ఉచిత గ్యాస్ డబ్బులు రాలేదా? ఇలా చేస్తే చాలు

ఆంధ్రప్రదేశ్ ప్రభుత్వం ఏపీలోని మహిళలకు ఉచితంగా గ్యాస్ సిలిండర్లు అందిస్తున్న సంగతి తెలిసిందే. దీపం పథకం కింద తెల్లరేషన్ కార్డు ఉన్న కుటుంబాలకు ఏడాదికి మూడు గ్యాస్ సిలిండర్లను ఉచితంగా అందిస్తున్నారు. సూపర్‌ సిక్స్‌ హామీల అమల్లో భాగంగా ఉచిత గ్యాస్‌ సిలిండర్ల పంపిణీ పథకాన్ని 2024 అక్టోబరు 31న ఏపీ సీఎం నారా చంద్రబాబు నాయుడు ప్రారంభించారు. మార్చి 31 వరకూ మొదటి ఉచిత సిలిండర్ అందిస్తున్నారు. ఈ గడువు ముగియడానికి మరికొద్ది రోజులే సమయం ఉంది. అయితే ఇప్పటికే తొలి ఉచిత గ్యాస్ సిలిండర్ పొందిన వారిలో చాలామందికి గ్యాస్ సిలిండర్ డబ్బులు బ్యాంకు ఖాతాల్లో పడ్డాయి. సిలిండర్ బుక్ చేసుకున్న సమయంలో మనం డబ్బులు చెల్లించాల్సి ఉంటుంది. గ్యాస్ సిలిండర్ డెలివరీ అయిన రెండు రోజుల్లో.. బ్యాంక్ అకౌంట్లో డబ్బులు జమ చేస్తోంది ప్రభుత్వం.

అయితే కొంత మంది లబ్ధిదారులకు ఉచిత గ్యాస్ డబ్బులు అకౌంట్లలో జమ కావటం లేదు. దీనికి గల కారణాలు అధికారులు వివరిస్తున్నారు. లబ్ధిదారులు ఈకేవైసీ చేసుకోకపోయినా, గ్యాస్‌ ఏజెన్సీలో సరైన వివరాలు ఇవ్వకపోయినా రాయితీ డబ్బు వచ్చే అవకాశాలు లేవంటున్నారు. అలాగే ఈ పథకానికి తమకు అర్హత ఉందా.. లేదా? అని సరిచూసుకోవాలని పౌరసరఫరాల శాఖ అధికారులు చెప్తున్నారు. దీపం-2 పథకం కింద మూడు ఉచిత గ్యాస్ సిలిండర్లు పొందడానికి రేషన్‌కార్డు కావాల్సి ఉంటుంది. అలాగే కుటుంబ సభ్యుల్లో ఎవరి పేరు మీద గ్యాస్ కనెక్షన్‌ ఉందో, ఆ వ్యక్తి పేరు కూడా తప్పనిసరిగా రేషన్‌ కార్డులో ఉండాలని అధికారులు చెప్తున్నారు. అలాగే ఈకేవైసీ చేయించుకోవాలని సూచిస్తున్నారు. వీటిలో ఏవైనా తప్పులు ఉంటే సరిచేసుకోవాలని చెప్తున్నారు.

ఈ- కేవైసీ చేయించుకోనివారు వెంటనే సంబంధిత గ్యాస్ ఏజెన్సీల్లో ఈకేవైసీ చేసుకోవాలని.. అప్పుడే ఏప్రిల్‌లో అందించనున్న ఉచిత గ్యాస్‌ సిలిండర్‌ రాయితీ డబ్బులు పొందేందుకు అవకాశం ఉంటుందని చెప్తున్నారు. డెలివరీ బాయ్స్‌ మొబైల్‌ ఫోన్‌, ఆన్‌లైన్‌, గ్యాస్‌ ఏజెన్సీలకు వెళ్లడం ఇలా మూడు రకాలుగా ఈకేవైసీ చేసుకునే సౌకర్యం ఉందంటున్నారు. అలాగే ఈకేవైసీ చేసుకోనివారికి, ప్రతినెలా రేషన్‌ తీసుకోనివారికి, 300 యూనిట్లకు పైగా విద్యుత్తు వినియోగించేవారికి ఉచిత గ్యాస్ సిలిండర్ల పథకం వర్తించదని అధికారులు చెప్తున్నారు. ప్రభుత్వ ఉద్యోగులకు, కారు ఉన్నవారికి కూడా ఈ పథకం లబ్ధి వర్తించదని చెప్తున్నారు.