కొండెక్కి కూర్చున్న నిమ్మకాయ.. ఏకంగా 400 శాతం ధరల పెంపు

వేసవి కాలం వచ్చేసింది.. ఎండలు ఠారెత్తిపోతున్నాయి.. ఓ వైపు వర్షాలు పడుతున్నా, మరికొన్ని ప్రాంతాల్లో సూర్యుడు మండిపోతున్నాడు. దీంతో ప్రజలు మధ్యాహ్న సమయంలో బయటకు రావాలంటే ఒకటికి రెండుసార్లు ఆలోచిస్తున్న పరిస్థితి. ఎండ వేడిమికి తోడు వేడుగాలులు.. దీంతో వృద్ధులు, చిన్నారులు, గర్భిణులు, బాలింతలు బయటకు రావద్దని వాతావరణ శాఖ అధికారులు చెప్తున్నారు. ఇక తప్పనిసరి పరిస్థితుల్లో బయటకు వచ్చినా శరీరం డీహైడ్రేషన్ కాకుండా జాగ్రత్తలు తీసుకోమని చెప్తున్నారు. మంచి నీరు తాగాలని, కొబ్బరి నీళ్లు, నిమ్మరసం వంటివి తీసుకోవాలని సూచిస్తున్నారు. అయితే వేసవి కాలం కావటంతో నిమ్మకాయకు టైమొచ్చింది. రేటు కొండెక్కి కూర్చుంది. రైతులకు ఇది లాభదాయకంగానే ఉన్నా.. సామాన్యుడు మాత్రం నిమ్మకాయ ధరలు చూసి షాక్ తింటున్నాడు.

వేడిగాలులు, అధిక ఉష్ణోగ్రత వంటి వాతావరణ పరిస్థితుల కారణంగా అంతర్జాతీయ మార్కెట్లలో నిమ్మకాయకు డిమాండ్ పెరిగింది. దీంతో గత కొన్ని వారాలుగా ఏపీలో నిమ్మకాయ రేట్లు అమాంతం పెరిగిపోయాయి. నిమ్మకాయ ధరలు ఏకంగా నాలుగు రెట్లు పెరిగాయి. ఆంధ్రప్రదేశ్‌లో నిమ్మకాయల ఉత్పత్తి ఎక్కువ. దీంతో నిమ్మ రేట్లు పెరగటంతో రైతులు సంతోషం వ్యక్తం చేస్తున్నారు. కానీ వినియోగదారుడే షాక్ తింటున్నాడు. మార్చి నెలలో క్వింటాల్ నిమ్మ ధర రూ.3000లుగా ఉండేది. ఏప్రిల్ వచ్చే సరికి క్వింటా నిమ్మకాయ రేటు రూ.12000కు చేరుకుంది. నాలుగే వారాల్లో ఏకంగా 400 శాతం పెరిగిపోయింది.

గుంటూరు జిల్లా దుగ్గిరాల నిమ్మకాయల మార్కెట్ నుంచి నిమ్మ ఎగుమతులు ఎక్కువ. అంతర్జాతీయంగా ఉన్న డిమాండ్‌తో ఎగుమతిదారులు నిమ్మకాయ కొనుగోళ్లకు ఆసక్తి చూపుతున్నారు. దీంతో ధరలు పెరుగుతున్నాయి. మార్చి నెల మొదటి వారంలో క్వింటాల్ రూ.3000 ఉండే నిమ్మకాయ రేటు.. మార్చి మూడో వారానికి రూ.6000లకు చేరుకుంది. గత కొన్నివారాలుగా ఈ ధర రూ.12000లకు చేరుకుంది. అంతర్జాతీయంగా నిమ్మ ఎగుమతుల్లో భారతదేశం వాటా 18 నుంచి 20 శాతం వరకూ ఉంటుంది.

అయితే యూఎస్ టారిఫ్‌ల ప్రభావం నిమ్మ మీద పడలేదు. ఎందుకంటే భారత్ నుంచి కువైట్, ఖతార్, యూఏఈ, సౌదీ అరేబియా, ఇరాక్, నేపాల్ వంటి దేశాలకు నిమ్మ ఎగుమతులు ఎక్కువ. మరోవైపు కర్ణాటక, మహారాష్ట్ర, గుజరాత్ వంటి రాష్ట్రాలలో విభిన్న వాతావరణ పరిస్థితుల కారణంగా నిమ్మ పంట దెబ్బతినడం కూడా.. ఏపీలో నిమ్మకాయ రేట్లు పెరగడానికి కారణం కావొచ్చని వ్యాపారులు చెప్తున్నారు.