మా అమ్మ చాలా బ్యాడ్.. ..: పోలీసులకు ఫోన్ చేసిన నాలుగేళ్ల బాలుడు

మా అమ్మ చాలా బ్యాడ్.. జైలుకు వెళ్లేంత పెద్ద తప్పు చేసింది.. వెంటనే వచ్చి ఆమెను అరెస్ట్ చేసి తీసుకెళ్లండి అంటూ ఓ నాలుగేళ్ల బాలుడు పోలీసులకు ఫోన్ చేశాడు. అతడు చెప్పిందంతా విన్న పోలీసులు.. బాలుడి తల్లి అతడిని తీవ్రంగా వేధిస్తుందేమోనని భావించి వెంటనే అతడు చెప్పిన అడ్రస్‌కు వెళ్లారు. ఈక్రమంలోనే తలుపులు కొట్టగా అతడి తల్లి తలుపులు తీసింది. పోలీసులను చూసి ఆశ్చర్యపోయి ఎందుకు వచ్చారని అడగ్గా.. బాలుడు ఎంట్రీ ఇచ్చి మా అమ్మ నా ఐస్ క్రీమ్ మొత్తం తినేసింది.. అరెస్ట్ చేసి తీసుకెళ్లమని చెప్పాడు. దీంతో పోలీసులు నవ్వుకోగా.. తల్లి మాత్రం షాక్ అయింది. ప్రస్తుతం నెట్టింట వైరల్ అవుతున్న ఈ వీడియో ఎక్కడిదో మనం ఇప్పుడు తెలుసుకుందాం.

అమరికాలోని విస్కాన్సిన్ పోలీస్ కంట్రోల్ రూమ్‌కు ఓ నాలుగేళ్ల వయసు ఉన్న బాలుడు ఫోన్ చేశాడు. మా మమ్మీ చాలా బ్యాడ్.. వెంటనే వచ్చి ఆమెను తీసుకెళ్లండి అంటూ ఫిర్యాదు చేశాడు. దీంతో పోలీసులు భయపడి.. బాలుడి తల్లి ఏమైనా వేధింపులకు పాల్పడుతుందేమోని హుటాహుటిన రంగంలోకి దిగారు. ఫోన్ చేసిన కొన్ని నిమిషాల్లోనే బాలుడి ఇంటికి చేరుకున్నారు. ఈక్రమంలోనే తలుపులు కొట్టారు. వెంటనే బాలుడి తల్లి వచ్చి తలుపులు తెరిచింది. పోలీసులను చూసి షాక్ అయింది. ఏమైందని ప్రశ్నించింది. అప్పటికీ బాలుడు ఏడుస్తూ ఉండగా.. మీ బాబు ఫోన్ చేశాడు పిలవమన్నారు.

వాళ్లు చెప్పినట్లుగానే సదరు మహిళ పిల్లాడిని పిలిచింది. వస్తూ వస్తూనే.. బాలుడు మా అమ్మ చాలా బ్యాడ్.. జైలుకు వెళ్లేంత పెద్ద తప్పు చేసింది.. వెంటనే అరెస్ట్ చేయమని చెప్పాడు. తల్లి షాక్ కాగా.. పోలీసులు ఏం జరిగిందో చెప్పమన్నారు. దీంతో బాలుడు మా అమ్మ నా ఐస్ క్రీమ్ మొత్తం తినేసిందని వివరించాడు. దీంతో పోలీసులు షాక్ అయ్యారు. ఆ తర్వాత నవ్వుకున్నారు. ఇలాంటి వాటికి ఫోన్ చేయొద్దని.. చాలా అత్యవసరం అయితేనే ఫోన్ చేయాలని బాలుడికి వివరించారు. అయితే అతడు మాత్రం తల్లిని అరెస్ట్ చేయాలని పదే పదే చెప్పగా.. ఆమె చేతికి సంకెళ్లు వేశారు.

అదంతా చూసిన బాలుడు వద్దు మా అమ్మను వదిలి పెట్టమని కోరాడు. దీంతో పోలీసులు మళ్లీ నవ్వుకుని సంకెళ్లు తీసేశారు. నిజంగానే తిన్నారా అని ఆమెను అడగ్గా.. ఇంట్లో ఉంటే తినేస్తున్నాడని తానే తిన్నట్లు ఒప్పుకుంది. కానీ పోలీసులకు ఫోన్ చేస్తాడని ఊహించలేదని వివరించింది. ఆపై పోలీసులు వెళ్లిపోయారు. కానీ మరుసటి రోజు మళ్లీ బాలుడి ఇంటికి వెళ్లి ఐస్ క్రీమ్‌ను అందజేశారు. ప్రస్తుతం ఇందుకు సంబంధించిన వీడియోలు నెట్టింట తెగ వైరల్ అవుతున్నాయి.