చాక్లెట్ లాక్కున్నంత సులువుగా జెలెన్‌స్కీ అమెరికా నుంచి డబ్బులు తీసుకున్నారు..: ట్రంప్

 ఉక్రెయిన్ అధ్యక్షుడు జెలెన్‌స్కీపై.. తమ దేశం నుంచి వందల బిలియన్ల డాలర్లు తీసుకున్నా ఏమాత్రం కృతజ్ఞత చూపడం లేదని అమెరికా అధ్యక్షుడు డొనాల్డ్ ట్రంప్ తెలిపారు. పసి పిల్లల నుంచి చాక్లెట్లు లాక్కున్నంత సులువుగా.. గత అధ్యక్షుడు జోబైడెన్ నుంచి డబ్బులు లాక్కున్నారని వివరించారు. రష్యాపై తాను చాలా కఠినంగా వ్యవహరిస్తున్నానని.. కానీ ఆ దేశ అధ్యక్షుడు పుతిన్‌తో మాత్రం ఇప్పటికే సత్సంబంధాలు కొనసాగిస్తున్నట్లు వెల్లడించారు. ఆ పూర్తి వివరాలు మీకోసం.

చిన్న పిల్లల నుంచి చాక్లెట్ లాక్కున్నంత సులువుగా.. ఉక్రెయిన్ దేశాధ్యక్షుడు జెలెన్‌స్కీ జోబైడెన్ సర్కారు నుంచి డబ్బులు లాక్కున్నారని అమెరికా అధ్యక్షుడు డొనాల్డ్ ట్రంప్ తెలిపారు. వందల మిలియన్ల డాలర్లు తీసుకున్నా కనీసం కృతజ్ఞత కూడా చూపించడం లేదన్నారు. అలాగే తాను రష్యా విషయంలో చాలా కఠినంగా వ్యవహరిస్తున్నానని చెప్పుకొచ్చారు. దాని పైప్‌లైన్ ఆపి ఆంక్షలు విధించానని.. జావెలిన్ క్షిపణులు అందజేశానన్నారు. కానీ ఆ దేశ అధ్యక్షుడు పుతిన్‌తో మాత్రం మంచి సంబంధాలే కొనసాగిస్తున్నట్లు వివరించారు. రష్యా విషయంలో తనను మించి కఠినంగా ఎవరూ లేరన్నారు.

ఇదిలా ఉండగా.. టెస్లా అధినేత ఎలాన్ మస్క్ కూడా కూడా యుద్ధం ఆపేయాలంటూ ఉక్రెయిన్‌పై ఒత్తిడి చేస్తున్నారు. తాను స్టార్ లింక్ ఇంటర్నెట్ సేవలను నిలిపివేస్తే కీవ్ సేనలు కుప్పకూలిపోతాయని హెచ్చరించారు. ఇలా చేసినంత మాత్రానా ఉక్రెయిన్ ఓడిపోయినట్లు కాదని.. వాస్తవికతతో ఆలోచించే వారు, అర్థం చేసుకునే వారు ఈ యుద్ధాన్ని ఆపాలని కోరుకుంటారని చెప్పుకొచ్చారు. మస్క్ ఈ కామెంట్లు చేసిన కొన్ని గంటల్లోనే ట్రంప్ కూడా జెలెన్‌స్కీపై ఆగ్రహం వ్యక్తం చేయడం గమనార్హం.

ఇటీవలే అమెరికాతో ఖనిజాల ఒప్పందం కోసం జెలెన్‌స్కీ శ్వేతసౌధానికి వచ్చారు. కానీ ఇరు దేశాల నేతల మధ్య గొడవ జరగ్గా.. జెలెన్‌స్కీ సంతకాలు చేయకుండానే వెళ్లిపోయారు. ఆ తర్వాత అమెరికా.. ఉక్రెయిన్ దేశానికి ఏమాత్రం కృతజ్ఞత లేదంటూ చెప్పి.. తమ సైనిక, ఇంటెలిజెన్స్ సాయాలను నిలిపి వేసింది. దీంతో రష్యా తన దాడులను మరింత తీవ్రతరం చేసింది. ఆ తర్వాత జెలెన్‌స్కీ అమెరికా సాయం మర్చిపోలేము, ట్రంప్ మరోసారి పిలిస్తే చర్చలు జరిపి ఖనిజాల ఒప్పందంపై సంతకాలు చేస్తానని ప్రకటించారు. కానీ దీనికి ట్రంప్ ఇప్పటి వరకు అంగీకారం తెలపలేదు. కాకపోతే తాను ఉక్రెయిన్‌కు మద్దతిస్తానంటూ.. ఆ రెండు దేశాల మధ్య యుద్ధం ఆగేలా చేస్తానన్నారు. చూడాలి మరి ముందు ముందు ఏం జరగనుంది అనేది.