ఇంట్లోకెళ్లి నటుడిని చంపేస్తాం,,,,,సల్మాన్ ఖాన్‌కు బెదిరింపులు

బాలీవుడ్ స్టార్ హీరో సల్మాన్ ఖాన్‌కు తాజాగా మరోసారి హత్యా బెదిరింపులు వచ్చాయి. ఎవరో గుర్తు తెలియని వ్యక్తులు.. హీరో కారును బాంబు పెట్టి పేల్చేస్తామని, ఆయన ఇంట్లోకి చొరబడి మరీ హత్యకు పాల్పడతామంటూ వర్లీ ట్రాన్స్‌పోర్ట్ డిపార్ట్‌మెంట్‌కు తాజాగా వాట్సాప్ మెసేజ్ పంపించారు. అయితే ఈ బెదిరింపుల వెనుక గ్యాంగ్‌స్టర్ లారెన్స్ బిష్ణోయ్ హస్తం ఏమైనా ఉందేమోనని అధికారులు భావిస్తున్నారు. ఎందుకంటే చాలా రోజులుగా బిష్ణోయ్ గ్యాంగ్ నుంచి సల్మాన్ ఖాన్‌కు బెదిరింపులు వస్తున్నాయి. అసలు ఎందుకు వాళ్లు హీరోను టార్గెట్ చేశారు, ఇప్పుడు హత్య బెదిరింపులు చేసింది ఎవరో మనం ఇప్పుడు తెలుసుకుందాం.

సోమవారం రోజు ఉదయం బాలీవుడ్ స్టార్ హీరో సల్మాన్ ఖాన్‌ను చంపేస్తామంటూ వర్లీ ట్రాన్స్‌పోర్ట్ డిపార్ట్‌మెంట్‌కు తాజాగా వాట్సాప్ మెసేజ్ వచ్చింది. ముఖ్యంగా హీరో కారును బాంబు పెట్టి పేల్చేస్తామని, ఆయన ఇంట్లోకి చొరబడి మరి కాల్పులు జరిపి హత్య చేస్తామని అందులో రాసుకొచ్చారు. అయితే ఈ మెసేజీ చూసిన వెంటనే ముంబయి పోలీసులు అప్రమత్తం అయ్యారు. దీనిపై కేసు నమోదు చేసుకుని దర్యాప్తు చేపట్టారు. ముందుగా హీరోకు ఫోన్ చేసి జాగ్రత్తగా ఉండాలని సూచించారు. మరోవైపు ఈ మెసేజీని ఎవరు పంపించారు, ఎందుకు పంపించారని తెలుసునేందుకు ప్రయత్నిస్తున్నారు.

ముఖ్యంగా ఈసారి కూడా బెదిరింపులకు పాల్పడింది గ్యాంగ్‌స్టర్ లారెన్స్ బిష్ణోయ్ గ్యాంగే కావొచ్చని అనుమానాలు వ్యక్తం చేస్తున్నారు. ఎందుకంటే చాలా రోజులుగా సల్మాన్ ఖాన్‌ను చంపేస్తామంటూ ఆ గ్యాంగ్ బెదిరిస్తూ వస్తోంది. ఇప్పటికే చాలా సార్లు బెదిరింపులు వచ్చాయి. గతేడాది సల్మాన్ నివాసం ఉంటున్న బాంద్రాలోని గెలాక్సీ అపార్ట్‌మెంట్ వద్ద ఇద్దరు వ్యక్తులు కాల్పులు జరిపారు. అంతకు ముందు పన్వేల్ ఫామ్ హౌస్‌లోకి చొరబడేందుకు కొందరు ప్రయత్నించడం అప్పట్లో సంచలనం రేపింది. ఇలా తరచుగా బెదిరింపులు వస్తుండడంతో సర్కారు ఆయనకు వై ప్లస్ సెక్యూరిటీని నియమించింది. ఈక్రమంలోనే ఆయన భారీ భద్రత నడుమ తన పనులు చేసుకుంటున్నారు. ముఖ్యంగా సినిమా షూటింగ్స్, పబ్లిక్ ఈవెంట్లకు వెళ్లినా భారీ భద్రత నడుమే వెళ్తున్నారు.

హమ్ సాత్ సాత్ హై సినిమా షూటింగ్ సమయంలో హీరో సల్మాన్ ఖాన్ ఓ కృష్ణ జింకను చంపాడనే ఆరోపణలు ఉన్నాయి. ఇప్పటికే ఈ కేసు కోర్టు వరకూ వెళ్లింది. అయితే బిష్ణోయ్ సమాజం కృష్ణకు ఆరాధ్య దైవంగా భావిస్తుంటుంది. ఈక్రమంలోనే హీరో కృష్ణ జింకను చంపాడంటూ వార్తలు రాగా.. వారు తీవ్రంగా కలత చెందారు. 2018లో జోధ్‌పూర్‌లో కోర్టుకు హాజరైన బిష్ణోయ్.. తాము సల్మాన్ ఖాన్‌ను చంపేస్తామని బెదిరించారు. అప్పటి నుంచి ఆయన నుంచి సల్మాన్ ఖాన్‌కు హత్యా బెదిరింపులు వస్తూనే ఉన్నాయి.