వారందరికీ ఉచిత కరెంట్.. ఏపీ ప్రభుత్వం భారీ శుభవార్త

ఆంధ్రప్రదేశ్ ప్రభుత్వం కీలక నిర్ణయం తీసుకుంది. రాష్ట్రంలోని చేనేత కార్మికులకు ఉచిత విద్యుత్ ఇవ్వాలని నిర్ణయించింది. ఆంధ్రప్రదేశ్ ముఖ్యమంత్రి నారా చంద్రబాబు నాయుడు అధ్యక్షతన సచివాలయంలో ఏపీ కేబినెట్ భేటీ జరిగింది. ఈ సమావేశంలో పలు కీలక ప్రతిపాదనలకు ఆంధ్రప్రదేశ్ మంత్రివర్గం ఆమోదం తెలిపింది. అందులో భాగంగానే రాష్ట్రంలోని చేనేత కార్మికుల ఇళ్లకు ఉచిత విద్యుత్ ఇవ్వాలనే ప్రతిపాదనకు ఏపీ కేబినెట్ ఆమోదం తెలిపింది. చేనేత కార్మికుల ఇళ్లకు 200 యూనిట్ల వరకు ఉచితంగా విద్యుత్ అందించనున్నారు. అలాగే పవర్ లూమ్స్‌కు 500 యూనిట్ల వరకు ఉచిత విద్యుత్ అందించనున్నారు.

మరోవైపు ఏపీ కేబినెట్ భేటీలో మరికొన్ని కీలక ప్రతిపాదనలకు మంత్రివర్గం ఆమోదం తెలిపింది. ఉపాధ్యాయుల బదిలీల నియంత్రణ చట్ట సవరణ బిల్లుకు ఏపీ కేబినెట్ పచ్చజెండా ఊపింది. అమరావతిలో భూ కేటాయింపులపై ఏర్పాటు చేసిన కేబినెట్ సబ్ కమిటీ నిర్ణయాలకు ఆమోదం లభించింది. ఎస్సీ వర్గీకరణ అంశంపైనా ఆంధ్రప్రదేశ్ మంత్రివర్గం చర్చించినట్లు తెలిసింది. ఎస్సీ వర్గీకరణపై రాజీవ్‌రంజన్‌ మిశ్రా కమిషన్‌ సమర్పించిన నివేదికకు ఆంధ్రప్రదేశ్ మంత్రివర్గం ఆమోదం తెలిపింది. మరోవైపు అనంతపురం, సత్యసాయి జిల్లాలకు ఏపీ కేబినెట్ తీపికబురు వినిపించింది. అనంతపురం, సత్యసాయి జిల్లాలలో రెన్యువబుల్ ఎనర్జీ ప్లాంట్ల ఏర్పాటుకు మంత్రివర్గం నిర్ణయం తీసుకుంది.

అలాగే నంబూరులోని వీవీఐటీయూకు ప్రైవేటు యూనివర్సిటీ హోదా కల్పించే ప్రతిపాదనలకు ఆంధ్రప్రదేశ్ కేబినెట్ ఆమోదం తెలిపింది. వైఎస్సార్ తాడిగడప మున్సిపాలిటీ పేరును తాడిగడప మున్సిపాలిటిగా మార్పుచేశారు. వీటితో పాటుగా పలు సంస్థలకు భూ కేటాయింపులపైనా నిర్ణయం తీసుకున్నారు. ఆంధ్రప్రదేశ్ ముఖ్యమంత్రి కార్యాలయంలో ఫొటోగ్రాఫర్లు, వీడియోగ్రాఫర్ల పోస్టుల భర్తీకి మంత్రివర్గం ఆమోదం తెలిపింది. మరోవైపు ఎస్సీ, ఎస్టీలకు ఇప్పటి వరకూ ఉచిత విద్యుత్ అందిస్తున్న సంగతి తెలిసిందే. అయితే చేనేత కార్మికులను ఆదుకోవాలనే ఉద్దేశంతో చేనేతలకు ఉచిత విద్యుత్ పథకం అమలు చేయాలని ఆంధ్రప్రదేశ్ కేబినెట్ నిర్ణయించింది. అలాగే పవర్ లూమ్స్‌కు సైతం 500 యూనిట్ల వరకూ ఉచిత విద్యుత్ అందించనున్నారు.