లండన్ పార్కులో చీర, చెప్పులతో మమతా బెనర్జీ జాగింగ్

పశ్చిమ బెంగాల్ ముఖ్యమంత్రి, తృణముల్ కాంగ్రెస్ పార్టీ అధినేత్రి మమతా బెనర్జీ.. మరోసారి తనదైన స్టైల్‌తో వార్తల్లో నిలిచారు. ఇటీవల లండన్‌కు వెళ్లిన దీదీ.. అక్కడి పార్కులో జాగింగ్ చేశారు. అదేంటీ జాగింగ్ చేస్తే పెద్ద వింత ఏముంది అనుకుంటున్నారా. నిత్యం ఆమె ధరించే చీరను వేసుకుని.. కాళ్లకు రబ్బరు చెప్పులు వేసుకుని లండన్‌లోని పార్కులో మమతా బెనర్జీ రన్నింగ్ చేశారు. దీనికి సంబంధించిన ఫోటోలు, వీడియోలు సోషల్ మీడియాలో తెగ వైరల్ అవుతున్నాయి. అయితే రెగ్యులర్‌గా పశ్చిమ బెంగాల్‌లో ఉన్నపుడు ఉదయం లేవగానే వ్యాయామంతో రోజును ప్రారంభించే దీదీ.. విదేశీ పర్యటనలకు వెళ్లినపుడు కూడా చేయడం గమనార్హం.

రాజకీయాల్లోనే కాకుండా.. తన రోజువారీ కార్యక్రమాల్లోనూ మమతా బెనర్జీ చాలా చురుగ్గా ఉంటూ అందరికీ ఆదర్శంగా నిలుస్తూ ఉంటారు. తెల్లవారుజామున జాగింగ్‌తో తన దినచర్యను ప్రారంభించే దీదీ.. విదేశాలకు వెళ్లినపుడు కూడా అదే అలవాటును కొనసాగించడం ఇప్పటికే పలుమార్లు చూశాం. ప్రస్తుతం లండన్‌ పర్యటనకు వెళ్లిన పశ్చిమ బెంగాల్‌ ముఖ్యమంత్రి.. అక్కడి పార్క్‌లో తన అధికారులు, సెక్యూరిటీ సిబ్బందితో కలిసి జాగింగ్‌ చేశారు.

లండన్‌లోని హైడ్ పార్క్‌లో దీదీ మార్నింగ్ వాకింగ్‌కు సంబంధించిన వీడియోలను తృణముల్ కాంగ్రెస్ పార్టీ నేత కునాల్ ఘోష్ తన అధికారిక ట్విటర్‌(ఎక్స్)లో షేర్ చేశారు. చీర, రబ్బరు చెప్పులతో హైడ్ పార్క్‌లో తన మార్నింగ్ వాక్‌ ప్రారంభించి.. అనంతరం జాగింగ్ చేశారు. దీదీ వెంట భద్రతా సిబ్బంది ఉండగా.. పలువురు అధికారులు కూడా ఉన్నారు.

అయితే ఆరోగ్యం విషయంలో మమతా బెనర్జీ అనేక జాగ్రత్తలు పాటిస్తూ ఉంటారు. ఆమె తన నివాసంలో క్రమం తప్పకుండా ఎక్సర్‌సైజ్‌లు చేస్తూ ఉంటారు. అంతేకాకుండా ప్రజలు కూడా అందరూ ఆరోగ్యంగా ఉండాలంటూ.. పలు సందర్భాల్లో దీదీ అవగాహనా కార్యక్రమాలు నిర్వహించిన విషయం తెలిసిందే. ప్రజలు ఆరోగ్యంపై ప్రత్యేక శ్రద్ధ వహించాలని సూచిస్తూ ఉంటారు. మరోవైపు.. విదేశీ పర్యటనలకు వెళ్లిన సమయాల్లో జాగింగ్‌ చేయడం దీదీకి అలవాటే. ఇదేమీ తొలిసారి కాదు. గతంలో స్పెయిన్‌, డార్జిలింగ్‌ సహా పలు దేశాలకు వెళ్లినపుడు చీర, రబ్బరు చెప్పులతోనే జాగింగ్‌ చేశారు.