గాజువాకలో అద్భుతం.. కళ్లు తెరిచిన శివయ్య.. దేవుడి మహిమేనా

నిత్య జీవితంలో మనకు ఎన్నో ఘటనలు ఎదురౌతుంటాయి. కొన్ని సాధారణంగా ఉంటాయి. మరికొన్ని అసాధారణమనిపిస్తాయి. అలాంటి అసాధారణ ఘటనలను కొంతమంది అరుదంటారు. మరికొంతమంది అద్భుతమంటారు.. ఇంకొంతమంది దేవుడి మహిమ అంటుంటారు. అలాంటి ఘటనే విశాఖపట్నం జిల్లా గాజువాకలో చోటుచేసుకుంది. గాజువాక నియోజకవర్గం పరిధిలో శ్రీదుర్గా నాగలింగేశ్వర ఆలయం ఉంది. శివుడు విగ్రహం రూపంలో కొలువై ఉండటం ఈ ఆలయం ప్రత్యేకత. అయితే దుర్గా నాగలింగేశ్వర ఆలయానికి భక్తులు తండోపతండాలుగా తరలివస్తున్నారు. కొబ్బరి కాయలు కొట్టి ఆ దేవుడిని ప్రార్థిస్తున్నారు. ఇందుకు కారణం ఆలయంలో శివయ్య కళ్లు తెరవడమే..

గాజువాక నియోజకవర్గంలోని ఆటోనగర్ యాదవ జగ్గరాజుపేట వెళ్లే మార్గంలో శ్రీ దుర్గా నాగలింగేశ్వర ఆలయం ఉంది. అయితే ఆదివారం సాయంత్రం ఆలయంలోని శివుడి విగ్రహం కళ్లు తెరిచినట్లు అర్చకులు చెప్తున్నారు. ఈ విషయం ఆనోటా ఈనోటా పాకి చుట్టుపక్కల ప్రాంతాలకు వ్యాపించింది. దీంతో పరిసర ప్రాంతాల నుంచి నాగ లింగేశ్వర ఆలయానికి భక్తులు తరలివస్తున్నారు. స్వామివారిని దర్శించుకుని మొక్కులు చెల్లించుకుంటున్నారు. మరోవైపు మే ఆరో తేదీన శ్రీ దుర్గా నాగలింగేశ్వర ఆలయంలో పెద్ద పండుగ చేయనున్నట్లు అర్చకులు తెలిపారు.

జనాల్లోకి మూడు గిరి నాగులు..

మరోవైపు విగ్రహాలు పాలుతాగడం, కన్నీళ్లు కార్చడం, కళ్లు తెరవడం వంటి ఘటనలు అప్పుడప్పుడూ జరుగుతూ ఉంటాయి. భక్తులు దీనిని దేవుడి మహిమగా భావిస్తుంటారు. అయితే దీని వెనుక శాస్త్రీయ కారణాలు ఉన్నాయని నిపుణులు చెప్తున్నారు. ఆలయాలలో చాలావరకూ చల్లని, తేమతో కూడిన వాతావరణం ఉంటుంది. ఈ తేమ ఘనీభవించడం వలన విగ్రహం కన్నీళ్లు కారుస్తున్నట్లు ఒక్కోసారి అనిపిస్తుందంటున్నారు. రాయి లేదా లోహ విగ్రహాల విషయంలో సర్వసాధారణంగా జరిగే ప్రక్రియగా నిపుణులు చెప్తున్నారు. ఇక ఉష్ణోగ్రతలో హెచ్చుతగ్గులు వలన కూడా విగ్రహంలోని సూక్ష్మ రంధ్రాల నుంచి నీరు, ద్రవం వచ్చే అవకాశం ఉందంటున్నారు. విగ్రహాలపై ఉపయోగించే రంగులు, లేపనాలు, లోహాలు వాతావరణంలోని తేమ లేదా ఇతర రసాయనాలతో చర్య జరపటం వలన కూడా ఒక్కోసారి ఇలా జరిగే అవకాశం ఉందంటున్నారు.

కొన్ని సందర్భాలలో విగ్రహం ఆకృతి, లైటింగ్, లేదా దాని చుట్టూ ఉన్న వాతావరణం వల్ల కళ్లు తెరుచుకున్నట్లు లేదా కన్నీళ్లు కారుతున్నట్లు కనిపించే అవకాశం ఉందని నిపుణులు అభిప్రాయపడుతున్నారు. ఆప్టికల్ ఇల్యూషన్ కారణంగా ఇలా జరిగే అవకాశం ఉందని చెప్తున్నారు.