ఏపీలో బేబీ కిట్ పథకం పునరుద్ధరణ,,,ప్రభుత్వం కీలక నిర్ణయం

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. 2014-19 మధ్యకాలంలో టీడీపీ ప్రభుత్వంలో అమలు చేసిన మరో పథకాన్ని పునరుద్ధరించాలని ఎన్డీఏ కూటమి ప్రభుత్వం నిర్ణయించింది. 2014-19 సమయంలో నవజాత శిశువుల ఆరోగ్యం కోసం అప్పటి టీడీపీ ప్రభుత్వం బేబీ కిట్లు అందజేసింది. శిశువులకు అవసరమైన 11 రకాల వస్తువులతో ఈ బేబీ కిట్ అందించేవారు. అయితే 2019 ఎన్నికల్లో వైసీపీ గెలుపొంది అధికారంలోకి వచ్చిన తర్వాత బేబీ కిట్ పథకం అమలు ఆగిపోయింది. నవరత్నాల అమలుపై ఫోకస్ పెట్టిన వైసీపీ సర్కారు.. బేబీ కిట్ పథకాన్ని నిలిపివేసింది. అయితే బేబీ కిట్ పథకాన్ని పునురుద్ధరించాలని తాజాగా ఏపీ ప్రభుత్వం నిర్ణయించింది.

బేబీ కిట్ పథకం.. నవజాత శిశువుల ఆరోగ్యం, సంరక్షణ కోసం రూపొందించారు. ఈ పథకం 2016లో ప్రారంభమైంది. బేబీ కిట్ పథకం ద్వారా నవజాత శిశువులకు అవసరమైన ప్రాథమిక వస్తువులను కిట్ రూపంలో ప్రభుత్వం అందిస్తుంది. ముఖ్యంగా ఆర్థికంగా వెనుకబడిన కుటుంబాలకు సహాయం చేయడం ఈ పథకం ముఖ్యోద్దేశం. నవజాత శిశువుల ఆరోగ్యాన్ని కాపాడటం, శిశు మరణాల రేటును తగ్గించడంతో పాటుగా ఆర్థికంగా ఇబ్బంది పడే కుటుంబాలకు శిశు సంరక్షణ సామాగ్రిని ఉచితంగా అందించడం దీని ఉద్దేశం. అలాగే ప్రభుత్వ ఆసుపత్రుల్లో ప్రసవాలను ప్రోత్సహించడం కోసం ఈ బేబీ కిట్ పథకం తెచ్చారు.

బేబీ కిట్‌లో దోమతెర, దుప్పటి, స్లీపింగ్ బెట్, యాంటీసెప్టిక్ లోషన్‌తో పాటుగా నాప్‌కిన్, డైపర్లు, షాంపూ వంటి 11 రకాల సామాగ్రి ఉంటుంది. ఈ కిట్‌లు ప్రభుత్వ ఆసుపత్రుల్లో ప్రసవించిన తల్లులకు, ఆసుపత్రి నుంచి డిశ్చార్జ్ అయ్యే సమయంలో ఉచితంగా అందజేస్తారు. గతంలో ఈ పథకాన్ని ఎన్టీఆర్ బేబీ కిట్ పేరుతో అమలు చేశారు. రూ.800 విలువైన వివిధ సామాగ్రి బేబీ కిట్ పేరుతో అందించారు. అయితే వైసీపీ హయాంలో ఈ పథకం నిలిచిపోయింది. అయితే నవజాత శిశువుల ఆరోగ్య సంరక్షణ, ప్రభుత్వ ఆసుపత్రులలో ప్రసవాలను ప్రోత్సహించడం కోసం ఏపీ ప్రభుత్వం బేబీ కిట్ పథకాన్ని పునరుద్ధరించనుంది. ఇందుకోసం తెలంగాణ, ఒడిశా, కర్ణాటక, తమిళనాడులో అమలవుతున్న ఈ తరహా పథకాలను అధికారులు ఇప్పటికే పరిశీలించారు.