పాస్‌పోర్టు ఊర్లోకే వచ్చేస్తోంది..ఏపీలో కొత్త సర్వీస్ అందుబాటులోకి

ఉద్యోగం కోసమైనా, ఉన్నత విద్యకైనా.., విహారం, వ్యాపారం ఇలా దేనికైనా.. విదేశాలకు వెళ్లాలంటే పాస్‌పోర్టు అనేది తప్పనిసరి. దీంతో పాస్‌పోర్టు కోసం చాలా మంది ప్రయత్నిస్తుంటారు. పాస్‌పోర్టు సేవా కేంద్రాల చుట్టూ తిరుగుతూ ఉంటారు. అయితే ఏపీలో ఇకపై ఇలాంటి ఇబ్బందులు తప్పనున్నాయి. ఆంధ్రప్రదేశ్‌లో త్వరలోనే మొబైల్ పాస్‌పోర్టు సేవలు అందుబాటులోకి రానున్నాయి. పాస్‌పోర్టు కావాల్సిన వారు ఆఫీసుల చుట్టూ చక్కర్లు కొట్టాల్సిన పనిలేకుండా.. ఊర్లోకి వచ్చే ఈ మొబైల్ వ్యాన్ వద్దకు వెళ్తే సరిపోతుంది.

పాస్‌పోర్టు కావాల్సిన వ్యక్తులు ముందుగా ఆన్‌లైన్‌లో స్లాట్ నమోదు చేసుకోవాల్సి ఉంటుంది. పాస్‌పోర్ట్ సేవా మొబైల్ వ్యాన్ ఎప్పుడు, ఎక్కడకు వస్తుందనే వివరాలను అధికారులు ముందుగానే వెబ్‌సైట్‌లో పేర్కొంటారు. ఆ ప్రకారం పాస్‌పోర్ట్ కావాల్సిన వారు స్లాట్ బుక్ చేసుకోవాలి. వ్యాన్ ఊర్లోకి వచ్చినప్పుడు అక్కడకు వెళ్తే సరిపోతుంది. పాస్‌పోర్టు కోసం సర్టిఫికేట్ల పరిశీలన దగ్గర నుంచి బయోమెట్రిక్ వివరాల సేకరణ, ఫోటోల ప్రక్రియ పూర్తవుతుంది. వెరిఫికేషన్ తర్వాత పాస్‌పోర్టును పోస్ట్ ద్వారా నేరుగా ఇంటికే వస్తుంది.

విజయవాడ ప్రాంతీయ పాస్‌పోర్టు కార్యాలయం ప్రారంభం సందర్భంగా ఈ పాస్‌పోర్టు సేవా మొబైల్ వ్యాన్లను పరిచయం చేశారు. త్వరలోనే రాష్ట్రమంతటా ఈ సేవలు అందుబాటులో తేనున్నారు. పాస్‌పోర్ట్ సేవా మొబైల్ వ్యాన్‌లో నలుగురు సిబ్బంది అందుబాటులో ఉంటారు. పాస్‌పోర్టు కోసం కార్యాలయానికి వెళ్లలేని వ్యక్తులు, మారుమూల ప్రాంతాల వాసులు ఈ వ్యాన్ ద్వారా ఊర్లోనే పాస్‌పోర్ట్ పొందే వీలుంది.

మరోవైపు విజయవాడలో పాస్‌పోర్టు ప్రాంతీయ కార్యాలయాన్ని కేంద్ర మంత్రి కీర్తి వర్ధన్ సింగ్ మంగళవారం ప్రారంభించారు. విజయవాడ పాస్‌పోర్టు ఆఫీసులో కేసులను సత్వరమే పరిష్కరించేలా ప్రత్యేక కేంద్రం ఏర్పాటు చేసినట్లు తెలిపారు. అలాగే పాస్‌పోర్ట్‌ ప్రింటింగ్‌ కేంద్రం సైతం అందుబాటులో ఉంచినట్లు వివరించారు. రోజుకు వెయ్యి స్లాట్లు ఇచ్చేలా విజయవాడ ప్రాంతీయ పాస్‌పోర్టు కార్యాలయాన్ని ఆధునీకరించినట్లు కేంద్ర మంత్రి వివరించారు. మరోవైపు విజయవాడలో పాస్‌పోర్టు ఆఫీసును ప్రారంభించటంపై స్థానిక ఎంపీ కేశినేని చిన్ని ఆనందం వ్యక్తం చేశారు. కార్పొరేట్ ఆఫీస్ తరహాలో పాస్ పోర్ట్ కార్యాలయం ఉందని.. విశాఖపట్నంతో పాటు విజయవాడలోనూ రీజనల్ పాస్ పోర్ట్ కార్యాలయం అందుబాటులోకి వచ్చిందన్నారు.