డ్యూరబుల్ లోన్స్, ఇంటి కోసం 42 శాతం మేర రుణాలు తీసుకుంటున్నారు. అలాగే బంగారం తనఖా పెట్టి 38 శాతం రుణాలు పొందుతున్నట్లు నివేదిక తెలిపింది. మహిళల కోసం కొలాటర్ ఫ్రీ లోన్ పథకం అస్మిత లాంచ్ సందర్భంగా ఎస్‌బీఐ బ్యాంక్ ఛైర్మన్ సీఎస్ శ్రీనివాసులు శెట్టి కీలక వ్యాఖ్యలు చేశారు. ' మహిళల నేతృత్వంలోని సూక్ష్మ, చిన్న, మధ్య తరహా పరిశ్రమల కోసం డిజిటల్, వ్యక్తిగత ప్రాసెస్ ద్వారా చాలా వేగంగా, సులభంగా రుణాలు మంజూరు చేయనున్నాం.' అని తెలిపారు.

మహిళల కోసం కొత్త కార్డ్..

మరోవైపు.. మహిళల కోసం ప్లాటినం డిబిట్ కార్డును సైతం లాంచ్ చేసింది ఎస్‌బీఐ. నారీ శక్తి పేరుతో రూపే ప్లాట్ ఫామ్‌ ద్వారా ఈ ప్లాటినం డెబిట్ కార్డును అందుబాటులోకి తీసుకొచ్చింది. ప్రత్యేకంగా మహిళల కోసమే దీనిని రూపొందించినట్లు పేర్కొంది. దీంతో పాటుగా బ్యాంక్ ఆఫ్ బరోడా సైతం మహిళల కోసం ప్రత్యేక ఆఫర్ తీసుకొచ్చింది. విదేశాల్లోని భారత సంతతి మహిళల కోసం ప్రత్యేక అకౌంట్లు అందిస్తున్నట్లు పేర్కొంది. అంతర్జాతీయ మహిళా దినోత్సవాన్ని పురస్కరించుకుని మరిన్ని బ్యాంకులు సైతం ప్రత్యేక పథకాలు తీసుకొచ్చాయి. కొన్ని రుణాలు ఇస్తుండగా.. మరికొన్ని క్రెడిట్, డెబిట్ కార్డుల, ప్రత్యేక ఖాతాలు అందిస్తున్నాయి.