గేట్లు పగులగొట్టి మరీ జువైనల్ హోమ్ నుంచి తప్పించుకున్న 21 మంది బాల నేరస్థులు

నేరాలకు పాల్పడి ప్రస్తుతం జువైనల్ హోంలో ఉండి శిక్షను అనుభవిస్తున్న 21 మంది బాల బాలికలు అక్కడి నుంచి తప్పించుకున్నారు. ముఖ్యంగా వీరంతా ఒక్కసారిగా బయటకు వచ్చేశారు. సీసీటీవీ కెమెరాలు పగులగొట్టి.. గేట్లను తోసుకుంటూ బయటకు వచ్చారు. గుంపులు గుంపులుగా రహదారిపైకి చేరి ఇష్టం వచ్చిన వైపుగా పరుగులు పెట్టారు. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండగా.. అంతా షాక్ అవుతున్నారు. అసలు ఈ చిన్న పిల్లలు ఎలా అలా చేయగలిగారంటూనే, అప్పుడు అధికారులు ఏం చేస్తున్నారని ప్రశ్నిస్తున్నారు. మరి అధికారులు వారిని పట్టుకున్నారా లేదా అనేది మనం ఈ కథనంలో తెలుసుకుందాం పదండి.

జార్ఖండ్‌లోని పశ్చిమ సింగ్‌భూమ్ జిల్లాలోని చైబాసా జువైనల్ హోమ్‌లో ఈ ఘటన జరిగింది. ముఖ్యంగా నేర చరిత్ర కల్గిన మొత్తం 21 మంది బాలబాలికలు మంగళ వారం రోజు సాయంత్రం 6.30 గంటల సమయంలో తప్పించుకున్నారు. వీరంతా ఓ గుంపుగా మారి జువైనల్ హోంలోని సీసీటీవీ కెమెరాలను పగులగొట్టారు. అలాగే గేటు బయటు ఇద్దరు అధికారులు ఉండగా.. లోపలి నుంచి గేట్లను బయటకు తోశారు. ఫలితంగా గేట్లు తెరుచుకోగా చిన్నారులంతా బయటకు వచ్చేశారు. ఆపై రోడ్డు మీద చేరి పారిపోయేందుకు ప్రయత్నించారు. ఆ సమయంలో చిన్నారుల వద్ద కర్రలు కూడా ఉండగా స్థానిక ప్రజలంతా తీవ్ర భయాందోళనకు గురయ్యారు.

మరోవైపు అక్కడే ఉన్న ఇద్దరు సిబ్బంది వారిని ఆపలేకపోయారు. ఇక చేసేదేమీ లేక వెంటనే పోలీసులు, పైఅధికారులకు సమాచారం అందించారు. దీంతో హుటాహుటిన రంగంలోకి దిగిన అధికారులు.. తప్పించుకున్న పిల్లల కోసం గాలింపు చేపట్టారు. ఈక్రమంలోనే నలుగురు పిల్లలు దొరకగా.. మిగతా వారిని పట్టుకునేందుకు పోలీసులు తీవ్రంగా ప్రయత్నిస్తున్నారు. అయితే రోడ్డుపై వెళ్తున్న కొంత మంది పిల్లలు బయటకు వస్తుండడం చూసి వీడియో తీశారు. దాన్ని సోషల్ మీడియాలో పెట్టగా అది కాస్తా నెట్టింట వైరల్ అయింది. ఇది చూసిన ప్రజలంతా షాక్ అవుతున్నారు. ఇంత మంది ఖైదీలు ఉన్నప్పుడు.. అధికారులు జాగ్రత్తగా వ్యవహరించాల్సిందని, వారి నిర్లక్ష్యం వల్లే ఇదంతా జరిగిందని చెబుతున్నారు.

ముఖ్యంగా ఈ ఘటనపై డిప్యూటీ కమిషనర్ కుల్దీప్ చౌదరి మాట్లాడుతూ.. మంగళ వారం రోజు సాయంత్రం 6.30 గంటల ప్రాంతంలో దాదాపు 21 మంది పిల్లలు ఆందోళనకు దిగి ఆ వసతి గృహం నుండి బయటకు వెళ్లారని చెప్పారు. ఈ సంఘటన గురించి సమాచారం అందిన వెంటనే.. సబ్-డివిజనల్ ఆఫీసర్ మరియు పోలీసు అధికారులతో సహా సంబంధిత అధికారులను వెంటనే అప్రమత్తం చేశారన్నారు. అయితే ఇప్పటికే నలుగురు దొరకగా.. మిగతా వారి కోసం గాలిస్తున్నామని వెల్లడించారు.